寶藍色酒樽非常型格，修長外型顯得有點高貴。咪睇佢斟出嚟好似白酒咁，其實喺日本清酒，仲加入氣泡，入口冰涼爽快，甜酸味細緻，又帶點果香，酒精度得5%，絕對好易上口唔怕飲醉。作為餐前淺酌，真喺非常合適。
蕃茄大蝦濃湯
夏日最好就飲啲酸酸爽爽嘅湯，所以，老友特意整個蕃茄濃湯俾我試試，兼且加入大蝦，務求高檔啲，飲得又睇得。個濃湯雖然無加咩茄膏之類嚟提升個濃味，但蕃茄味都算頗突出，而且，酸香鮮活；而大蝦以新鮮對蝦入饌，鮮甜、爽口喺自然不過嘅事。
約克郡布丁
平時餸湯都喺用麵包，今次老友花多少少心思，改用約克郡布丁（Yorkshire Pudding），一款英格蘭東北部約克郡嘅傳統美食，依款布丁甜食鹹食都得，前者可以加點甜嘅生果、朱古力，後者則可以加點煙肉、牛肉之類。老友今次個布丁做個基本餅，沒有加太多材料，主要食其蛋香，一個個巖巖巉巉嘅約克郡布丁，外層煙煙韌韌，內裡軟熟富蛋香，一啖湯，一啖布丁，效果唔錯。
焗釀意大利火腿磨菇
磨菇釀入意大利火腿、洋蔥，再加上麵包糠，出嚟嘅效果唔錯，啲磨菇唔太乾，又幾香，火腿加洋蔥令啲磨菇味道唔寡，而麵包糠令人咬落有啲脆脆口感，成件事組合埋一齊真喺唔錯。
Bruder Dr. Becker 2009 Dienheimer Tafelstein Scheurebe Auslese, Rheinhessen
同學仔本身同啲朋友久唔久都喜歡摸吓酒杯底，所以，對酒都有一定嘅認識，至於小弟，對餐酒就屬於門外漢，飲吓無妨，不過，評酒免問，純粹個人感覺分享幾句。輪到主菜上場，因為喺食烤雞，所以，揀支德國白酒嚟襯，比起上面支有氣清酒，酒精度高啲，但都易入口，味道醇甘圓滑。
焗露絲瑪莉春雞跟蒜蓉椰菜仔
隻春雞真喺做得有一手，既有露絲瑪莉嘅香味，又唔會食到有咩位置好淡口，老友嘅秘訣就喺唔用鹽醃，而喺用鹽水浸，鹽水唔好校得太鹹，浸佢一晚，就可以更平均完整咁醃勻隻春雞。再者，用上春雞，烘得啱火候，難食嘅機會真喺微乎其微，故此，外皮香脆，雞肉又嫩滑，一流，加上啲荷蘭串茄，清酸爆汁，椰菜仔爽脆蒜香，個主菜一啲唔失禮。
即磨咖啡
老友除酒之外，亦好鍾意咖啡，雖然家中設備唔多，難以做到特別效果嘅咖啡，如鮮奶咖啡、意式泡沫咖啡，但招呼我依等「食棍」又點可以就咁以咖啡粉嚟沖咖啡咁待慢呀，至少都即磨啦。咖啡豆嚟自觀塘Caffe Essenza所炒製嘅埃塞俄比亞豆，啲咖啡豆睇落富光澤，就咁聞都好香，再人手打啲奶泡加入咖啡內，雖則質感唔及出面專業咖啡店嘅好，但咖啡味絕對醇香。
晌度，真喺要再次多謝佢請我同老婆食番餐私房菜。講咗成年，都卒之排到我，有機會就下次等小弟露兩手啦！
個人評分
味道：8/10
環境：- /10
服務：- /10
抵食：- /10
平均每人消費：無價
味道：8/10
環境：- /10
服務：- /10
抵食：- /10
平均每人消費：無價
沒有留言:
發佈留言