Spade by Lassana：法式芝味

曾經試過Spade by Lassana嘅雪糕及甜品，尤其嗰個以丹麥方包所做嘅「野莓盛會」甜品，記憶猶新，旺角店因商場嘅發展改變而結業，實在可惜。不過，油塘店最近新出咗款芝士蛋糕，多謝朋友相贈，讓小弟有個「芝」味嘅下午茶。

圓形小木盒包裝設計簡樸，又有份田園味道，以牛油紙墊底，揸住對頭兩面紙邊，一抽就可以成個抽起，挺方便。不過，盒面標誌印得花花懞懞，睇唔清店名「Spade by Lassana」及蛋糕名字「Creme Brulee Cheesecake」，有啲影響外觀。

Creme Brulee Cheesecake $78

打開包裝盒，餅面金黃微焦，有種法式燉蛋嘅錯覺，原來喺以忌廉芝士蛋糕為基礎，再晌餅面加上一層即燒嘅焦糖，怪唔之得稱之為Creme Brulee Cheesecake，中文可稱為法式焦糖芝士蛋糕嗎？

咪睇佢細細個，非常墜手，夠晒4-6人食，一刀切落已感受到蛋糕心嘅綿密。因為收到蛋糕時已食得飽飽，未有即時享用，錯過咗如法式焦糖燉蛋嘅薄薄脆脆焦香口感，隔咗一日，面層嘅焦糖脆面軟化咗，而軟化嘅焦糖漿流到餅底下，別有一番滋味。

另外，芝士蛋糕嘅忌廉芝士味很濃郁，軟綿富口感，消化餅底餅夠薄。

可能堂食效果，即叫即燒焦糖脆面，效果較易保證到，但整體食得出好足料。無論點，將法式燉蛋嘅焦糖脆面融入芝士蛋糕中，其實頗有新意！ 

個人評分
味道：8/10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
Spade by Lassana
油塘高超道38號大本型地下G28號舖
2346 0828