雖然喺會所酒樓，但街客一樣可以嚟飲茶食飯，內裡嘅環境跟一般嘅酒樓無咩分別，喺地方無咁大，一眼都睇晒，但樓底高，加上今周日嚟到，意外地人客唔多，我哋一行大大細細13人已經喺大戶，所以，整體感覺都喺闊落。
見佢張點心紙寫住星期六、日適用，估計喺平日價錢會平啲，周六、日就貴少少，另收茗茶$10位。而點心紙一大張睇晒，分即做點心、蒸飯粥品、廚味推介共33樣嘢，無出面啲酒樓咁多，但一般而言都夠晒揀。
而另外仲有一張A4紙菜單，喺啲小食、小菜、湯羹及飯麵。由於有組員早餐都未食，哈哈！大呻肚餓，晌大家研究揀咩點心之時，就先嗌兩客飯麵。
蛋白瑤柱炒飯 $88
比預期嘅碟頭大，雖然叫會所樓，但定價都親民。睇都睇得出落咗唔少瑤柱粒，貨真價實，最稱心喺啲飯粒炒得爽身，而且，唔會好油，三扒兩撥成碟炒飯就清晒。
乾炒牛河 $88
同碟炒飯一樣份量十足，亦喺好足料，牛肉落咗唔少，而且，啲河粉唔止炒得均勻，每條粉都上晒色，更正嘅喺，食到尾嗰炷都唔油膩，炒功了得，有水準，抵食。
轉頭，陸陸續續上點心，一下子就堆滿成枱，不過，相上嘅點心都未喺齊晒，但無理由仲要等齊先食架，組員們，起筷吧！
自家XO醬炒腸粉 $37
點心都喺即叫即做，而且，感覺都好夠誠意，就好似呢碟炒腸粉，加上蛋絲，撒上芝麻、蔥花，靚仔咗好多。味道亦都唔錯，炒得香口惹味，啲腸粉仲喺好軟滑。
皮蛋肉片粥 $51
啲小朋友嗌住要食粥，一嚟到就好搶手，所以，我都唔好意思再撈起啲料嚟影相。簡單而言，啲粥好綿，肉皮比相像中滑。
水晶鮮蝦餃皇 $34
啲蝦餃皮望落雖未致於如「水晶」咁透，但咬落軟綿又唔黏牙，裡面全喺蝦肉，好鮮甜，極之彈牙。
荷葉珍珠雞 $27
例牌，一客有兩隻珍珠雞，裡面嘅糯米蒸得口感黏糯，餡料惹味香口，食落又確喺有微微荷葉香。
豉汁蒸鳳爪 $23
又喺點心中嘅經典，鳳爪蒸到腍透，而言，帶有濃濃豉汁香，就連底下嘅花生都唔好錯過。
潮州蒸粉果 $23
相對鮮蝦菜苗餃（無影到個別點心相），小弟就覺得籠蒸粉果麻麻哋，大概因為粉果較厚皮，還好食得出落足料，味道方面本身喺唔錯。
鮮蝦炸春卷 $23
小朋友唔好食咁多油炸嘢，唔健康吖嘛，就由我哋啲大人嚟。春卷外皮甘香又脆口，完全無油膩感，裡面混有鮮蝦，比起淨肉更爽口。
黑椒金錢肚 $25
金錢肚不時都有食，一喺就飲茶食點心時，一喺就食麵時會遇到。繼鳳爪，又喺另一道惹味點心，金錢肚軟腍帶點點爽口，黑椒味濃卻唔會太嗆喉。
北菇綿花雞 $27
綿花雞我就麻麻哋，因為一般嚟講都會較油，啲魚肚亦好似海綿咁吸滿油。不過，有組員就讚算喺唔油，啲雞仲仲勁滑添。
蜜汁叉燒包 $23
叉燒包喺港式點心嘅經典之一，唔點就好似差咁啲，況且，我哋咁多人，又多細路，嗌定兩籠都無問題。叉燒餡好惹味，最緊要喺無肥膏嘛。
椰香奶黃包 $25
奶黃包向來喺我心水嘅包款之一，雖然，包中嘅奶黃唔喺勁流心嗰種，但軟滑而富椰香，蛋香味濃，包身軟熟唔黏牙。
懷舊馬拉糕 $25
個馬拉糕幾得，鬆軟得嚟口感綿密，回彈力強，估唔到啲細路都好鍾意食，真喺大人細路都爭住食。
原盅北菇滑雞飯 $56我哋一大棚人，當中食得吓嘅人唔少，所以，揀多個煲仔飯打打底，怕大家食唔飽。每盅份量唔少，雞件亦多，無欺場，飯粒蒸得分明，撈埋豉油已好好食，加上啲雞件頗嫩滑。
棗紅糕 $23雖然甜品我最啱，不過無食到，影低張相留個記錄，睇樣就唔錯，好唔好食就真喺唔知。
除非去啲點心專門店，否則，去一般酒樓飲餐茶喺唔平得去邊，不過，一大棚人飲茶卻喺最好選擇，一來圍住張大圓枱，方便一齊傾偈，二來可以點好多點心「些牙」，較易攤分「成本」，感覺會抵啲。
味道：8/10
環境：8/10
服務：8/10
抵食：8/10
平均每人消費：HK$73
環境：8/10
服務：8/10
抵食：8/10
平均每人消費：HK$73
餐廳資料：
又一居會所餐廳 Club Oasis
九龍塘又一村達之路23號地舖
2788 3881
又一居會所餐廳 Club Oasis
九龍塘又一村達之路23號地舖
2788 3881
沒有留言:
發佈留言