雪山冰廳：細雪當年

對上一次同一班老友嚟「雪山冰廳」已經差唔多喺年半前嘅事，嗰次一棚人嚟就食晏，都喺叫啲特餐、午餐之類，今次因為過開嚟深水埗鴨寮街睇睇啲電話數據卡，就順便約啲親友食個便飯。地點揀咗「雪山冰廳」，一來位置上當然就佢哋啦，其實大家都喺晌深水埗大，都幫襯過「當年」嘅「雪山冰廳」，自然話題多多細說當年，二來茶記最好，夠多嘢揀，又平靚正。

「雪山冰廳」前身喺間「真懷舊」冰室，因為小弟都喺晌深水埗大，不過，結業後重開，就無走扮懷舊條線。全新裝修後，牆身白瓷磚，地板就街磚，加幅大魚躍噴畫，都幾型格架。

枱上有一本本嘅餐牌，但又大本，又反光，影出嚟嘅效果都麻麻。好彩有啲外賣單張攞，掃描後貼出嚟，仲更加一清二楚（註：部份價錢跟大餐牌有別，我諗應該以大餐牌為準）。概略望望你都見，選擇非常之多，亦有唔少特色嘢。早午晚多種套餐，就算散點叫碟頭飯，亦可以優惠價加配有飲品。

調味料、餐具早已放齊晌枱面，唔使多口問侍應，方便客人，又唔使令員工加重多啲功夫。

避風塘生炸脾 $28

生炸脾喺呢度嘅名物，之前無試過，今次就一於會一會佢。隻雞脾非常之大件，即叫即炸，所以，上枱嘅時候喺熱辣辣，頗為燙手。入口外皮好香脆，又唔會覺得好油膩，雖然應該喺雪藏貨，但肉質唔會覺得「嚡烚烚」，兼且，每口都充滿炸蒜香，惹味得嚟辣辣哋。

日本櫻花蝦炒蛋配牛乳厚多士 $28

上次食特餐時都已經試過，覺得幾有特色，所以推介俾大家。炒蛋唔會炒得過老，有少少滑蛋嘅效果，蛋內混有好多櫻花蝦，所以，帶點點鹹香味及脆卜卜嘅口感，而厚多士唔喺普通貨色，用上丹麥方包，多咗一陣陣酥香感。

榛子醬西多士 $28

據講都喺店內人氣產品，上次想食而無試，今回點都要試一試。其實，只喺由花生醬改為用咗榛子醬而已，未必話好大驚喜，不過，食落一樣覺得幾夾，西多士炸得鬆脆，內裡採咗厚厚嘅榛子醬，故榛子香味都幾突出。

芝士焗波士頓龍蝦海鮮飯 $108

餐牌中有一系統創意龍蝦配搭，有配公司通粉、喇沙摻摻及焗飯，標明會用上半隻波士頓龍蝦，感覺吸引，而我哋揀咗焗飯，都只喺$108，值搏率高。個焗飯製作需時，焗得好靚仔，嚟到唔止大份，加埋其他海鮮料，真喺好有睇頭。

既然喺焗飯，自然用上炒飯底，飯粒炒得乾身爽口，而波士頓龍蝦大大件擺在眼前，童叟無欺，啲肉幾爽口，蝦頭位亦有少少膏；其餘海鮮料有青口、魚柳、魷魚、蟹柳，竟然仲有啲鮑片添，認真夠誠意，好食兼抵食。

樽仔奶茶 +$15（正價$25）

去茶記，都喺飲熱奶茶為首選，而佢哋出咗款樽仔奶茶，其他就即喺凍奶茶，不過，預早雪凍唔使加冰，故飲到尾茶味都唔會因冰粒變淡，再者，支樽仔奶茶嘅茶底都幾香，又無話過甜，實在沖得唔錯。

港式茶走紅豆冰 $25

親友都鍾意飲奶茶，不過，亦鍾意紅豆冰，呢一款港式茶走紅豆冰就滿足晒佢兩個喜好啦。茶底夠香，紅豆就飽滿清甜，佢話就好鍾意喇。

雖然時隔年半再嚟，環境就當然無變，但食物仍保持水準，做得有誠意，而招呼亦無一般茶記嘅陋習，啲阿哥阿姐幾鬼好禮貌，怪不得有唔少街坊客支持。

個人評分
味道：8/10
環境：7/10
服務：8/10
抵食：8/10
平均每人消費：HK$78

餐廳資料：
雪山冰廳
深水埗青山道62D號地舖
2386 5025