Bistro Délifrance：大地震前的法式早餐

撇開政治問題，香港都算喺塊福地，自然天災比較少，打風一年幾次都甚少做成嚴重傷亡，比起鄰近嘅大陛、台灣、日本，一個大地震都會有幾嚴重嘅後果。今早，兩公婆又嚟到葵芳睇早場「加州大地震」（戲飛平啲吖嘛），睇戲前食番個豐富啲嘅早餐，本來打算揀A1 Bakery Café，但得戶外位，一朝早已29℃，所以，揀咗坐得較為舒服嘅Bistro Delifrance。

晌度食早餐，環境又的確好啲嘅，燈光柔和，梳化椅舒服，又夠寧靜，又有人招呼，代價就食物貴啲，又收加一囉！

早餐A-H共有8款選擇（$35-$63），晌門口個大電子屏幕睇晒，亦都可以拎張餐牌埋位慢慢睇，包類可轉配法國百吉包、全麥百吉包、法國貴族牛角包、芝麻包、全麥多士，而所有早餐均配鮮磨咖啡、錫蘭奶茶或有機茶。

B. 煙三文魚炒蛋配全麥百吉包 $36

老婆依家飲食都多數揀素，睇勻個餐牌，以B餐較少肉，只得啲煙三文，又配全麥百吉包，相對營養健康啲。不過，煙三文魚炒蛋中嘅煙三文魚比較碎濕濕，不過，炒蛋還算OK，未有過老。

而杯有機果茶，幾清香，而茶包喺樂施會嘅公平貿易產品，雖然唔會好飲咗，但就喺對發展中國家農民同工人工作嘅尊重。

D. 自選特級早餐 $38

包款及配菜都可以自選，自選3款美食包括有煎蛋、珍寶腸、煙肉、煙火腿、烤雞、火雞片，因為老婆份早餐有炒蛋，所以小弟揀珍寶腸、煙火腿及烤雞，再配牛角包。珍寶腸個名好籠統，口感食落應該雞肉腸，不過呎吋就大條啲，煙火腿無煙肉咁肥，夾吓包幾好食，而烤雞其實只喺煎雞扒，但就份量少，又無乜味。整體製作，感覺有啲迤。

諗住Delifrance始終都喺間法式麵包店，啲牛角包應屬於高質出品，不過，睇我件牛角包無光澤，入口稍乾，橫刀一切，包心欠層次，同上次晌euro go go一樣，無乜牛油香，所以，唔怪得都俾咗盒牛油仔。

咖啡採用意大利Lavazza嘅咖啡豆，質素自然有一定保證，入口醇香細膩。

後記，雖然只喺睇2D版嘅加州大地震，但劇情緊湊，無乜冷場，雖然，做戲咁做，邊有樣樣事都接駁得咁啱啱好，尤其人生，不如意事十常八九，開開心心食一餐，睇場戲，日子就喺咁慢慢過架啦！

個人評分
味道：6/10
環境：7/10
服務：7/10
抵食：6/10
平均每人消費：HK$37

餐廳資料：
Bistro Délifrance
葵芳興芳路223號新都會廣場3樓375號舖
2429 8936