而一到晚上，就搖身一變為傳統英式酒吧餐廳「The Leah」，餐廳分為室外與室內，其實，室外位設晌出面人造草地上，四周都擺放好多植物，猶如銅鑼灣區一片小綠洲，讓客人放鬆身心，盡情享受寫意嘅環境，不過，近排天氣平均都有30℃以上，又不時有驟雨，大家都要乖乖坐返晌室內。
至於室內，其實都一樣好舒服，皆因貫徹整體嘅佈局，裡面都掛有非常之多嘅盆栽，頗有溫室之感，加上枱櫈排得寬敞，毫無壓迫感，配以柔和嘅燈光，同樣叫人悠閒自在。
既然定位為酒吧餐廳，飲品方面選擇十分多，尤其酒精類，相信喜歡飲酒嘅朋友唔會失望。而經侍應嘅介紹，無論酒精還是非酒精類，都甚具創意，配搭有心思。不過，我哋一眾對酒嘅飲品興趣唔大，但非酒類都仲有大把特色選擇。
Earl Grey & Oriental Spice Iced Tea $65
佢哋有好多特色嘅凍冰茶，點特色呢？一來味道嘅配搭比較特別，二來喺可以選擇加入酒精成份，當然，友人就揀咗無酒精版本啦。伯爵茶嘅味道唔多講，相信好多人都知道，但呢杯加入嘅東方香料，小弟試咗一口，感覺似喺啲孜然味，幾得意。
Apple & Elderflower Lemonade $65Lime & Lemongrass Lemonade $65由於好幾道茶都選上濃味嘅菜式，所以，小弟就揀來清爽嘅檸檬特飲作中和，後者青檸香茅檸檬梳打確喺幾得，香茅味突出，入口酸香涼快，仲非常解暑，更襯晒今晚啲菜式。
講到食物方面，一紙睇晒，務求貴精不貴多，以Sea、Land、Leah分作為3大類，再配上兩款需預訂嘅招牌菜，以及伴菜同甜品，就成為整個主餐牌嘅內容。睇見啲菜式，主要都喺走向平實嘅路線，但配搭上都花咗一定嘅心思。
Scotch Egg & Soldiers $98晌三心兩意之間，呢一款流心蛋喺店家推介嘅前菜菜式，以多種食材，如煙肉、洋蔥粒、麵包糠包住鴨蛋炸至流心效果，再伴以酸種麵包條。睇見個蛋黃好流心，以麵包條沾上蛋黃漿，綿香好食；再食個蛋身，外層非常酥脆香口，裡面鹹香滋味。再飲喺檸檬特飲，堅喺爽爆。
Scallop & Black Pudding $228賣相猶如小叢林般，非常別緻有趣，而帶子採用日本北海道貨色，香煎後十分彈牙而帶點焦脆，又夠晒厚身、鮮甜；而黑布甸喺乜，小弟都唔喺好答得上，食落就覺得好似炸香咗嘅麵包布甸，夾埋啲韮蔥一齊食，前者鹹香，後者清爽，感覺幾特別。
Beef Pie $188
呢度嘅肉批喺店家嘅推介菜式，共有兩款牛味：雞肉及牛肉，相信以後者較惹味吸引。肉批焗得金黃誘人，切開時仲熱氣騰騰，批內填滿牛肉，睇見餐牌寫住喺牛肋肉，怪不之得啲肉又腍又富肉香，肉汁豐盈，還帶點黑椒嘅香氣，層酥皮又香口。
Beef Wellington $788（需預訂）
威靈頓牛柳工序多，火喉又要拿捏得好，實在唔易做，所以，坊間都唔喺好多餐廳都有賣呢度菜式。既然The Leah有提供，仲喺需預訂嘅亮點菜式，更惹人期待囉！
雖然賣近八百蚊一客，但份量足以4-5人享用，侍應會先將焗好嘅威靈頓牛柳捧出嚟俾客人過過目，再問你想切成多件，並伴上薯蓉及紅酒汁。
睇見切好嘅威靈頓牛柳，粉嫩而唔會有半滴血水嘅牛柳肉，感覺已經令人垂涎，再裹上一層薄薄嘅酥皮，而酥皮下捲入巴馬火腿及蘑菇，真喺食咗先再講。
啲牛柳煎封得恰到好處，又嫩又腍，每口都肉汁澎湃，而巴馬火腿及蘑菇，令味道更富層次，沾少少紅酒汁，絕對喺有畫龍點睛之效，堅好食。至於啲薯蓉，真喺唔會差得去邊囉，幼滑得好細緻。
Strawberry & Sherry Trifle $88
最後來點甜作結，不過就唔喺麵包布甸，而喺一款叫Sherry Trifle，見過有譯為雪梨酒浸果醬凍杯，喺以一層果肉、一層吉士、一層果肉及一層忌廉做成，有啲就會加一層海綿蛋糕。因為混有大量士多啤梨肉，感覺香甜清爽，而吉士與忌廉，都令口感多添滑溜感。
無論飲品，抑或食物，都有高水準嘅表現，服務亦都熨貼細心，無怪乎越夜越多客人。相信去多秋涼之時，更多人會嚟到享受一吓甚富花園氣息嘅英倫晚餐。
個人評分
味道：8/10
環境：9/10
服務：9/10
抵食：7/10
平均每人消費：HK$400
味道：8/10
環境：9/10
服務：9/10
抵食：7/10
平均每人消費：HK$400
餐廳資料：
The Leah
銅鑼灣恩平道28號利園2期3樓308及311號舖
2337 7651
The Leah
銅鑼灣恩平道28號利園2期3樓308及311號舖
2337 7651
沒有留言:
發佈留言