茶木‧台式休閒餐廳 TeaWood Taiwanese Cafe & Restaurant：耳木一新

早排旺開去食茶記，呢排就意外地旺開食台菜，其實都無刻意安排，有啲喺朋友嘅選擇，只喺咁啱而已。依次同表姨甥女嚟到世貿中心嘅「茶木」，諗一諗，對上一次到訪喺其旺角店，但已喺3年前嘅事喇。對「茶木」嘅印象喺唔錯嘅，選擇多，水準又不俗，否則，今晚都唔會再次到訪啦！

餐廳環境都幾大，裝修摩登時尚，無賣懷舊或文青感，但感覺一樣予人好悠閒。我哋被安排挨窗嘅卡位，只可惜一直落好大雨，變得窗外乜景都無，錯過維港夜景。如果日頭嚟，相信景觀非常開揚。

而我視線嘅左邊，一幅好大嘅牆畫，睇咗好耐，卒之睇到喺一張海床嘅照片，呢刻先留意到部份梳化椅用上湖水綠，相信喺想帶出海洋嘅感覺。

本來都想影低個餐牌俾大家參考，但實在太多頁，菜式又多樣化，想知道有咩菜式，只好自行瀏覽官網。

草莓希臘式優格特飲 $44

「茶木」嘅飲品一向都甚具特色，表姨甥女就喺睇中其「希臘式優格特飲」系列，而呢款系列就有3種口味：草莓、藍莓、鳳梨柳丁。

其實顧名思義，就知道喺以唔同味道嘅果蓉混落乳酪所做成，賣相吸引，味道酸酸甜甜好清新，口感就極之滑溜，啱晒呢排嘅悶熱天氣啦。

西瓜柳丁蘆薈 $43

小弟就揀咗另一系「台式特飲」，其實，話台式感覺有少少牽強，因為都只喺沙冰、梳打之類，而口味亦只喺愛玉較有台式風味。

而我其實就只喺想試試其西瓜搭橙汁嘅效果，賣相就好靚仔喇，未飲都有種透心涼嘅感覺。入口以西瓜味為主，慢慢滲出橙香，整體感覺好清爽，而混有粒粒蘆薈果肉，增加口感。

蚵嗲肉碎泡飯 $82

諗住天口熱，主食我哋就揀個泡飯，貪其濕濕哋。早前先晌慈雲山嘅「安平麵店」食過一道「寶島蚵仔湯飯」，雖然今次呢碗只有蚵仔，無加入其他海鮮，但啲蚵仔堅肥大厚肉，又有蠔味，仲混有少少肉碎添，飯粒分明又無爛，份量更喺十足，湯頭芳香，好食呀！

黑醋味醂豬軟骨 $68

另一道餸菜就揀咗款濃味，但開胃嘅「黑醋味醂豬軟骨」，以蠟燭熱住，喺幾聰明嘅做法。啲豬軟骨大大件，非常有睇頭，而且，炆煮得好入味，肉質超鬆化，就連啲軟骨咬落腍到好似啲牛孖根咁；底下墊有大大嚿嘅紅蘿蔔及白蘿蔔，好清甜，真喺越食越開胃。啲汁酸香到不得了，淨喺用嚟撈飯都食到一大碗。

黑白配三味吐司條 $50

甜品喺新產品嘅黑白吐司條，除用普通麵包，更用上竹炭麵包做成吐司條，而另一亮點就喺配搭3款沾醬：巧克力優格、白雪糖漿、起司奶蓋，可謂各有特色，有種耳目一新嘅感覺。

整個甜品嘅賣相跟餐牌所顯示嘅如出一徹，外觀頗為精緻，兩款吐司條烘得好脆口，巧克力優格嘅朱古力味唔算好濃，但好柔滑，白雪糖漿嘅味道好清甜，而起司奶蓋就帶有微微鹹香，質感又幼滑。

雖然只喺試咗幾樣嘢，但我哋都好滿意，而招呼都好夠主動，例如送上泡飯，同時會跟番兩隻小碗，甜品上場，會俾過啲新碟我哋。其實，呢啲都喺好基本嘢，但就喺有啲餐廳卻喺連基本嘅都做唔到。

個人評分
味道：8/10
環境：8/10
服務：8/10
抵食：8/10
平均每人消費：HK$160

餐廳資料：
茶木‧台式休閒餐廳 TeaWood Taiwanese Cafe & Restaurant
銅鑼灣告士打道280號世貿中心P2樓P211B號舖
2563 2299