茶館 Tea House：「茶」找不足

平常已經少同細佬妹食飯，都喺一年幾次嘅生日飯、做節飯，如單獨個別食就更少，不過，今晚就同細妹「撐枱腳」，因為有啲嘢交收，加上老婆上堂，小弟無飯開，索性交收完，一齊食埋飯先散。

就番佢，當然晌番石硤尾食，佢建議嚟呢間「茶館」，咪睇個名以為賣茶為主，其實只喺間茶記，不過，新開唔耐，室內嘅裝修新簇，環境又光猛，眼見亦有唔少街坊幫襯，但冷氣唔喺好夠，感覺有微微侷促。

座位旁插住啲餐牌，首先睇睇喺個「精選晚餐」嘅餐牌，主要喺啲小炒套餐，賣$54-$72，跟例湯及白飯，但唔包嘢飲，另叫有半價。

結果，「精選晚餐」嘅選擇我哋兩個都唔啱，因為細妹都嚟過食嘢，所以，佢就鍾意個「撈一丁麵」餐，可選配唔同嘅配料，仲包埋火腿炒蛋多士及餐飲。

吉列豬扒撈一丁麵餐 $52

好快上咗碟火腿炒蛋配蒜蓉多士，睇個樣大概都知個炒滑蛋唔算好滑，而件蒜蓉多嘅蒜粒烘到濃晒，我就無試到味，但個賣相就肯定唔太得，細妹嘅評價喺普通。

而個撈丁選咗XO醬，但無諗過啲一丁煮完就咁放晌碟面「風乾」，而啲XO醬則就咁撻上面，所以，等到細妹食完份炒蛋多士，啲一丁真喺好似「乾晒」咁，撈好耐先撈得勻啲XO醬，味道OK嘅，但處理上有啲敗筆；而件吉列豬唔得，細妹話好韌吓，幸而都算脆口，亦唔油。最搞嘢，送咗碗例湯，就喺豬扒隔離嗰碗。

晌大餐牌內，仲有一系列皇牌焗飯、意粉，比較啱我心水，當中有好多配搭，定價於$48-$52，同樣唔包嘢飲，嗌嘢飲有半價優惠。

青紅蘿蔔煲豬展

我個焗飯喺單點菜式，但啲店員除招呼唔錯外，不時問我有無嚟錯，啲嘢齊未，更私人醒咗一碗例湯我，雖然只不過喺碗普普通通嘅中式青紅蘿蔔煲豬展，但算好有心。

鮮茄焗菠蘿雞扒飯 $48

個焗飯都幾大份吓，初時見佢刻意叫焗「菠蘿」……，諗住會特別多菠蘿，實在諗多咗，都只喺好似平常嘅焗飯咁，有三幾粒罐頭菠蘿，而中間喺一大件雞扒而已。其實整體味道唔錯嘅，蕃茄汁底又幾酸香鮮活，喺炒飯底有少少濕，未夠乾身啫。

熱奶茶 +$8

我哋不約而同都喺要熱奶茶，不過，我杯喺要俾錢加配。茶記嘅熱奶茶一向差極有個譜，眼下呢杯其實都唔錯，茶底好有茶香，雖然口感未至於絲滑般，但我都收貨嘞。

今次評個總分真喺有啲尷尬，因為，個焗雞扒飯都算好食，但客一丁麵餐就瑕疵多啲，不過，又未至於難食，姑且俾個OK佢先啦。

個人評分
味道：7/10
環境：6/10
服務：8/10
抵食：7/10
平均每人消費：HK$54

餐廳資料：
茶館 Tea House
石硤尾石硤尾村美薈樓地下6號舖
2618 1680