除地下，仲有樓上，當然都喺以卡位為主。行到尾仲有個房，夠私隱，不過，當晚有客訂咗房，未有機會睇睇個房有多大。
點解友人會推介呢間小店？原因有二，第一喺店主有做海鮮批發，所以，來貨自不然可以做到平啲靚啲。第二喺佢哋專注做一款海鮮蒸汽鍋套餐，足10款海鮮，送埋燉湯、蔬菜、糖水，但只喺賣$288一位，無加一添，如果剪下單張嘅優惠券，就仲慳多$20。
枱邊掛有啲調味料、牙籤、紙巾，其實喺俾早、午市啲客用。
到晚市食蒸汽鍋，會每人另外送上醬料一份，包括：豉油、蒜蓉、辣椒碎及日本芥末，最正喺唔會晌呢啲位度乘機收你十蚊八蚊醬油費，出面好多餐廳晌呢啲位抽得就抽。不過，食得蒸汽鍋，都以鮮味為上，我都無乜點用過。如果環保啲，不如講俾啲客知需要時先送上。
依度嘅蒸汽鍋玩法喺逐樣蒸，所以，落好單就會隨即捧上10層不銹鋼蒸籠，由上而下已按套餐嘅次序，並按人頭數放好晒食材。
而座位旁，就貼有各類食物嘅建議蒸煮時間，更附有一個小型搖控器，不過，我哋都喺直接撳爐面嘅錶版仲便捷。跟住，就全自動波，自行按建議時間逐樣蒸。
是日精選燉湯
先嚟一盅盅嘅燉湯俾客人潤吓喉嚨，而今晚所飲嘅喺蟲草花燉瘦肉，盅內非常之多料，味道幾清甜，感覺都幾潤。
蒜蓉粉絲蒸波士頓龍蝦
首發喺波士頓龍蝦出場，睇落就非常新鮮，蝦肉晶瑩，按建議蒸佢6分鐘，個爐有響鬧提醒，不過就細聲咗啲，但錶版有倒數顯示，都唔使擔心蒸過籠。
蒜蓉粉絲蒸喺指定，特別喺鋪上嘅都喺金蒜，故入口粉絲更香蒜味，不過，卻無冚過龍蝦肉嘅鮮味，隻龍蝦確有質素。
果皮蒸十頭鮮鮑魚
款式可以揀原隻或鎅花，其實，我都唔喺好知點為止鎅花，不過，心理上都喺覺得原隻好，配以果皮，喺穩穩陣陣嘅處理手法。
隻鮮鮑魚都幾大隻吓，鋪上絲絲果皮，其實果皮味就唔喺好重，然而，啲飽魚口感咬落有韌勁之餘，亦有彈牙感，鮑咪鮮甜。
豉汁蒸大鱔
因為稍後登場嘅筒魷揀咗梅子，所以，大鱔就選豉汁蒸，份量方面，每人都分到3嚿大鱔，兼且算喺厚切架。
睇啲鱔塗滿豉汁，當然夠晒惹味啦，而啲鱔正就正在肉質有點彈牙外，更充滿油香，非常油潤。
清蒸海蝦
見佢就咁寫住海蝦，以為都喺普通嘢，視乎俾嘅份量多唔多，點知，嚟嘅都喺有成隻手掌大嘅大海蝦，非常有睇頭，而且，肯定喺新鮮，因為部份仲紮紮跳。
清蒸，就最能食到其鮮甜味，而且，唔喺靚貨，都唔敢以清蒸奉客啦。啲蝦肉質十分爽口，味道鮮甜，沾少少辣椒豉油已經好突出番其鮮味。
清蒸花尾龍躉
龍躉可以揀清蒸或刴椒蒸，盡可能我都會揀清蒸，因為，啲海鮮靚唔靚，清蒸就最易食得出。睇見啲魚肉，色澤新鮮有光澤，唔會暗暗啞啞。
一人分到幾嚿魚肉，雖然份量唔多，但啲魚肉入口極之嫩滑魚味濃，無「揸流攤」喎。
油鹽水蒸時令大蜆
食咗咁多道海鮮，你就會發覺佢哋喺重質不重量，所以，嚟到時令大蜆，無花無假堅大隻。講明油鹽水蒸，咁就要搵多隻碟載起佢。
啲大蜆蒸得啱啱好，肉質爽口，味道清甜，最緊要喺半粒沙都無，沾丁點豉油，鮮味更突出。千祈唔好漏咗飲埋殼內嘅汁，勁鮮甜呀！
梅菜蒸菜心
如果大家有留意就見到每一籠海鮮都會配搭唔同嘅蔬菜，有粟米、絲瓜、篙筍、南瓜……等等，等客人吸收到唔同嘅營養外，更唔覺唔覺食到大量纖維素。與此同時，更額外加一道梅菜蒸菜心。
平常食菜心，白灼加蠔油，蒜蓉炒，搵梅菜蒸都喺第一次，但效果出奇地好。一來啲菜心夠嫩，唔會咬到一口渣，二來啲梅菜無過鹹，反而頗清甜。
蒜蓉蒸扇貝蟶子皇
蒸海鮮點可以無扇貝、蟶子皇份架？雖然蟶子皇未喺大到成呎長嗰啲，但兩者睇落都甚具質素，清靚白淨，唔會瘀瘀黑黑。
講到食味，真心覺得用料不賴，啲扇貝肉都幾爽，夾埋啲惹味蒜蓉，正呀；而蟶子皇肉質彈牙得嚟有咬口，但絕唔會韌到擦紙膠咁。
梅子蒸長筒魷
之前多道海鮮都喺伴以唔同蔬菜，但長筒魷就搵咗似喺陳村粉嚟墊一墊底，因為比較厚身啲，此外，亦選用梅子嚟蒸，因為食到近尾，覺得梅子酸酸甜甜有種幫助消化嘅感覺。
嘅魷魚蒸好後，配上梅子醬，確喺感覺清爽，而魷魚質感好軟腍。墊底嘅陳村粉本身都有點米香，淋上少少豉油已唔錯。
源記荷葉蒸蟹飯
街外好多蒸汽鍋都喺以粥底作結，但呢度就以蒸飯作結，而且，唔喺普通荷葉蒸飯，而喺加入肉蟹嘅荷葉蒸飯，自然升價十倍啦，兩人份嘅話就分到一隻大肉蟹。
雖然以荷葉墊咗底，但唔好太期望荷葉味好出，反而，飯底加咗少少金蒜，又有啲蟹汁滲落啲飯度，撈勻後，確喺幾好食；加上啲肉蟹好鮮甜，拆咗隻鉗，啖啖肉，爽呀！
精選糖水
店員話糖水晚晚都唔同，而是夜就喺紫米露，驚喜就無驚喜架啦，但質素叫做平穩，紫米煲得煙韌，整體夠綿，算喺有誠意。
不時會諗，香港算喺一個福地，物資從來不缺，但其實好多嘢都唔喺必然，就好似今晚，嚟到「金牌源記」，擺明唔喺食裝修，以咁嘅價錢，品嚐到咁多款鮮味海鮮，招呼又好，亦喺一種福氣。補充多句，其實食蒸汽鍋都喺自已蒸吓蒸吓，都唔使點招呼，但點解話佢哋招呼好呢？皆因我哋個蒸汽鍋半途拋錨，搞極都唔出蒸汽，位店員索性幫我哋晌隔離張空枱蒸完再拎俾我哋食，仲喺逐樣蒸、逐樣拎，真喺麻煩晒佢（其實，我哋喺唔介紹搬枱架）。
味道：9/10
環境：7/10
服務：8/10
抵食：9/10
平均每人消費：HK$268
環境：7/10
服務：8/10
抵食：9/10
平均每人消費：HK$268
餐廳資料：
金牌源記
荃灣鱟地坊62號地舖
2413 6844
金牌源記
荃灣鱟地坊62號地舖
2413 6844
沒有留言:
發佈留言