Catee：幸福「羊」溢

之前都寫過唔少酒吧餐廳，亦講到發覺好多酒吧餐廳都唔喺就咁賣吓酒、賣吓伴酒嘅小食，仲提供唔少正餐菜式，而且，更一啲都唔馬虎，質素比得上好多西餐廳。就好似今晚到訪嘅「Catee」，就喺其中一家，等老婆上完咗個進修班，一齊過嚟「撐枱腳」。

既為酒吧餐廳，內籠自不然喺一派酒吧格局，踏入門口，先入眼簾就喺酒吧枱，掛滿酒杯，放滿各式各樣嘅烈酒。

望入少少，就喺用餐區，其實，驟眼一望，跟一般西餐廳無疑，仲佈置得頗有氣氛，而且不停播住悠揚嘅英文歌，最有趣喺當中有唔少跟貓有關嘅裝飾，怪唔之得店名叫「Catee」啦，但太可放心，餐廳內唔見有真貓嘅。

每日嘅8:00pm前都喺「歡樂時光」，所有酒精類飲品都有買一送一優惠；着數嘢仲未止，星期日至四，凡惠顧一輪「歡樂時光」，仲可以以半價享用小食一份。不過，我哋兩公婆唔好酒，嚟到亦喺食正餐，所以，呢啲優惠今次暫且用唔着。但順帶一講，將近八點，見到店員再晌每枱都提一提「歡樂時光」優惠，可見服務嘅細心位。

食物方面，翻一轉主餐牌，可謂選擇俱全，有前菜、湯品、沙律、主菜、意大利飯、意大利麵、小食、甜品……等等。當中嘅主食類，都可以加$50轉為套餐，就會多埋沙律、餐湯、甜品及餐飲。

講到晚餐，又確喺有一張「精選晚飯套餐」餐牌嘅，共有6款選擇，定價$188-$298，已包晒是日沙律、餐湯、飲品及甜品，相信喺唔少人心目中划算之選。

此外，掛晌牆上仲有一張「廚師推介」餐單，例如焗原隻龍蝦，烤原條牛尾肉……，都喺啲頗吸引嘅菜式。不過，我哋都喺晌主餐牌度揀，因為有啲心水嘅菜式，況且，亦可以加錢轉為套餐。

麵包籃

先送嚟一小籃麵包，分別有意式香草包及黑炭包，並配上橄欖油及黑醋。麵包帶微暖，入口鬆軟，尤其前者，更喺小弟嘅「飛弗」，沾點油醋，簡單而好食。

是日餐湯

隨後送上嘅喺周打蜆湯，個湯做得一啲都唔馬虎，除口感柔滑，有點點鮮味之外，內裡仲混有唔少蜆肉。

田園沙律

沙律底喺以沙律菜配紅腰豆，初時仲諗會唔會喺繼續意大利風落番油醋呢，但原來喺日本風淋上胡麻醬，味道香濃，而沙律菜好爽脆。

香煎尖吻鱸魚柳伴龍蝦汁 $178

賣相一啲都唔失禮呀，兩大件鱸魚柳，更伴有好多薯菜，鱸魚柳煎得外皮脆到咯咯聲，啲肉質就非常嫩滑，魚味濃，反而，啲龍蝦汁只喺不過不失，唔算好濃郁，未知喺咪唔做咁濃，免影響魚柳嘅魚鮮味。事後，店員話佢哋嘅龍躉魚柳更出色，喺晌街市買嘅新鮮貨，有機會真喺要一試。

啲薯菜嘅配搭仲好特別，用上荷蘭串茄、意大利黃青瓜……就知用料不賴。而且，全部都煎烤過，特別好食，薯蓉亦做得綿滑，但如果加番多少少鹽巴就恰到好處喇。

烤澳洲羊架伴薄荷醬 $218

唔好怪我，又喺羊架，呢幾個月確喺食咗唔少次。唔喺講笑，非常大份，3大支羊架，支支都手掌咁大，而且，帶肥膏有點多，所以，羶味頗強勁，但點勁羶都好，我OK喎。

要咗5乘熟，煎得啱啱好，切開仲見到粉嫩嘅肉色，食落外層帶微焦，裡面又腍又富肉汁，無論沾點薄荷醬，抑或燒汁，都好好食。

菠蘿汁、小紅莓汁

早餐、午餐都飲過咖啡及奶茶，再飲就超標喇，所以，晚餐就揀咗果汁，難得點果汁都唔使額外補錢。其實，一點餐就叫店員可以上埋餐飲，邊飲邊食。我杯菠蘿汁底下仲沉澱咗啲菠蘿蓉，而食羊架時，配菠蘿汁喺唔錯嘅搭配嚟。

是日甜品

店員送上件蛋糕時，話喺紅莓蛋糕，但其實，中間又夾有栗子蓉，咁嘅配搭印象中就較少見。味道喺點？又有水準喎，海綿蛋糕好鬆軟，又食到栗子香，忌廉亦打得滑溜。

整體嚟講，環境、服務及食物，都甚具水準，讓我倆都食得稱心。所以，依家真喺唔可以睇少啲酒吧餐廳嘅出品。心諗，有咩特別日子嚟依度食番餐，慶祝吓，都OK，尤其晌結婚紀念日，可謂幸福洋溢。

個人評分
味道：8/10
環境：8/10
服務：8/10
抵食：8/10
平均每人消費：HK$275

餐廳資料：
Catee
荃灣楊屋道73號地下
2776 1328