台灣麵 Taiwan Kitchen：麵麵相覷

同啲朋友過到嚟太子「始創中心」搵食，本來原意喺去「紅蔥頭」，但竟然遇着內部裝修，繼而到地庫嘅「台灣麵」食吓台灣嘢。近年，台菜，尤其主打台灣麵嘅食店，晌香港都開咗唔少，相信競爭都幾大。而「台灣麵」晌好多年前都到訪過荃灣店，所以，都知佢哋晌香港屹立咗好多年，能做到咁耐，自有一定嘅實力。

鋪面喺開放式，餐廳左邊兼營外賣茶飲，喺聰明嘅做法，而用餐就晌右邊。一入到去，感覺裝修都頗有特色，掛有多幅大型嘅台灣夜景相，但最吸晴就梗喺放咗好多天燈嘅天花裝飾啦。

坐落，就見枱上嘅餐墊紙有印出多種台式小食，啱嘅，就不妨點啲試試。

嚟得食晏，主要就喺睇午餐餐牌，基本上分兩大類，一類喺午餐，但都分兩個組別，一個喺湯麵飯套餐（配是日小食），另一個喺小炒客飯套餐，定價由$55-$68，無加一，兩組都配基本熱飲，但就可以加錢轉其他飲品。

另一類就叫做雙排雙格餐，又喺分兩組，不過就可以晌兩組嘅菜式中作自由配搭，簡單嚟講就喺一個人一次過可以試到兩款嘢，定價由$65-$72，同樣包基本熱飲，可以加錢轉其他飲品。

而飲品選項都好多元化，台式、沙冰、特飲、港式……等等。我哋就覺得加$4轉台式飲品喺最划算嘅選擇。

本來，有張「走飲管」嘅單張夾晌餐牌度，仲講明唔會主動俾塑膠飲管，不過，無論小弟嘅珍珠奶茶，抑或友人嘅凍飲，都一早插晒飲管，真喺上有政策，下有對策。

是日小食

上文都講過，午餐嘅湯麵飯套餐類別會配上是日小食，呢次所見，就有涼拌海帶絲及涼拌小青瓜，兩款都做得清爽、開胃，但個人較喜歡前者，因為平常較少食嘛！

鹵水鴨舌 $38

隨咗套餐所附帶送嘅涼拌小食，我哋仲嗌咗一客鹵水鴨舌試試。鴨舌其實肉唔多，純過吓口癮，然而，個人就覺得鹵水唔喺好夠入味啫。

A1. 紅燒牛肉麵 $62

老友食得少少辣吓，點咗個紅燒嘅。外觀睇落已覺得好大碗吓，麵底多，牛肉就更多，件件都好大條，用上半筋半肉嘅牛展位。呢個淨睇相先，等陣先分享味道喺點。

A2. 台式三寶麵 $66

小弟多心，要款三寶麵，因為除咗有牛肉，仲有牛筋同牛肚，一次過多試幾款部位。同樣，一樣喺咁大碗，仲伴有唔少酸菜同蔥花。

台灣牛肉麵特色之一喺個牛骨湯，先飲啖，果然濃而不濁，可以用醇厚嚟形容，飲咗都唔會覺口渴。而麵條較粗身，耐浸而不易腍，咬落極具咬口，柔韌性強。

半筋半肉嘅牛展位，炆得軟腍而鬆化，又有肉香，夠晒入味；牛肚則帶點爽口感，牛筋呢？非常腍滑，卻有種啜口嘅感覺，最難得喺滷得入味。

A6. 鹽酥雞扒肉燥飯 $68

啲鹽酥雞扒唔喺超巨型嗰啲，好似啲日式吉列豬扒咁形，不過，外層只用脆漿，無再沾上麵包爆，但就一樣咁脆口，而且，層脆漿都做得幾夠薄；雞扒入口肉嫩多汁，唔會又乾又嚡，食食哋認真唔錯。雞扒之下，仲有啲肉燥，用佢拌飯，令味道變得更香。

B1. 甜酸糖醋魚塊 $62

如果點小炒客飯套餐，會包一碗例湯，是日例湯喺合掌瓜，友人話普普通通咁啦。至於個甜酸糖醋魚塊，以一人份量而言，魚塊真喺有唔少，質感嫩滑，糖醋嘅甜酸度啱啱好，唔太嗆喉。

寶島珍珠奶茶 +$4

上文都講轉飲台式飲品最抵換，而當中就以珍珠奶茶喺最心水。茶底幾香，口感醇厚，珍珠口感煙韌，難得師傅無手緊，底下有唔少珍珠。

鹹柑桔話梅蜜 +$4

呢杯唔喺凍檸茶，而喺鹹柑桔話梅蜜，友人話好唔錯喎，鹹柑桔嘅味道好出，再飲落，慢慢滲出話梅嘅酸甜味道，感覺非常好，揾鹽酥雞扒喺晒夾得到。

金桔檸檬蜜 +$4

友人簡單兩個字總結咗杯嘢嘅水平，就喺：好流，感覺好似糖水溝出嚟，實際就唔知啦，但味道確喺好普通。

椰香芝麻奶露 +$4

友人話對呢杯芝麻奶露好有期望架，只不過，飲到尾都覺得無乜椰子味，反倒芝麻味就幾OK。但有一點值得一讚，佢哋嘅凍飲，喺唔加冰，唔會越飲越淡，故亦唔會過於太冰凍。

見佢個主餐牌都唔喺好大份，又放埋晌枱面，影埋出嚟俾大家參考吓。

無論食物或飲品，都有好有唔好，未做到樣樣皆精，仍有唔少改善空間，所以，整體嚟講，算喺咁啦。但服務，就屬中下，啲高級嘅求其擺低啲嘢食就走咗去，問多句喺乜都好似好唔耐煩咁，汗顏，我哋只好面面相覷，反而，低層啲嘅店員仲有禮貌好多。

個人評分
味道：8/10
環境：7/10
服務：6/10
抵食：7/10
平均每人消費：HK$78

餐廳資料：
台灣麵 Taiwan Kitchen
太子彌敦道750號始創中心B1樓B02-B06號舖
2537 3821