講開安平（註：我老婆以為佢叫「平安」麵店），小弟晌2010年9月都去過一次台南，有興趣都可以睇睇小弟篇遊記。到訪過安平古堡、億載金城、赤坎樓等標準景點，對台南、安平區感覺唔錯。而入到店內，裝修簡約得嚟，主要用上木飾擺設，有少少古雅氣息，而且，地方較為闊落。
牆上又掛咗唔少台灣相關景緻，加添台味，當然，唔少得一啲台式古早味嘅擺設，以及一點點文青嘅小裝飾，添加一份悠閒、慢活感。
食物方面，餐牌都設計得精美，有少量圖片作參考，大類分別為特色台灣湯麵、台灣牛肉麵、乾拌麵、傳統便當、台式湯飯、台式小菜及台灣夜市小吃。
而飲品、甜品就印晌另一張散開嘅餐牌度，冰量、甜度都可以自由選擇，更可以額外加配唔同嘅配料。
如果點菜，喺以劃紙仔嘅形式，雖然，以環保角度喺浪費唔少紙張，但白紙黑字就減少好多人為出錯，出錯菜式都唔會口同鼻訟拗。
但點菜紙後，原來仲有種二人或四人餐，不過，覺得選擇少，尤其主食類，欠彈性，所以，都喺散叫番。
牛蒡大腸 $42
台式小食一向以滷水較聞名，不過，睇勻啲小食都無滷水拼盤之類，最後，試試呢一道「牛蒡大腸」，因為依家講健康嘅時代，好少食大腸喇。其實，啲大腸滷得夠晒入味，夠香，但堅堅堅肥，睇到啲腸壁內填滿嘅都喺肥膏，一咬真喺咇晒啲豬油出嚟；而牛蒡切成幼絲，本應炸得香脆會好香口，但大家都覺得炸過籠，有啲燶啫，而且，亦比較油。
台灣奶茶+珍珠 +$11
我哋點咗兩杯珍珠奶茶，一杯正常，一杯半甜，但嚟到侍應無講，問佢都喺「求其」指，再試試，兩杯甜度都喺一樣，無差別，明顯做得hea hea哋。還好嘅喺茶味唔錯，珍珠有咬口，似有點黑糖嘅清甜味。
金牌咖啡+珍珠 +$11
細佬點咗金牌咖啡，明顯喺得個名，以佢自己嘅口味，就話唔喺好得，但我就無試，就評論唔到，但珍珠就明顯偏少。
百香果冰茶 +$8
老婆一向喺百香果粉絲，所以，就算杯百香冰茶只有凍嘅，佢都照叫，皆因可以走冰，走冰後嘅效果喺微涼，啱晒佢。睇樣就知唔喺用新鮮百香果果肉，只喺用百香果蜜，配綠茶，少甜，味道都唔錯嘅。
安平紅燒牛肉新竹米線 $60
細妹就穩穩陣陣揀咗招牌之一嘅紅燒牛肉麵，但就轉咗新竹米粉，既免費轉，又未試過。都幾鍾意佢哋搵個小木托盤盛上，感覺雅致啲，而啲紅燒牛肉細妹就話幾對辦，鬆化而肉味濃，牛肉湯底亦濃郁，甚具肉香，而啲米粉好幼滑，好食。
滷肉香雞排便當 $52
細佬就喜歡香口嘢多啲，亦鍾意食飯多過粉麵，所以，就試試呢個便當。雖然，啲飯壓成一個台灣地形（其實得七成似），不過，既然叫便當，砌成個便當盒樣仲有賣點啲。滷肉分開碟上金，做得幾香，喺比較油啲，雞排就唔喺平常所見啲大雞排一整塊開炸，似喺切開先炸，所以，非原件一塊雞排，外觀亦都好巖巉，食味就還可以啦！
滷肉香蔥鹽酥雞新竹湯米 $50
小弟印象中好似好耐無食過鹽酥雞，又對新竹米粉有興趣，所以，就揀呢款湯米。相比細佬啲滷肉，呢碗明顯碎濕濕兼無乜香味，幸而啲鹽酥雞做得有水準，炸得香脆不膩，肉質又幾滑身，淮鹽可以重手啲就仲好，而米粉真喺好幼滑、爽身，湯頭就明顯較清。
寶島蚵仔湯飯 $68
老婆點咗湯飯，諗住濕濕哋，又唔會似湯麵咁熱辣辣。初時見佢寫蚵仔湯飯，原來仲有啲海鮮料，如鮮蝦同魷魚，整體而言，啲蚵仔、蝦同魷魚都幾鮮甜，再配以冬菜、芫荽，個湯頭亦頗鮮香，點都好過我碗米粉，所以，啲湯飯確喺幾好食。
上網睇過吓，呢片小區賣台灣嘢嘅店鋪唔多，同類鋪就只有一家「101台式休閒餐廳」，其他都只喺賣台式飲品嘅外賣台，所以，競爭唔大，加上呢度環境好，招呼唔錯，然而出品仲有好多改善空間，但希望唔好因為競爭細就疏懶晌品質上。
個人評分
味道：7/10
環境：8/10
服務：7/10
抵食：7/10
平均每人消費：HK$80
味道：7/10
環境：8/10
服務：7/10
抵食：7/10
平均每人消費：HK$80
餐廳資料：
安平麵店 An Ping Taiwanese Noodles
慈雲山慈雲山毓華街23號慈雲山中心1樓107號舖
3428 2663
安平麵店 An Ping Taiwanese Noodles
慈雲山慈雲山毓華街23號慈雲山中心1樓107號舖
3428 2663
沒有留言:
發佈留言