原來店子星期日開3:00pm，去到啱啱開鋪。店內堂座呈L形，木紋地磚配白磚牆，簡潔雅致，而枱櫈都襯番一式，以白木為主，有種暖和嘅感覺。牆上少少各地名勝相片，好點綴一下。雖然開鋪無耐，但坐吓坐吓都已經有五乘幾滿。
影低餐牌都成為指定動作，俾大家參考之餘，又可為自己作為一份記錄。頭幾頁叫Joyful Choice，有唔同類別嘅甜品，應該喺店家嘅推介。
跟住，其他嘅系列，仲有拿破崙、窩夫、疏乎厘、綿綿冰、奶凍，以及一系列飲品，多款飲品。全部甜品都圖文並茂，有圖有相，就算出嚟嘅成品無十足，都足以有個明確嘅參考。
燒菠蘿雪葩 $48
通常實物會比餐牌嘅相片少啲，但依份燒菠蘿雪葩就啱啱相反，疊得好高，好大份。菠蘿味嘅雪葩好清甜，入口冰涼，涼爽入心，而且幾軟滑，唔會有太多「冰粒」感，再者，燒菠蘿燒過之後，甜味更濃縮，又帶點點燒焦，唯一美中不足就喺溶得快！
沖繩黑糖Oreo芭菲 $56
幾款芭菲似乎頗受歡迎，因為見唔少食評都有提，相熟嘅食友都讚好，所以，無理由唔試。沖繩黑糖Oreo芭菲，以修長窄身玻璃杯將富奶香嘅軟雪糕跟沖繩黑糖漿一層又一層唧上，中間又加入黑糖果凍，面層配以雲呢拿雪糕球、士多啤梨、原件Oreo、朱古力百力滋及Oreo餅碎作裝飾，大羹大羹幾樣嘢撈埋嚟食，滋味得妙不可言，沖繩黑糖嘅純香，寧舍特別。
芒果拿破崙 $58
晌碧綠嘅抹茶醬襯托下，賣相攞晒分，3層長條形酥皮夾雜吉士，加上大大粒芒果果肉及杏仁片，絕對充滿芒果誘惑。每件酥皮打橫睇已見其層次清晰，入口甘香酥脆，吉士則香甜幼滑，只嫌蛋味太薄；芒果肉夠晒香甜，芒果雪糕亦富芒果香，冰涼而唔會硬繃繃。
橙酒疏乎厘 $48
寫到明等候需時，表示即叫即焗，當然，食開疏乎厘嘅人都知，疏乎厘都無得做定。先講賣相，算得上高水準表現，因為粉漿焗到離杯口有近一倍多高，挺身而無側埋一邊，疏乎厘表面又色帶金黃，因為做疏乎厘嘅粉漿及烘焗實在唔易掌握。至於個疏乎厘味道喺點？入口好輕盈，好似棉花糖咁軟綿，又帶有淡淡橙香及少少酒味。
Mr. Black奶凍 $52
奶凍有3款口味：伯爵茶、雲呢嗱及Mr. Black嘅朱古力。咪睇佢外表「黑古勒突」，自似平平無奇，真喺要起佢底先知佢有「內涵」。表面除有啲雜莓做裝飾，朱古力雪糕下底原來加有啲班尼士朱古力粒，朱古力味濃郁；而下面嘅朱古力奶凍，挺身而軟滑，朱古力味亦都不俗，整個甜品實在唔錯。順帶一提，幾款甜品配襯唔同味道嘅雪糕球，雖然唔知咩品牌，但質素唔錯，軟滑濃郁。
最後，我哋都喺無點到心太軟，但見隔離枱嘅綠茶心太軟伴雪糕，非常吸引，正所謂隔離飯香；但我哋3個人，已經品嚐咗5款甜品，其實都算少少過份，之不過作為下午茶，喺要盡興啲先得嘅。無論食，還是整，我同麵包班同學仔對甜品真喺樂此不疲，更喺樂在其中！
個人評分
味道：8/10
環境：8/10
服務：8/10
抵食：7/10
平均每人消費：HK$88
味道：8/10
環境：8/10
服務：8/10
抵食：7/10
平均每人消費：HK$88
餐廳資料：
Joyful Dessert House
旺角黑布街74號藝興大廈地下2及3號舖
2856 1886
Joyful Dessert House
旺角黑布街74號藝興大廈地下2及3號舖
2856 1886
沒有留言:
發佈留言