環境格局唔算有咩特別好講，裝修簡簡單單，似西餐廳多啲，但勝在環境光猛，地方企理。牆上貼有雞煲、烤魚嘅大相，突出番店家嘅主打主題。
雖然話主要賣雞煲、烤魚，都唔喺獨沽兩味，醉雞煲、麻辣雞煲、香辣雞蟹煲外，仲有多款火鍋湯底，如四川麻辣、芫茜皮蛋；此外，烤魚鍋可揀桂花或海鯇，湯底更有蕃茄薯仔、雲南酸菜、四川麻辣或香辣蝦膏可揀，實在多元化。
揀好雞煲及魚鍋款式，自然焦點就落在配料紙身上，一大張A4紙，印備晒所有打鞭爐配料，究竟包括啲咩，你睇就好過我講喇。
麻辣雞煲 $138（半隻）/ $228（全隻）
為顧及大部份人嘅需要，我哋揀微辣，加上亦會叫烤魚鍋，所以，雞煲點半隻就夠晒。落單等無耐，雞煲就隨即送上，一陣陣香氣撲鼻，煲面鋪滿芫茜，唔喜歡食芫茜嘅朋友記得落單時叫走芫茜。
滾番起少少就可以食得，雖然唔知用邊雞種，但雞肉嫩滑肥美，既入味，又帶麻香，麻得嚟唔會太痺，由於喺微辣，少少辣而不失惹味，所以，無論雞肉抑或汁醬，都甚具水準。
烤海鯇魚鍋 $178（小邊）/ $238（大邊）
我哋人唔多，同樣要細邊就OK喇，湯底就要蕃茄薯仔，諗住食咗個麻辣雞煲，就搵蕃茄薯仔湯底中和吓。海鯇烤過之後，連同大量配菜，如豆卜、紫洋蔥、蕃茄、薯仔、芫茜一大盆捧嚟，再加蕃茄湯，邊滾邊食。
烤魚鍋第一次食，感覺幾得意，外皮烤燶過，喺唔食，食就食裡面啲肉，好香滑，而且挺鮮甜，更唔會有泥味。個湯頭可以就咁飲，濃郁而酸香醒胃，配料亦好新鮮。
食完雞煲及魚鍋，喺加湯打鞭爐嘅時候，店員知我哋揀咗微辣，就主動問我哋試唔試吓加辣，故此，就俾咗一小碗自家炒製嘅麻辣醬我哋，加湯之餘，再加入麻辣醬，個湯果然即時變得火辣辣，好辣嘅朋友當然會大呼過癮。
加拿大肥牛 $88（小）/$148（大）
店家嘅牛肉類選擇唔多，就只有加拿大肥牛一款，因為嚟得依度主要都喺食雞煲、魚鍋，火鍋配料都只喺「增值」配菜，所以，貴精就不貴多，果然，碟加拿大肥牛真喺唔錯，灼熟後，肉質鮮腍，夠肉味又帶油脂。
日本蠔 $68
一客有成8隻，而且，呎吋都唔細隻，隻隻肥嘟嘟，而且就算灼熟都唔會縮得好犀利，蠔味鮮甜，實在抵食。
芝士竹輪 $48
芝士丸、芝士腸食過無數次，依家進化埋芝士竹輪（獅子狗魚蛋），將芝士藏入竹輪裡面，一咬有爆漿嘅感覺，真喺好味過癮，值得推介。
芝心魚丸 $34
試完個芝士竹輪，再試個芝心魚丸，當然唔會再有咩驚喜，不過，雖然依啲乜丸物丸都喺來貨，但啲芝心丸食落仍有一定質素，魚丸彈牙，芝心軟綿。
脆炸響鈴 $25（小）/$42（大）
響鈴成為打鞭爐不可或缺嘅火鍋配料，不過，正如另一篇雞煲嘅食評提過，小弟鍾意食山根多過響鈴，可惜依度無。響鈴輕灼後，面層辣辣腍腍，內層香香脆脆。
牛栢葉 $25（小）/$42（大）
牛栢葉、竹笙都喺啲味淡靠汁醬提味之食材，先嚟一客牛栢葉，放晌雞煲等佢索滿汁，又爽又辣，刺激呀。
野生竹笙 $25（小）/$42（大）
竹笙本身無乜味，食其爽口，其次，貪佢本身有益健康，多食無妨。
松葉蟹棒 $30（小）/$52（大）
無普通蟹柳咁粉，啲蟹棒食落一絲絲，個人覺得晌雞煲嗰邊淥會冚晒啲味，所以，晌魚鍋嗰邊效果理想啲，再者，魚鍋嗰邊火無咁猛，唔會太易淥散晒啲蟹棒。
蔬菜拼盤 $38
蔬菜拼盤一籃有生菜、白蘿蔔、蓮藕、黑木耳及大蕃茄，據店員講，次次唔同，有咩新鮮蔬菜就執咩菜。
娃娃菜 $20（小）/$34（大）
朋友都喺覺得一客蔬菜拼盤唔多夠，追加一份細嘅娃娃菜，雖然娃娃菜唔喺咩貴價嘢，但小店一樣務求用料新鮮。
紅薯粉 $34
與其又喺米線、公仔麵，就不如要一客紅薯粉作為最後墊飽大家個肚之用，紅薯粉入口煙韌爽滑，配個蕃茄湯底，實在不錯。
飲品
打鞭爐又點可能唔飲住嘢，前前後後又加多寶，又蜂蜜綠茶，汽水$12罐，其他清熱氣飲品都只喺$13-$16，取價都算合理。
雞煲及魚鍋都各有特色，前者食其香惹，後者食其鮮滑，再者，感受到店家揀料用心，招呼又到位，定價唔會太貴，相信小店有更好「前」途，希望小店繼續努力！
個人評分
味道：9/10
環境：7/10
服務：8/10
抵食：9/10
平均每人消費：HK$180
味道：9/10
環境：7/10
服務：8/10
抵食：9/10
平均每人消費：HK$180
餐廳資料：
前家樂餐廳火鍋店 Happy Family Restautant
大角咀埃華街119號地下
3486 6286
大角咀埃華街119號地下
3486 6286
沒有留言:
發佈留言