太平洋咖啡 Pacific Coffee Company：全為了「梨」

本來老婆星期日晏晝有個興趣班要到油麻地上堂，不過，撞正啲社會事件，油尖旺一帶「立立亂」，所以，課堂取消。突咗個晏晝出嚟，兩公婆就不如落去「太平洋咖啡」輕鬆下，嘆杯咖啡，睇睇書。

「曼克頓山」呢間「太平洋咖啡 」特別鍾意，因為地方大，樓底高，空間感強，更特別多梳化櫈，可惜，呢啲假日時段，梳化櫈大多數都喺一櫈難求。

小弟向來都喜歡試新嘢，所以，晌排隊買咖啡時，見到有款新系列：「Legend of the Fall」，以蜜梨入饌調配出兩款咖啡飲品，感覺會喺潤潤哋，一於試晒佢。但好可惜，啲蛋糕賣得七七八八，心水嘅檸檬撻都賣晒，得番一款較啱口味。

蜜梨胚芽燕麥奶咖啡 $42

呢款咖啡勁啱我老婆，因為用上燕麥奶，可以講喺「全素」出品，要求少冰，所以，唔會太凍，只喺涼涼哋。飲落好有驚喜，醇香嘅咖啡中，滲出清甜嘅梨香味，兩者味道平衡，更有一份滋潤喉嚨嘅感覺。除咗面面糝咗啲粒胚芽之外，底下仲有啲薏仁粒，粉粉哋，有啲咬口，不過，就未必人人都喜歡佢嘅口感。事後先知，原本呢款產品都提供到熱飲。

蜜梨薏仁燕麥奶其樂冰 $42

小弟就要杯其冰樂，送走夏日，迎來秋風。跟上面嘅燕麥奶咖啡做法差唔多，只喺做成沙冰，味道依樣晌醇香嘅咖啡上滲出陣陣蜜梨清香，配合底下充滿口感而又高纖嘅薏仁粒粒，確喺有種幾新奇嘅感覺。

甘筍菠蘿蛋糕 $24

我老婆都幾鍾意甘筍系嘅蛋糕，呢一款的的骰骰就啱晒佢。蛋糕嘅質感帶微微濕潤，當中更睇到混有唔少甘筍絲，而面層嘅忌廉芝士下先有一少抹菠蘿蓉，比較隱若，唔喺點食得出；反而最討人喜歡喺餅面嘅堅果粒，豐富咗個口感層次。

渡過咗一段悠閒嘅咖啡時間，近旁晚時份，再晌荔枝角公園走走，雖然睇唔到日落，但黃昏嘅日影西斜，天空嘅雲彩染上片片橙紅，有種療癒感。

個人評分
味道：9/10
環境：8/10
服務：8/10
抵食：8/10
平均每人消費：HK$54

餐廳資料：
太平洋咖啡 Pacific Coffee Company
荔枝角寶輪街1號曼克頓山地下04-05號舖
2907 1234