太平洋咖啡 Pacific Coffee Company：消暑梳打

呢排真喺日日熱到爆，過開荃灣Ikea睇啲嘢，本來都想買杯台式冰茶邊行邊飲，不過，諗諗吓，索性不如搵個「竇」攤抖吓。結果，經過中染大廈嘅「Pacific Coffee」，食埋個下午茶，打吓躉，慢活一下，先再起行。

雖然荃灣久唔久都會過嚟，但呢一邊就真喺較少行到，而呢家Pacific Coffee就更喺第一次光顧。依家香港人對呢類中檔消費嘅咖啡店都好接受，所以，眼見真喺坐滿晒人。

早餐飲咗咖啡，所以，依次就無點咖啡，反而試咗款新梳打凍飲，共有兩款口味：薄荷藍莓梳打及薄荷紅西柚梳打。

薄荷紅西柚梳打 $42

喜歡紅西柚陣味多啲，所以，揀咗薄荷紅西柚梳打，賣相晶瑩剔透，望見都透心涼。晌等候期間，跟店員傾開，原來喺用咗意大利有汽礦泉水嚟製作，加入紅西柚果漿，攪勻後入口，酸酸甜甜嘅紅西柚味道特別爽，仲帶有薄荷嘅香氣，飲落裡面仲有啲清爽嘅啫喱粒，非常解暑。

上文都講話嚟順便下午茶啦，所以，揀番款甜品襯吓。甜點方面，放晒晌餅櫃下層一眼睇晒，共6款選擇。

甘筍合桃蛋糕 $30

相對地，幾款芝士蛋糕較多食，檸檬撻亦於早前就試過，所以，相中較少食嘅甘筍蛋糕。甘筍蛋糕糕身本身加入唔少甘筍幼粒，口感都會比較實淨啲，唔會食完好似陣風咁，而中間及面層嘅忌廉芝士，鹹香挺身，都幾夾甘筍蛋糕，而最正喺面層鋪滿脆口嘅合桃粒，增加「脆」味。

有時有啲嘢真喺興之所至，今回都算喺興之所至嘆住冷氣嚟個下午茶，竭一竭，輕鬆一下。

個人評分
味道：8/10
環境：8/10
服務：7/10
抵食：7/10
平均每人消費：HK$72

餐廳資料：
太平洋咖啡 Pacific Coffee Company
荃灣青山公路荃灣段388號中染大廈1樓114號舖

2877 0391