踏入店內，裝修簡潔明亮，一室白磚牆，配木枱椅，加上個鋪本身樓底都高，所以，少咗一般好似綠林呀、松記呀、許留山呀嗰啲擠逼感。牆上一句：「Life is short, Make it sweet」相信喺店主嘅心聲，好認同，就正如將Stressed（緊張的、壓力的）反過嚟就喺Desserts，讓甜點成為你壓力嘅心靈舒緩劑。
晌餐牌封面，已講到明主打港式及新派甜品，翻閱一轉，選擇非常之多，部份款式更附上參考圖片，而種類方面包括：椰皇系列、滋補燉糖水系列、榴槤系列、芒果系列、精選系列、綿綿冰系列、芋圓系列、窩夫 / 拿破崙系列、天使系列、西米露 / 涼粉 / 黑珍珠 / 紫米露系列、中式暖意糖水系列及多種飲品。
此外，更兼營炸燒賣、日式炸雞球、炸薯條幫，當喺補吓啲非繁忙時段嘅收入。順帶一提，佢哋提供嘅雪糕球口味都寧舍多，有成7款選擇。
我哋最後點咗4款甜點，最讚佢哋喺4款甜點都喺晌差唔多時間出到，唔會話隔得太耐，最怕喺朋友食完都未出到其他嘅，故此，難得可以先嚟一張大合照，非常吸引喔！
椰皇蛋白燉桃膠 $52
依家晌出面唔少甜品店都有賣椰皇燉蛋白，而呢度就升級有營版，加入桃膠，此外，仲混有西米及小丸子，滿載滋味熱辣辣咁登場。如果對椰皇、桃膠有認識嘅話，都知整呢道甜點喺會繁複啲、程序又多啲，例如椰皇要先蒸軟啲椰肉備用，桃膠要花時間浸發、除雜質，所以，賣$52真喺物有所值。
啲桃膠雖然無味，但跟埋啲椰奶入口，即時變得叫唔同，而爽爽哋嘅桃膠、西米、丸子一齊入口，口感豐富，當然，桃膠嘅功效媲美燕窩，營養喺其賣點；而燉蛋白口感非常滑溜，此外，亦唔可以錯過啲椰皇肉，好清甜架。
南北杏海底椰燉雪梨 $46
燉雪梨就比較喺傳統啲嘅中式糖水，但一樣做得有板有眼，用料認真。原個雪梨去芯，再加有南北杏、海底椰、大粒紅棗、杞子去燉，燉足幾多個鐘就唔知，但送到嚟熱辣熨手，糖水嘅色澤醇和不濁。
先呷喺糖水，感覺非常滋潤，友人誇張到話潤心又潤肺。而雪梨肉清甜到不得了，完全無澀嘅感覺，秋天揀呢個，相信感覺更正。
榴槤至尊 $50
眾多甜點中，呢個肯定喺小弟嘅心水啦，又榴槤雪糕，又榴槤肉，梗定喺雙重滋味。除此，從餐牌所描述，仲有西米、涼粉、黑珍珠（奇亞籽）、紅豆，喺十分豐富嘅組合，熱切期待。送到上枱，份量真喺唔得笑，有成一大碗，三幾個人「些牙」都夠呀！
有咁多食材撈埋一齊，加上啲紅豆又好清甜、軟腍，配個爽口嘅涼粉，以及西米、黑珍珠嘅咬口，口感極富層次；至於啲榴槤果肉，堅掂呀，榴槤味既濃且香，口感軟綿，而榴槤雪糕亦唔失禮，一樣有番咁上下濃味，冰涼好食。
芒果拿破崙配抹茶雪糕 $49
友人喺拿破崙死粉，一起手就指定點呢道甜品，其實，我都建議點，因為，拿破崙好睇到師傅晌搓酥皮及烘焙嘅手勢。佢哋嘅拿破崙唔會一件疊起晒，而喺分開嚟，所以，可以逐層拆開嚟食，更亮點喺勁多芒果粒囉，令外觀更金黃好睇。
先試試啲千層酥皮，真喺酥脆得一咬落去就咔嚓一聲就斷開，亦甚富牛油香味；雖然唔喺用吉士，但啲忌廉都打得十分柔滑，配合甜度甚高嘅芒果肉，再加少少甘苦而幽香嘅抹茶雪糕，真喺無乜好挑剔。
世界各地，都有其代表性嘅甜品，意大利嘅有意大利芝士餅、意式奶凍，法國嘅有法式焦糖燉蛋、法式班戟，美國嘅有紐約芝士餅，日本嘅有大福、蕨餅……，例子多不勝數。咁香港呢？未有票選過邊樣先喺本土代表，但無論港式嘅舊派定新派，有着代表香港人文化多元、接受力強、不斷求變嘅精神。曾經有次晌甜品店聽過隔離對情侶咁講：「嘩！成$50碗糖水咁貴，我寧願食個個梳乎理班戟嘞。」喺睇小我哋港式甜品？定喺祟洋？「大街小館」嘅甜點，真喺做得樣樣皆精！
個人評分
味道：9/10
環境：7/10
服務：8/10
抵食：8/10
平均每人消費：HK$50
味道：9/10
環境：7/10
服務：8/10
抵食：8/10
平均每人消費：HK$50
餐廳資料：
大街小館 Big Sweet House
佐敦吳松街93-103號德利樓地下C舖
6891 1801
大街小館 Big Sweet House
佐敦吳松街93-103號德利樓地下C舖
6891 1801
沒有留言:
發佈留言