餐廳位處工廈，亦近觀塘站，非常方便。睇門面唔大，屈個彎，其實裡面地方頗大，主要都喺4人卡位，裝修簡單平實，但牆上釘上好多美式車牌、巨型啤酒蓋……等等裝飾，可見店主都花咗啲心思晌度。
先講講枱面，自轉烤爐已裝嵌晌枱上，喺利用兩側嘅發熱管將食物烤熟，店員話校到80°已經好勁。此外，餐具、紙巾、骨桶（亦放埋串燒針）亦早已準備好。
而且，更準備好3款燒烤時用嘅醬：蜜糖燒汁，泰式甜酸醬，洋蔥蕃茄；此外，用作蘸點食物用嘅亦有3款孜然粉：原味、辣味及花生味。
飲品
講到放題，就一定有個大雪櫃擺上多款紙包、罐裝飲品，唔多講，款式都喺大家見慣見熟嘅本地品牌。唔好理，坐落就邊飲邊等，尤其燒烤，真喺要預先補足水份，哈哈！
前菜、沙律
喺時候要介紹吓有咩食物，基本上呢度唔喺得燒烤嘢，好似有啲韓燒放題店，都會有啲預製好嘅食物。晌出面個大凍櫃，一面就有啲凍海鮮，如凍蝦、青口，及冷盤，如泰式鳳爪、八爪魚、辣味螺肉、沙律杯、中華沙律……等等，仲有少量甜點及生果供應添。
我哋都拎咗啲沙律杯及炸軟殼蟹，前者就用嚟開開腸胃，落咗胡麻醬，帶和風味，後者就過過口癮，香脆不膩，兩者味道都唔錯喎。
熱盤
晌另一個角落，就放咗數款熱盤食物，例如咖喱魚蛋、蒜蓉焗蠔、蒜蓉西蘭花、燒牛脷、炸魷魚圈、炸餃子……等等，等你晌等待燒烤時有啲嘢到吓肚。
同樣又喺樣樣拎少少嚟試試，由於呢類食物感覺唔太多人拎，流量慢，影響咗啲質素，食落覺得有部份嘢攤耐咗，食味普普通通咁啦。
燒烤食物自助區
一大櫃已經叉好嘅串燒，乾淨企理，影相可能睇唔清喺啲咩，就一口氣介紹有咩串燒，包括羊肉、魚腐、雞翼、炸魚蛋、沙嗲雞、沙嗲豬、叉燒、豬腩肉、牛肋條、鴨胸、牛柳粒、牛舌粒、燒賣、菠菜丸、午餐肉、多春魚、台灣腸、紅腸、芝士腸、龍蝦丸、秋葵、秀珍菇、車厘茄、粟米、冬菇、菠蘿、翠玉瓜、棉花糖。
其實，除咗自助區，仲有啲點菜紙，不過，要留意喺有啲喺免費，如一啲主食、炒菜、小食及熱飲；另外有啲就需要付費，如個別燒烤及特色飲品。
蝶豆花菠蘿梳打 $6、藍金橘柚子梳打 $7
見啲特色梳打都喺6蚊、7蚊咋喎，抵飲喎，而且，啲配搭又幾特色，額外俾少少試吓都無妨啦。兩款梳打嘅色澤都好靚，好夢幻，而小弟就試咗後者，有啲柑味，又有啲柚子味，幾清爽，配串燒夾喎。
第一轉串燒
第一轉，好似平常去燒嘢食嘢咁，燒啲「快熟」產品，好似啲腸呀，丸呀之類。
個自轉烤爐最正喺佢會不停將啲串燒打轉，令串燒四面都燒得均勻，完全不費力就可以等住食，乾手淨腳。不過，雖然個爐可以一次過放到14串，實際由於有啲串燒較闊身，會互相撞到，但每每次燒到8、9串已好足夠。
啲丸腸類，首推最好食喺啲台灣腸，好有黑椒香，而菠菜丸亦幾特別，沾上少少孜然粉提味，效果立竿見影，惹味好多。
第二轉串燒
第二輪就梗喺燒吓啲肉類啦，皆因有咁多款式，況且，對比啲丸腸類及蔬菜類，叫做回本嘢嘛。
第三轉串燒
真心覺得啲肉類幾好食，當然要再下一城，所以，第3轉都都喺肉類，試埋之前一轉未試過嘅款式。
由於肉類都喺醃過晒，又入味，所以，燒好之後我就覺得唔需要再沾咩調味料。啲牛柳粒、牛肋條好正，又腍又有肉香，羊肉更喺小弟「飛弗」啦；沙嗲雞及沙嗲豬亦喺心水，啲沙嗲好香、好惹味；此外，雞翼、叉燒、豬腩肉都好唔錯。
第4轉串燒
沙律、前菜、熱盤，再加3輪串燒，都真喺7、8乘飽，所以，第4轉都喺時候搵啲蔬菜類嚟增加啲纖維素。
燒菇菌不妨浸少少水先燒，無咁快乾，如果啲粟米有得加啲牛油落去燒就更加正；而燒過嘅菠蘿幾時都喺咁好食。
甜品
除咗大凍櫃有數款甜品外，近門口仲有座雪糕櫃，雖然只喺牛奶公司，支持吓本土啦，況且，牛奶公司啲嘢都唔差架。
甜點就揀咗啲馬卡龍、牛奶布丁、雪糕，再伴少少新鮮生果。啲馬卡龍出期地幾得喎，外層脆脆哋，裡面煙韌，牛奶布丁亦唔錯，帶有強勁嘅牛乳味；雪糕，當然揀最特別嘅紅豆味，同心水嘅芒果味啦，做完晒啲甜品，真心飽晒。
枱角貼上咪做大嘥鬼，雖然放題喺任食，但都做番個惜食之人。
細細個，一到入秋、放假，就同朋友去郊外燒嘢食，嗰時搞燒嘢食都幾煩架，要自己醃肉。大個啲，就有專賣燒烤包嘅鋪頭出現，一條龍服務方便好多。再後期啲，就進化到燒烤場，乜都唔使預備，俾錢就燒得，而家下，直頭燒烤都由個爐轉轉吓搞掂，仲可以「四季」燒烤添。
個人評分
味道：8/10
環境：7/10
服務：7/10
抵食：8/10
平均每人消費：HK$246
味道：8/10
環境：7/10
服務：7/10
抵食：8/10
平均每人消費：HK$246
餐廳資料：
自家燒吧
觀塘開源道62號駱駝漆大廈1座5樓C號舖
2338 1820
自家燒吧
觀塘開源道62號駱駝漆大廈1座5樓C號舖
2338 1820
沒有留言:
發佈留言