原藝 Original Art：天賜良「原」

晌雜誌見到「原藝」呢個名字，就諗緊喺唔喺兩年多前晌太子幫襯過嘅小店「原藝」呢？表姨甥女近排晌西貢荔枝莊嗰頭嘅梅子林搞藝術嘢，幫啲村屋畫牆畫，可謂日曬雨淋，真喺服咗佢，個項目接近完成，當然要請佢食餐好嚟鼓勵吓啦，所以，專誠走到嚟位於九龍塘「原藝」嘅新店。

雖然，對好多人嚟講，餐廳嘅位置比較吊腳，但對小弟而言，一啲都嚟陌生，皆因中學時期郁喺晌大坑東、南山邨、九龍塘呢幾個片區頭渡過。踏進餐廳，一室深灰為主調，配以原木嘅木系枱櫈，有種原始風。

最有趣喺近門口位佈置成一個工作台，有專業嘅畫圖枱櫈，牆上又掛上好多工具，喺打卡位嚟。並配以柔和嘅燈光，令人感覺好舒服，我就最鍾意喺每枱都有射燈聚焦，方便喜歡影相嘅朋友。

細心位唔止呢樣，牆上嘅冷氣都特別加裝咗擋風板，令到吹出嚟嘅冷氣迴轉向番上，一來唔會咁快吹凍啲食物，二來重點就喺唔使照頭吹，吹到頭暈。

此外，餐具套都好有特色，以牛仔布整成，打開之後就見到一整套基本餐具。

晚市食物選擇方面，可以講主要喺供應套餐，而晚餐包括自選主菜配餐飲，定價$108-$238；但另提供多款頭盤，如沙律、冷盤、小食、湯品，變相讓你將晚餐「升級」，彈性而豐儉由人。

另外，亦有一組「全套」嘅晚餐，包晒沙律、頭前菜、餐湯、主菜及甜品，雖然餐牌無寫，但都包埋餐飲。定價每位為$488，但兩位用就收$788。

小弟本身一向都唔好酒，不過，順帶介紹埋佢哋嘅餐酒菜牌，正正印晌晚餐菜牌之後。整體而言，感覺定價好進取，相信都喺因為住得呢區都喺唔介紹消費高啲，但就想食有質素嘅「上等人」。

凱撒沙律

先嚟一道清爽嘅凱撒沙律，醬汁撈得均勻，每炷羅馬生菜都被醬汁薄薄咁包住，混和煙肉碎、烘麵包粒及巴馬臣芝士碎，爽口俐落，點點鹹鮮味。

白酒煮青口

當送到上枱之時，真喺散發出陣陣酒香，不過，晌食嘅時候，啲白酒揮發得差唔多，所以，唔使太擔心有太重酒味；隨之而嚟，喺青口嘅鮮甜味，而且，啲青口都幾夠肉地。

龍蝦忌廉湯

個龍蝦湯加咗少少食用花伴伴碟，立時靚咗好多。入口，夠熱辣，蝦味極之突出，每口湯都帶着龍蝦精華似的，而且，質感非常柔滑，喺好有質素嘅一道湯品。唯挑剔喺缺少啲特色嘅麵包嚟配餐湯。

油封鴨腿

呢一道都可以講喺幾經典嘅法國菜式，大大隻鴨脾煎封好，外皮油潤有光澤，一咬喺堅脆口，但卻唔會一口油，拆開啲肉，鬆化並有種鴨嘅獨有羶香，沾少少自家調製嘅蘋果醬，更去走埋剩下丁點嘅油膩感，味道更平衡。

伴菜有好多菇菌及野菜，唔喺白烚貨色，都喺以蒜蓉炒過，寧舍香；但最深得我心喺橙黃色嘅蕃薯蓉，非常香甜，搓得軟滑，但仲保留少少蕃薯肉，令口感多添幾分層次。

澳洲M4霜降和牛板腱

另一道主菜以牛板腱入饌，喺較少接觸嘅位置，你問我喺乜位，其實我都唔喺太清楚，但切開嘅紋理，本身嘅外觀，都有啲似牛展，不過，煮得十分鬆化，而且，超入味；雖然喺M4級，又話明喺霜降，不過，油脂比預期少，卻甚具肉香。

即磨咖啡

上甜品前，先嚟杯即磨咖啡，好調節吓心情迎接兩款甜點。咖啡其實無咩特別，但入口仍然喺醇香馥郁，不過，鮮奶可以另上，讓客人自己決定落奶多定奶少會更好。

法式檸檬撻

3款甜點中，小弟首選就喺檸檬撻，因為，既可清清味蕾，又喺法式甜點中嘅經典。果然，不負所望，外層嘅撻殼做得又薄又脆，無論邊定底，厚薄一致。餡心嘅檸檬蓉，既軟滑，又酸香，非常清新，襯咖啡一流。

朱古力黑茶慕絲

雖然啲甜點無乜點加啲擺設做裝飾，但呢件慕絲餅外觀花俏吸晴。切開一睇，餅底中間喺一大嚿較硬身朱古力，被柔滑嘅慕絲所包圍，不過，「黑茶」？就唔喺太覺得有咩茶味，反而，朱古力味較為搶。

事隔兩年多再訪，都無失望，食得出食材確喺有質素，大廚嘅廚藝紮實，加上環境、氣氛好，喺叫人食得好舒心、好享受。結尾，都分享番表姨甥女嘅其中兩張作品，同樣喺原創嘅藝術。

表姨甥女打後仲有好多大項目，希望呢餐真喺可以為到佢打打氣。

味道：9/10
環境：8/10
服務：8/10
抵食：7/10
平均每人消費：HK$435

餐廳資料：
原藝 Original Art
九龍塘海棠路66號女青雅舍地舖
6932 7198