「路邊攤」位處又一城商場內，當然走嘅唔會喺爛撻撻嘅街邊路線，化身成唔曉流動嘅紐約街頭流動快餐車，認真盞鬼，而一身黃黑嘅對襯，鮮明突出，型格十足。平時晌街邊篤魚蛋，立食喺常識吧，但幫襯「路邊攤」就可以坐低慢慢食，除鋪前有張小枱，「快餐車」側邊及後面都有坐位，坐晌依兩處仲可以睇到店員打沙冰添。而且，所有食物嘅處理，一目了然，佢哋就更要搞好個衛生。
店子主打幾款港式街頭小食，如：咖喱魚蛋、魚蓉燒賣、碗仔翅……等等，不過，聽店員話因為商場唔容許明火煮嘢，所以，有啲港式小食好似煎釀三寶之類就做唔到。此外，仲有糯米雞、撈麵、紅豆沙、芝麻糊、杏仁露及一系列飲品。當然，開得晌又一城，定價就唔可以跟街邊小販比。
Combo B $45
上面講過有唔少本土小食，最佳選擇就喺套餐，套餐有兩款：A（腸粉、魚蓉燒賣、魚片頭）及B（咖喱魚蛋、魚蓉燒賣、魚片頭、胡椒豬肚肉丸），魚蛋、燒賣、豬肚肉丸都喺店方推介食物，當然要試Combo B啦，4款食物各有3粒。
- 手打咖喱魚蛋：魚蛋呎吋比一般嘅大粒，咬落頗為爽彈，幾有魚味，咖喱汁較港式，唔太辣；
- 蒸魚蓉燒賣：以魚蓉代替豬肉做，無咁肥之餘，魚味算突出；
- 蒸潮式魚片頭：，魚片頭口感極富彈性，因為喺蒸，唔喺炸，少份香口感；
- 手打胡椒豬肚肉丸：胡椒味挺香，但幾辣吓，口感似貢丸，結實有咬口，食到粒粒豬肚。
- 蒸潮式魚片頭：，魚片頭口感極富彈性，因為喺蒸，唔喺炸，少份香口感；
- 手打胡椒豬肚肉丸：胡椒味挺香，但幾辣吓，口感似貢丸，結實有咬口，食到粒粒豬肚。
韓式炸雞炒年糕 $38
晌餐牌唔見，但晌「吧枱」會有介紹，原來喺新產品，所以，順手都試一試。炸雞喺近年新興，炒年糕卻喺韓國菜嘅經典，走埋一齊又會有咩化學作用？份量唔喺好多，炸雞只有幾件，味道都OK，炸雞雖未算超甘香，但就不油膩，加上黏糯嘅年糕，辣得嚟幾刺激惹味。
芝麻冰冰 $38
飲品方面，港式奶茶及芝麻冰冰喺推介，不過，唔喺茶記，對前者嘅水準都喺有啲擔心，所以，揀咗芝麻冰冰。原來喺即叫即磨，因為小弟坐晌後面，能夠直擊成個製作過程。睇住佢生磨芝麻，所以味道天然，芝麻味超濃郁，又夠晒大杯，而且，口感綿綿，冰涼透心。
之前晌收銀旁見到有款極品鮑魚雞腿撈麵，雖然睇落鮑魚唔會太大粒，但講到幾吸引咁，下次有機會都想試吓先。
跟店員傾開，其實晌依度搞車仔檔有無得做，佢話對象主要都喺啲有細路嘅中產，或擔心衛生而又想篤魚蛋嘅人，加上附近有溜冰場、戲院，所以，生意不俗架！
個人評分
味道：7/10
環境：7/10
服務：7/10
抵食：6/10
平均每人消費：HK$60
味道：7/10
環境：7/10
服務：7/10
抵食：6/10
平均每人消費：HK$60
餐廳資料：
路邊攤 The Lobintan
九龍塘達之路80號又一城G層KIOSK S3
2156 1778
路邊攤 The Lobintan
九龍塘達之路80號又一城G層KIOSK S3
2156 1778
沒有留言:
發佈留言