午市嚟得中菜館，都喺打算食吓點心，而基本有咩點心，就印晒晌張點心紙度，並列清楚晒特、大、中、小點價錢，以及每位茗茶收$10。
不過，有另一種午市套餐供選擇，感覺好划算，因為每份賣$118，可任選兩款點心，以及一款粉麵飯，而粉麵飯更有招牌嘅泡飯可揀。
此外，仲有一款4人用嘅午市套餐，賣$468，但菜式就豐富好多，不過，睇其份量，覺得5個人都夠食。
XO醬炒腸粉 $58
我哋除咗點一份二人套餐，仲另外散點一啲想食嘅點心或小食。呢度好奇怪，喺無蒸腸粉，所以，就揀咗一客炒腸粉。其實搵XO醬炒乜都惹味好食，炒腸粉都唔例外，軟滑嘅腸粉炒得均勻，又辣辣哋，唔錯。
XO醬肉末虎皮尖椒 $78
老婆之前試過佢哋啲虎皮尖椒，覺得好正，故今次再翻兜，不過，今次做法唔同咗，煎好嘅尖椒再淋上XO醬肉末，感覺比較油，無上次釀虎皮尖椒咁好食。題外話，何解叫「虎皮」尖椒，因為以高溫油炸後，青椒嘅表皮焦乾得嚟似虎紋，但喺，我就唔喺好覺似喇。
鮮蝦菜苗餃（午市套餐）
套餐嘅點心，第一款就揀菜苗餃，啱晒老婆口味，啲餃睇落做得幾靚仔，外皮搓得晶瑩，不過入口都喺感覺有少少厚，幸而唔黏牙，頗軟熟；食落蝦肉有鮮味，菜苗刴得細碎，讓口感綿密。
蠔皇鮮竹卷（午市套餐）
另一款揀咗鮮竹卷，外層嘅腐皮部份好嫩滑，裡面填滿豬肉、木耳絲、唐芹粒……等等，有咬口，最緊要啲豬肉唔太肥，個蠔皇汁又幾香濃。兩道點心都喺一客三件，我哋3個人既唔使爭，又唔使讓，啱啱好。
龍肉西施泡飯（午市套餐）
有十多款粉麵飯供選擇，老婆就話泡飯喺呢度嘅人氣菜式，確實，目測所見確喺有幾多人點呢道菜式。以為套餐會細窩啲，但原來跟散點喺一樣嘅份量，一整窩，我哋每人都至少分到兩碗，可謂份量十足。
個泡飯裡面嘅湯底加入好多蔬菜粒，味道清甜，而所謂龍肉就喺蝦肉，仲加埋啲迷你帶子粒，當然最亮點喺啲脆炸米，加咗落泡飯度絕對喺錦上添花，令口感更豐富，果然無介紹錯。
我睇人哋嘅食評，就話臨尾會有紅豆沙奉送，當日亦見到隔離枱都有送上紅豆沙（註：眼見都喺點二人嘅午市套餐），不過，唔知喺咪熟客關係，我哋呢枱就無俾喇，然而，整體招呼都唔差嘅，侍應都有禮貌嘅。
個人評分
味道：8/10
環境：8/10
服務：8/10
抵食：8/10
平均每人消費：HK$100
味道：8/10
環境：8/10
服務：8/10
抵食：8/10
平均每人消費：HK$100
餐廳資料：
瑪寶鮮 Marbo Seafood Restaurant
尖沙咀寶勒巷6-8號盈豐大廈3樓
2367 0030
瑪寶鮮 Marbo Seafood Restaurant
尖沙咀寶勒巷6-8號盈豐大廈3樓
2367 0030
沒有留言:
發佈留言