因為前後嚟過兩次，所以，點菜重任就由小弟肩負。除小籠包外，類別仲有點心、湯、涼菜、經典小炒、飯麵、拉麵、甜品及飲料，上次嚟有幾款新加坡風味，本想點嚟俾屋企人試，依家只喺得番個喇沙，都照點，然後加啲心水小菜，咁就度掂晒！
蘿蔔絲酥餅 $34
先嚟一客「熱氣」點心，因為試過認為做得好，所以，點一客俾家人試，佢哋都讚個酥餅做到油香鬆脆，內裡嘅蘿蔔絲清甜多汁。
麻醬油麥菜 $48
涼菜就揀咗麻醬油麥菜，又喺翻兜之選，同樣「專登」點俾屋企人試。一扎一扎嘅油麥菜版青瓜薄片捲實，入口爽脆俐落，添少少麻醬，清新中化出陣陣濃香，味道有層次。
樂天皇朝八種口味小籠包 $88
我諗十枱就會有十枱客都點依個「八色」小籠包，我哋5個人起碼要點兩籠啦。8種味道包括原味、人參、鵝肝、黑松露、芝士、蟹粉、蒜香及麻辣，每一個由唔同顏色去區分，未食已覺得好養眼，由淡至濃，餐廳有個食用建議次序。不過，個人嚟講，想試邊款就邊款，反正好少一個人食晒8款。
人參味 – 翡翠綠嘅人參味，個人認為喺色澤最靚嘅一個，一入口，參味強勁，苦苦哋，又甘甘哋；
鵝肝味 - 啡黃嘅鵝肝味，估唔到有啲驚喜喎，嗒到甘腴嘅鵝肝，湯汁亦有少少甘甜；
芝士味 - 橙黃色嘅芝士味，最突出喺可以一咬就拉出一絲絲芝士，口感過癮；
蟹粉味 - 橙啡色嘅蟹粉味，跟過往一樣嚐到蟹味，細細一粒，蟹味算得上濃郁。
今晚自己就試咗以上幾款，而原味、黑松露味、蒜香味以前都試過，嚟過幾次，都喺未試過麻辣味，唔嗜辣自不然唔會主動嚐個辣嘅。
京醬肉絲配薄餅 $78餐牌中有一個系列叫經典小炒，但又唔覺京醬肉絲喺一道經典小炒菜式，不過，味道就真喺唔錯。肉絲以濃香嘅醬汁爆炒，味道頗濃，帶少少甜，但配合埋底下嘅京蔥，再搵薄餅包住食，不失惹味。但一定趁早食，因為啲薄餅一攤涼就變硬，影響口感。
蒜香鮮魚柳 $88
依道菜好似英式嘅炸魚咁，同樣沾粉漿脆炸，一咬外層非常之香脆，嚓嚓聲，亦唔算好厚，而魚肉亦好嫩滑，不過，蒜香未有預期咁突出，整體不過不失。
瑤柱芙蓉賽螃蟹 $72
望落啲炒蛋白又白又滑，唔知入口喺點？將蛋黃、黑醋跟蛋白撈勻，蛋白真喺滑溜，帶點醋香。蛋白模仿蟹肉，蛋黃就想扮吓蟹膏，不過，瑤柱絲的確得好少，吊唔出個鹹鮮香味。
炒年糕 $68
飯麵類先嚟一客炒年糕，再加一碗喇沙鮮肉卷拉麵。炒年糕喺老婆嘅心水菜，貪佢煙韌有咬口，又軟軟綿綿咁，配濃厚醬油，做到基本有餘。
喇沙鮮肉卷拉麵 $58
之前已試個喇沙海鮮拉麵（$78），覺得佢哋嘅喇沙湯底做得相當不俗，濃香帶少辣，惹味醒胃，所以，握介俾屋企人試吓，弟婦對海鮮敏感，所以，要鮮肉卷最穩陣。話鮮肉卷，其實喺肉片，還好嘅喺都幾腍滑，配喇沙湯，好食，而麵條喺有師傅即場手打，新鮮度不用懷疑，粗幼度適中，入口有韌勁，唯一美中不足喺今次隻蛋唔多溏心！
雖然大家食得飽飽，但既然弟婦生日，佢又好鍾意甜品，無理由唔試吓樂天嘅甜品。
香煎南瓜餅 $30
整成花餅形嘅南瓜餅，一客有3件，外層煎得少少脆口感，內裡黏糯煙韌，南瓜味唔算超強，但算唔錯。
高麗豆沙 $30
同樣一客3個，炸得漲漲，糝上糖霜，外皮軟綿，一口咬落食到豆沙蓉嘅清甜，以及香蕉肉嘅香味。
桂花酒釀丸子 $26
個甜湯有好多糯米花及桂花，故此，酒香及桂花味同樣突出，又唔會話邊個搶邊個，好平衡；而丸子做得大細均一，口感軟糯煙韌，簡單而味美。
整體服務有番一貫水準，換碟，添水，勤快到位，侍應亦禮貌周周。茶錢$7位，連加一，埋單八百幾，當然由小弟請啦，食物嘅水準又保持到，無走樣，屋企人亦讚好，所以，無揀錯再嚟過。
個人評分
味道：9/10
環境：8/10
服務：8/10
抵食：8/10
平均每人消費：HK$190
餐廳資料：
樂天皇朝 Paradise Dynasty
銅鑼灣波斯富街99號利舞臺廣場6樓
2177 0903
環境：8/10
服務：8/10
抵食：8/10
平均每人消費：HK$190
餐廳資料：
樂天皇朝 Paradise Dynasty
銅鑼灣波斯富街99號利舞臺廣場6樓
2177 0903
沒有留言:
發佈留言