餐廳佔二樓全層，一出電梯門就喺餐廳。跟上次嚟環境有啲唔同，依家牆身喺以白色加碎花為主調，襯以深啡色梳化椅或木椅，掛有唔少現代派啲油畫，裝修較時尚摩登。
最正喺安排坐晌近窗嘅卡位，既寬敞闊落，又放咗唔少咕，份外舒服。目測所見，有唔少鄉里幫襯，坐多陣已全場滿座，非常熱鬧，可見佢哋嘅印度菜水準應該唔差得去邊。
Mango Lassi
外面天氣開始變得炎熱，所以，既然餐飲有得揀甚有地道特色嘅Mango Lassi（芒果酸奶），當然喺揀佢啦。大大杯嘅芒果酸奶，以鮮芒果肉跟乳酪打成，入口有陣陣醒胃嘅乳酪酸香，又滲出濃郁而清甜嘅芒果味，口感豐厚「涼枕枕」，爽呀。
坐定定，飲咗兩啖芒果酸奶，喺時候介紹吓佢哋嘅自助食物有咩揀。食物分咗3張長枱擺放，第1張，見到啲沙律菜、特色醬就知大概喺啲前菜類。數一數（可能唔準架，因為有啲食物或名字都唔太識），計有紅腰豆蕃茄莎莎、胡椒脆餅、雜菜盤、雜豆盤、沙律菜、乳酪醬、青豆蓉、芒果醬、印式甜酸醬及雜菜辣醬。側邊就仲有Chicken Malai Tikka（印式烤雞）、Boti Kebab（雞肉卡巴）、Minty Roll（印式薄荷蔬菜卷，唔知可唔可以咁譯？）、Vegetable Tikki（蔬菜餅）。
第2張長枱要介紹嘅，喺比較主菜類嘅食物，計有Keema matar（免治肉青豆）、Butter Chicken（印式牛油雞）、Kadhai Paneer（辣印式芝士）、Corn Palak（粟米菠菜蓉）、Aloo Beans Masala（薯仔青豆馬沙拉）、Dal Tadka（扁豆咖喱）、Pulao Rice（印度炒飯）及Basmati Rice（印度皇飯）。
最後到枱所擺放嘅喺少少新鮮生果及印度甜品，老實講，印度甜品偏甜，口感亦怪怪，未必人人接受到。
薯仔班戟餅
未食自助餐食物前，侍應會先每枱客送上薯仔班戟餅，正名我就無問過，但見晌食物區有大廚即煎即送上俾客人。
每份班戟餅都伴上印式蕃茄醬及印式椰子醬，班戟外皮帶點脆口，裡面喺軟綿綿，添上少少醬汁，令味道變得豐富啲。
印度烤餅
除上述嘅班戟餅，仲會每枱自動送上一籃印度烤餅，唔使多介紹，大家都知道喺一陣用嚟蘸咖喱食啦。而烤餅口感煙韌，沾過咖喱，或配上豆蓉，就特別好食。
沙律、前菜
其實，計及以上兩樣咁澱粉質嘅嘢，都有一定嘅飽肚，所以，前後攞咗兩碟食物嚟試試，已經好足夠。第一碟就大多數喺啲沙律、前菜類，樣樣執啲，雜菜盤啲甘筍比較硬，而雜豆盤有啲鹹，其他嘅就好唔錯，最喜歡個乳酪醬，令人感覺好清爽，尤其依家啲悶熱天氣。
主食
第二碟一睇就知喺以肉類主食居多，啲印式烤雞、牛油雞、粟米菠菜蓉好好食，甚具特色，配合埋啲印式烤餅，越食越滋味。
生果、甜點
生果就唔點講啦，都喺正正常常大路嘅新鮮水果，碟邊啡紅色嘅叫Gulab Jamun（蜜汁圓球），偏甜嘅就肯定啦，但口感軟軟腍腍，都唔錯；不過，小橙色兜仔嗰樣嘢就真喺唔多啱口味，似似哋一件鬆糕吸滿糖水咁。
離開時，先留意到近電梯嘅一面牆掛咗唔少獎狀，原來餐廳獲得唔少獎項，好似Master Chef、旅發局嘅優質服務獎……等等。
仲有，不妨食粒薄荷糖清清口腔中嘅香料味先離開！晌邊度拎？就晌電梯旁嘅櫃枱。
雖然話喺自助餐，但當然唔可以跟我哋平時晌酒店嗰啲嚟比，但叫做多種印度菜式都能夠一次過試到，加上環境舒服，招呼又好，想輕輕鬆鬆食餐有特色嘅午餐，「Jashan」都喺一個唔錯嘅選擇。
個人評分
味道：8/10
環境：8/10
服務：8/10
抵食：7/10
平均每人消費：HK$150
味道：8/10
環境：8/10
服務：8/10
抵食：7/10
平均每人消費：HK$150
餐廳資料：
Jashan Celebrating Indian Cuisine
中環蘇豪荷李活道23號金珀苑1樓
3105 5300
Jashan Celebrating Indian Cuisine
中環蘇豪荷李活道23號金珀苑1樓
3105 5300
沒有留言:
發佈留言