麵留香茶餐廳 Noodle Eleven Restaurant：川「留」不息，快閃午餐。

完咗聚會，落到太子，無乜心水食邊間，路過「麵留香茶餐廳」，見啲「午餐」好抵，二話不說，入去搵個卡位坐低。其實，「麵留香」都幫襯過好幾次，多年前亦都撰文寫過食評，但印象麻麻，而今次再寫番篇，皆因真喺有啲驚喜。

踏進餐廳，正值午市高時段，座無虛席，不過，嚟茶記食嘢嘅人，都喺快上快落，川流不息咁，好似我哋咁，一入到去眼見幾張吉枱，轉頭又坐滿咗。茶記格局，唔需要多描述，位置逼逼，牆上貼滿餐牌，最緊要光猛企理啫。

雖然枱邊插住其他餐牌，牆上亦都貼咗好多乜餐物餐，不過，入嚟都喺因為睇到啲午餐抵食，包晒例湯、餐飲，都喺$42。

例湯

茶記嘅例湯大多數都喺青紅蘿蔔煲豬骨之類，大路又夠穩陣，所以，無咩要求，勝在夠大碗，飲落都夠「老火」。

焗香草牛扒帶子飯 $42

老友都一樣點呢個，因為，睇勻幾款午餐款式，就以呢個最抵食，不過，友人就要意飯。焗出嚟個樣都幾靚仔呀，爽身嘅炒飯底，配濃濃嘅芝士忌廉汁，又有多件細呎碼嘅牛扒，醃到軟腍入味，不過，帶子就唔好期望啲咩鮮貨色，只喺啲雪藏吉列帶子，整體而言屬中上質素架啦。

最後，嘆埋杯熱奶茶，完成今餐嘅「晏仔」，雖然，個別影漏杯熱奶茶，但茶底芳香，茶身亦幾滑，唔錯喔，好划算嘅一餐飯！老實講，賣$42，有湯，有餐飲，個焗飯又足料，味道唔錯，你仲想點！不過，我見唔少食評都指啲服務差，好彩我又無遇上，或許喺啲個別事件而已。

個人評分
味道：8/10
環境：6/10
服務：8/10
抵食：9/10
平均每人消費：HK$42

餐廳資料：
麵留香茶餐廳 Noodle Eleven Restaurant
太子花園街219號地下
2380 3803