微酵烘焙 Share le Pain：骯髒大道

雖然都半年前，但食過一次「 微酵烘焙」嘅「髒髒之胖」，印象甚深，所以，知佢九龍開咗新店，都想重溫其滋味。而今次個標題就語帶「雙」關，第一就喺估唔到佢嘅骯髒包咁好食，殺出一條血路，第二就喺佢哋其他嘅出品都有質素，受客人歡迎，否則都唔能夠再晌九龍及新界開店，迎嚟一條康莊大道。

由於店家主打特色軟歐包及茶飲，所以，旺角店跟之前到訪銅鑼灣店嘅裝修差唔多，一邊喺製作茶飲，另一邊就擺放多種特色麵包。全店以白、金為主色調，簡潔明亮，讓人睇見都好醒神。

今次主要嚟買麵包，所以，先介紹一下麵包櫃呢邊。唔使多講，主打都喺3款骯髒包及人氣嘅爆漿珍奶軟歐。

原來，依家仲出咗多款新品，如賣相抵死嘅章魚大哥，仿真極高嘅薯頭，甚具台風嘅香軟肉鬆包……等等。我就最鍾意佢哋除咗各款包有名牌介紹之外，簡介埋有咩基本成份，以及當中嘅特色，甚至講明喺蛋奶素定葷食，方便一啲素食者。

不過，未講啲包之前，原來買麵包嘅話，飲品會有8折優，買一個包，就有一杯飲品優惠，如此類推。

呢度有好多特色茶飲，頗多喺別具特色，類別涵蓋紅茶、拿鐵、果茶、奶蓋、珍珠奶茶、花草茶……等等，用上世界唔同地區嘅茶葉製作，定價$25-$40。最好就喺甜度有得揀，由正常嘅可減到無糖都得。

珍珠鮮奶茶 $36

見佢哋鋪面推廣緊呢一款以鮮奶油製作嘅珍珠奶茶，賣相又吸引，再者，小弟都好一陣子無飲過珍珠奶茶，所以，試番杯喺點。

色澤一層層，實物嘅賣相就好吸晴喇，價目牌註明喺用上台灣及斯里蘭卡茶葉製作，所以，茶底入口幾芳香，而面頭嘅香緹（我都喺睇佢塊廣告版先識呢個台灣用語）喺由植物鮮奶油打成，攪勻杯奶茶，堅喺滑溜好多，但又比預期中無咁膩，底下嘅珍珠煙韌咬口，有陣陣嘅黑糖嘅純香。

如無特別要求，店員都會細心將每個麵包分別袋好，但薯頭同香菇麻薯包放埋一齊都無問題，其他就要分開，尤其髒髒之胖。特登影埋個包裝袋，因為袋背印有唔少溫馨提示，建議你點樣保存及回烤喺最好嘅方法。

香軟肉鬆包 $28

由於佢哋所賣嘅都喺軟歐包，非港式鬆軟嘅麵包，所以，一般都喺挺身，口感帶煙韌，唔會一陣風咁食完。包面鋪上滿滿嘅台灣海苔肉鬆，有份鹹香感，包內則塗上一啲特色醬，其實食落都唔喺好知乜，但甜甜哋咁，平衡番啲肉鬆嘅鹹味。

薯頭 $24

霎眼望埋去，真喺堅被佢呃到，九乘九似足個薯仔。外層嘅可可粉只喺輕輕沾上，唔似髒髒之胖嗰啲咁搶味。而切開一睇，裡面有薯仔粒、粟米、火腿、洋蔥，幾有咬口，食落亦頗有飽肚感。

香菇麻糬包 $22

呢個就專登揀嚟俾老婆食，食偏素嘛，應該會鍾意。同樣，以外型酷似大蘑菇為賣點，確喺幾可亂真。而裡面塞滿芝麻醬及麻糬，屬甜包，整體嘅口感煙煙韌韌咁。

髒髒之胖 $39

對比上次，原來俏俏地加咗少少價，不過，我都仲喺覺得抵食，喺值得翻兜再翻兜。拎上手，依然好墜手，用料又十足，一口咬落去，包面灑滿厚厚嘅可可粉，加埋有一層好似脆皮咁嘅70%比利時松露朱古力，嗰朕朱古力嘅濃郁香味一湧而出，味道帶點甘苦，口感極有「軟歐」嘅個性，咬落韌韌哋，卻喺軟綿綿，搭埋忌廉芝士嘅鹹香，不愧人氣之作。

紅酒朱古力吐司 $30

見到呢款吐司都好有特色，要埋嚟做早餐都好。據名牌介紹，吐司喺以紅酒酵母嚟發酵，順帶一提，「微酵烘焙」嘅麵包都喺以天然酵母嚟發酵，相對更健康。而呢款吐司，口感軟熟，細意嗒落，又確喺有微微紅酒香，包心混入咗朱古力醬及朱古力粒，令味道更豐厚。故此，髒髒之胖及紅酒朱古力吐司喺朱古力死粉嘅必食推介。

當然唔可以跟啲街坊麵包鋪作比較，但依家有唔少人追求健康，希望用料靚之餘又要天然，亦有唔少人想試試啲高質素嘅包款，希望富特色之餘又要少見。平常早餐不時都喺以麵包為主角，今次，既然一次過入手咁多包款，就成為晚餐嘅主角，配上老婆煮嘅南瓜湯。

個人評分
味道：8/10
環境：7/10
服務：8/10
抵食：8/10
平均每人消費：HK$40

餐廳資料：
微酵烘焙 Share le Pain
旺角太子道西193號MOKO新世紀廣場MTR層M47及M48號舖
3705 2599