三餐冰室 Sam Chaan Cafe：一日．三餐

上次送老婆返興趣班前，一齊去食咗餐簡單嘅泰國菜，今晚，同樣送佢返學，但就再簡簡單單食茶記，因為佢晌漆咸圍工聯會上堂，街口就有家茶記「三餐冰室」。雖然話喺茶記咋，但依家啲茶記出品都好有水準架，而且，勝在選擇多，又平靚正，喺唔少人一日三餐嘅選擇，當然，今次喺小弟第一次到訪「三餐」。

呢一家茶記，就明顯大玩懷舊，由入門口刻，到室內各處，都放咗好多港人集體回憶嘅擺設，如西瓜波做嘅吊燈啦、舊式鋅鐵信箱、天花板畫有跳飛機圖案啦，統統都喺打卡位。

整體室內環境光猛，兩側都喺落地大玻璃，座位又無一般茶記安排得咁逼，所以，空間感可算充足。

見個主餐牌背頁同有一幅牆畫都喺一樣，問個究竟，原來堅喺沙田瀝源邨嘅一個場景。

主餐牌比較簡精，一張A4紙就印晒出嚟，睇得出店主喺想貴精不貴多，其實，尤其新開嘅餐廳，做好啲出品，慢慢先再加新嘢都未遲。而食物嘅類別包括三餐常餐、三餐焗飯、馬來咖喱、鐵板扒餐4大類別。

此外，牆上仲掛有三餐推介，相信呢幾款都喺店家嘅特別招牌菜式，大致上大部份嘢定價都唔算貴。基本上，所有嘢都以套餐形式供應，故已包餐飲，可選擇加$6-$12轉要其他飲品。而點鐵板扒餐，就多奉送餐湯，點海南雞飯嘅話，就多包一客中湯。

至於飲品，就印晌枱上，已列明散點及餐飲轉配價。

基本餐具、調味料都早已放晌枱上，自由取用。

午餐肉粒羅宋湯通粉 $46

老婆就較喜歡濕濕哋嘅菜式，又比較鍾意飲湯，呢個羅宋湯通粉就最啱佢，雖然佢偏素唔太食肉，啲午餐肉粒就由小弟處決。嘩！個通粉成鍋咁上，都幾大份量吓，個湯夠晒濃郁，既有蕃茄酸香，又帶點醒神嘅辣勁，有種越食越開胃嘅感覺，啲通粉又無話煮過籠，整體確喺唔錯。

經典焗豬扒飯 $72

焗豬呢款焗飯，相信喺唔少人嘅至愛，小弟都喜歡食。碟焗豬熱辣熨手，先試試啲飯，炒飯底，飯粒爽身分明；面頭嘅蕃茄醬，酸香鮮活，搭埋半溶嘅芝士，味道調校得啱啱好；豬扒就唔喺一大塊過，缺點就喺無咁有睇頭，但好處就唔使切咁麻煩，醃得入味，肉質都頗鬆化，整體確喺有水準嘅焗豬。

熱檸水、奶茶紅豆冰 +$12（單點價$28）

老婆清清哋要熱檸水就唔多講，小弟就一次過滿足兩個願望，就喺奶茶及紅豆冰，上次晌深水埗嘅「雪山冰廳」親友已經讚呢款新特飲，今次就輪到我試試。茶記沖嘅奶茶一向都唔差得去邊，而「三餐」嘅茶底唔錯，夠晒香，又唔會過甜，兼且勁多紅豆，煲得夠綿，又飽滿清甜。

每個月第一個星期日都會出開嚟呢頭，下次有機會就試吓佢哋啲午餐先，因為，佢個三餐三蛋飯同招牌牛魔王焗飯似乎幾有賣點。

個人評分
味道：8/10
環境：7/10
服務：8/10
抵食：8/10
平均每人消費：HK$65

餐廳資料：
三餐冰室 Sam Chaan Cafe
尖沙咀漆咸道南115號達成商業大廈地下
2130 9302