冬蔭NOODLE Tom Yum Noodle：冬山再起

老婆要出尖沙咀返啲興趣班，趁有空送佢返學之餘，自不然一齊食埋個早鳥晚餐。晌尖沙咀搵食，話易又得，話難又得，因為周街大把餐廳，難就難在太多，間間都想試咁。好似都有半年多無乜食泰菜，今晚餐飯就定咗食泰菜。

呢家「冬蔭Noodle」門面好醒目，入到去更加覺得裝潢好摩登，粉紅色嘅梳化椅已經夠搶眼啦，一邊植物牆裝咗五光十色嘅霓虹燈，勾畫出泰國代表物，表現出另類泰式風情。

坐落先發覺，原來餐廳好深，入面仲有一排位，而全店基本色調喺白磚牆配淺墨綠色牆身，加上光線柔和，望落去感覺頗舒服。

另外，好欣賞枱上擺放咗一條極富泰國工藝嘅織布作裝飾，加添泰式風情元素。

雖然店名用上「Noodle」一字，但翻開餐牌細看，豈止只得泰式麵條，其實，有好多泰式美食。當然正宗泰式湯粉條喺其主打之一，仲有嘅喺泰式飯品、主菜、沙律、小食、甜品及飲品。

順帶一提，枱上早已備有辣椒乾、辣椒醋、魚露，供客人品嚐泰式湯粉時用。

素春卷 $68

一見到個「素」字，乜都好，啱晒老婆。一客有5條之多，炸得外皮香脆唔油，內裡夾雜好多粉絲、椰菜絲、甘筍絲及木耳等，清新爽口；最正喺個甜酸醬，酸香醒胃。

泰式炒椰菜苗 $78

既然同老婆食飯，點選菜式時自然會就佢，再嚟多道素菜。其實，平常嘅椰菜佢真喺麻麻哋啱，尤其嗰啲炒到腍晒或白烚，但椰菜苗就當別論。啲椰菜苗色澤青翠，炒得火喉恰好，口感爽脆，加入咗豆板醬去炒，味道鹹香細緻。

泰式炒金邊粉 $78

真喺唔知叫好鍾意吖，定抑或真喺撞着咁啱，睇番自己嘅食評，以到訪泰菜館計，經常無意識下都點呢一道泰式炒金邊粉。份量唔少，金邊粉炒得濕潤唔餬，味道酸酸甜甜，除有大大隻鮮蝦外，仲有啲豆腐乾及蛋花碎，旁邊佐以花生碎、青檸，令食味更豐富。

甜蜜蜜蝶豆花茶 $35

平常老婆少嗌嘢飲，不過，見有款蝶豆花熱飲，幾適合就點選咗一杯。一小杯茶，但所落嘅蝶豆花份量唔少，故此嚟到已變為深藍色，本應加咗檸檬片後會變成紫色，但因太多花量就令到效果唔明顯。雖然，蝶豆花無乜味，但可有舒緩情緒之用。

龍眼冰 $28

呢排外間郁啲都三十幾度，有杯凍飲入口真喺約爽架，呢杯龍冰嘅糖水都幾夠清甜蜜潤，而且，裡面有好多龍眼肉，不過，食落就知喺罐頭貨一類，非用圓肉（龍眼乾）浸發，口感爽就爽喇，但稍欠龍眼嘅自然清甜香味。

雖然我哋無試到佢哋啲湯粉，但所食到嘅幾樣出品都唔錯，加上招呼幾好，環境又舒適（當然，我哋嚟得早，人客唔算多），老婆就最鍾意個炒椰菜苗嘞！晌枱上，發現啲牙籤印有「荔園茶餐廳」嘅字樣，再翻查資料，原來呢個鋪位上手就喺做緊「荔園茶餐廳」，睇番啲舊食評，仲沿用番部份裝修，未知今次嘅「冬蔭Noodle」喺咪東山再起？希望能做出成績！

個人評分
味道：8/10
環境：8/10
服務：8/10
抵食：8/10
平均每人消費：HK$160

餐廳資料：
冬蔭NOODLE
尖沙咀加連威老道12-16號加連威大廈地下12號舖
3598 3022