奇華餅家 Kee Wah：糉有你心

依家食糉已無分時節，尤其鹹肉糉，粥檔必備。不過，一臨近端午，無論酒樓、抑或餅店，都推出各式各樣嘅糉嚟應節，為咗搶佔生意，更會推陳出新，所以，晌依個時候，就更可以品嚐好多新口味，不得不佩服師傅們嘅創意心思。今次，就多謝朋友送嚟兩隻香糉俾小弟應節，實在有心。

若非夾埋張店家嘅單張，真喺唔知兩隻糠喺出自奇華，因為包裝估唔到極之簡單低調。

合桃棗蓉糉 $50

依一款素糉啱晒我老婆，因為除咗無肉之外，合桃、棗蓉都喺健康之物，尤其前者，可幫助降低膽固醇。

切開一睇，糉心包裹住大大嚿棗蓉，亦睇到棗蓉中有粒粒合桃碎。入口糯米較為實淨，然而，軟綿嘅棗蓉卻唔單喺清香，更棗味濃郁，甜而不膩，另外，合桃粒仍有少少脆口，令人食落更添口感，所以，真喺健康宜人之選。

奇華鮮肉臘腸糉 $60

奇華嘅鮮肉臘腸一向有水準，尤其自設廠房，喺食用安心嘅保證。

烚15分鐘後，鮮肉臘腸糉變得熱騰騰嘅佳態，打開糉葉，就見到喺調過味嘅糯米糉底，內藏好多蝦米同臘腸，仲有大大隻嘅花菇，口感十足。米粒經過調味，再加埋吸收咗其他材料嘅精華，所以，糉身嘅味道頗出色，又帶點油潤鮮香，對比起隻合桃棗蓉糉，又無咁黏口，其實口感有啲似食糯米雞。

見朋友附上嘅單張都無特別提及，事後先知依兩款糉都喺新出品。就快端午，有無興趣買嚟應吓節呢？又或，買嚟送俾啲摯愛嘅親人呢？

個人評分

味道：8/10

環境：- /10
服務：- /10
抵食：- /10
平均每人消費：HK$0（朋友送贈）

餐廳資料：

奇華餅家 Kee Wah

黃大仙龍翔道136號龍翔中心LG1-01號舖
2566 8582