茶茶台式料理 Cha Cha：茶出美味緣由

早幾日先同啲朋友晌太子嘅「台灣麵」食完台菜，估唔到今晚又喺台菜之夜，不過，就喺台式嘅一人火鍋。近來，聽食友提及呢家台式料理店「茶茶台式料理」風評不俗，趁出開旺角上堂，同親友嚟食個快速火鍋填肚先。

咪睇個門面好似好窄，其實，個鋪位好長好深，而且，裝修簡約，一室以白色為主調，加上牆上擺放唔少裝飾，帶點文青風，又予人感覺清爽。

叫得嚟食台式一人一鍋，熱鍋就梗喺佢哋嘅主打啦。一共有6款熱鍋選擇，定價$108-$112，每款熱鍋都寫明有咩配料在內，更可以選唔同辣度，亦有配料或飯麵追加，不過，就無飲品加配優惠，另需加一服務費。

除熱鍋，仲有7款台式特選套餐，定價$65-$72，並包前菜一份，亦有飲品加配優惠，喺比較划算嘅選項。

此外，更提供多款小食及串燒，前者就台式啲，後者睇落就較為港式啲，但的確種類繁多。

順帶就講埋有咩飲品先，芝士茗茶、純茗茶、超級水果茶、奶香茗茶、特調茗茶及汽水……等等，不愁無選擇。

由於大部份嚟嘅客人主要都喺食其熱鍋，所以，店家會提供調味俾客人佐食，包括辣椒粉、豆瓣醬、蒜蓉及豉油。

藥膳雞鍋 $112

無論呢個藥膳雞鍋，抑或另一個蕃茄豬肉鍋，可見得份量都喺十足，而配菜正如餐牌所寫，都非常豐富，疊到高一高，但底下主要都喺墊咗大量娃娃菜。

先呷啖湯，得喎，個藥膳味幾突出，卻唔會太濃、太過嗆喉，可以講喺恰到好處，且有種健康養生之感；而啲雞件都俾得唔少，亦比預期嫩滑，雞味，絕唔喺啲雪藏貨，其他配料亦唔錯。

宜蘭蕃茄豚肉鍋 $108

豚肉鍋嘅份量亦都大足，配料跟藥膳雞鍋大同小異，但一樣墊滿一大鍋。兩個鍋都近乎同步奉上，唔會相隔太耐。

又喺先飲啖湯，湯色鮮紅，蕃茄味濃郁，感覺自然；豬肉亦好軟腍嫩滑，一啲都無肥膩感，啲蜆雖然細隻，但算鮮甜，豆腐滑溜有豆香，整體真喺幾好。

雖然下面喺以火酒糕嚟熱住個鍋，但夠火力，一樣會抽乾水，到咁上下店員就會問你使唔使加湯，啲湯睇得出喺清湯嚟，唔喺就咁加啲水俾你。而且，店員會小心下湯之餘，更會搵隻手擋一擋。

滷肉飯 $15

兩個鍋唔喺太夠我哋食，所以，追加咗一客滷肉飯。份量唔算細，叫得做一大碗，而且，鋪滿好多滷肉，啲滷肉做得香濃鬆化，不過就幾多肥肉位，怕肥膏嘅人就唔多啱；至於啲珍珠米，煮得頗香綿軟熟，配滷肉，簡單好味。

芝士凍頂烏龍茶 $33

小弟就稍微鍾意奶蓋系，覺得鹹鹹甜甜好神奇。首先，杯凍頂烏龍嘅茶底好幽香，茶味清純；而芝士奶蓋口感細滑，芝士味帶微微鹹香，之後再將兩者撈勻，風味十分獨特，令茶嘅質感更圓滑。

超級水果綠研 $37

親友大讚杯水果茶勁正，佢話個茶式好香，而內裡混雜了好多水果，如西瓜、香橙、熱情果、士多啤梨……等等，好有果香，味道清新，食住火鍋飲超級正！

雖然只喺試咗兩款熱鍋，感覺用料不頗，味道不俗。店員又成日提醒我哋小心鍋邊熱，又不時為我哋加湯，讓我哋都食得稱心滿意。

個人評分
味道：8/10
環境：8/10
服務：8/10
抵食：8/10
平均每人消費：HK$150

餐廳資料：
茶茶台式料理 Cha Cha
旺角豉油街60-104號鴻都大廈地下AB號舖
2327 3011