奇華餅家 Kee Wah Bakery：羊羊得意，步步糕升！

雖然未到過年，已偷步食咗蘿蔔糕及年糕，多謝朋友送來一盒奇華賀年禮盒，紅底紙盒，配手繪中式公仔，甚有賀年氣氛。盒內有齊蘿蔔糕與年糕，煲啖粥，淥啲菜，已經可以當一餐晚飯。

隨禮盒附上嘅小冊子，原來奇華依個「亞嫲年糕」系列，喺秉承創辦人黃業榮先生母親嘅傳統手藝，一直堅持以自家生磨糯米蒸製，真喺要落足心機試真啲。

翻閱一下本小冊子，奇華嘅賀年禮物真喺好多花款，糕點、小食、糖果、蛋卷……，單單講番「亞嫲年糕」系列，由年糕、馬蹄糕、紅豆糕、芋頭糕、甘薯糕，到蘿蔔糕，就已經有成12款之多，有長形，有圓形。用料方面，講明細選頂級糯米、自家生磨，採用日本德島金時紫薯，自家製鮮臘味，優質嘅瑤柱、蝦米……，堅持香港製造，讓人食得安心嘅出品。

朋友所送嘅喺「自選亞嫲年糕禮盒（兩個裝）」優惠價賣$158，比起散買當然划算一點。

極上珠姐XO醬臘味蘿蔔糕 $92

糕面放有一隻辣椒仔，心諗：「珠姐」喺咪凶我呢？不過，實情喺頗有辣勁，因為XO醬早已混入底蘿蔔糕內，所以，煎好食用時，唔需要再蘸乜蘸物，入口已經好有香味。蘿蔔糕本身質感挺身，煎香後軟綿綿，除有臘味外，亦會食到瑤柱絲、蝦米等等，唯一挑剔，喺啲料撈得唔夠勻混啫。

亞嫲糖年糕 $82

成份就只有糯米、片糖同水，就做出依款既簡單，又傳統嘅糕品。雖然小弟煎燶咗少少，但依然入口煙糯香甜，甜得嚟啱啱好，沖杯濃茶喺小弟認為最襯嘅配搭。順帶一帶，從小冊子裡，睇到除依款年糕，另外仲有杏汁、椰汁、薑汁及麥芽糖醇低糖年糕可供選擇，適合唔同口味嘅人。

如果未諗好送咩俾家人、親友做新年賀禮，不妨落奇華走一轉，相信有唔少選擇合你心水！

個人評分

味道：7/10
環境：-/10
服務：-/10
抵食：-/10
平均每人消費：HK$0（賀年禮物）

餐廳資料：
奇華餅家 Kee Wah Bakery
荃灣楊屋道1號荃新天地G43號舖
2512 6889