和牛燒肉．純 Japanese Wagyu Yakiniku Pure：和牛脂味大放送

日本菜之中，以烤肉為最少接觸嘅類別，對上一次食日式烤肉，真喺都唔記得幾時嘅事，今晚適逢其會，當然唔會錯過，跟友人嚟到尖東嘅「和牛燒肉．純」，一嚐多款烤肉，實行「脂」味大放送，讓滋味填滿咀。

「和牛燒肉．純」走中高檔路線，所以，消費方面絕不便宜，當然，環境、服務及食材質質會跟價錢成正比。晌吧位嘅一個木牌雕刻着「佐賀牛」（特選黑毛和牛第00789號指定），原來，佢哋專賣日本頂級純種和牛，品種嚟自日本各地，如佐賀、鹿兒島、飛驒………等等，絕不容少覤。

環境私隱度高，因為全場都以半封閉式卡位為主，前後以高牆間隔，又可以放下布簾，增加隱密度，讓客人盡情用餐而不被騷擾。

此外，經過走廊時，亦見有幾個個室，地方寬敞闊落，佈置簡約幽雅，自成一國，讓人更感自在。

甫坐低，除送上熱茶，仲有熱毛巾，喺日本高級餐廳嘅指定服務。而除咗一啲推廣嘅指定套餐，店家嘅餐牌都用上iPad顯示，分門別類，有圖有價錢，樣樣嘢都一目了然。

大部份所賣嘅肉類，都以食原味為主，所以，基本上都只喺灑少少鹽同黑胡椒而已，只有極少部份款式調過味。故此，店家提供醬油、檸角供蘸點提味之用，另枱上亦備有黑胡椒及岩鹽。

特上日本產和牛肉眼 $450

餐牌首頁就喺純種嘅黑毛和牛，包含唔同部位，有西冷、肉眼、牛肩眼、牛排肉……等等，有平有貴，悉隨尊便。

一客特上日本產和牛肉眼，份量如兩隻成人手掌大小，望一眼，已見色澤粉紅嬌嫩，油花分佈細密，煞是誘人。輕燒過後，脂香四溢，入口油潤嫩滑，富肉味而甘香，油香嘅餘韻仍存晌口腔之內，不過，$450一客確實不便宜。

牛舌 $108

牛舌以薄切處理，塊塊紅潤新鮮，由於薄切，所以，同樣唔使燒好耐，每面兩分鐘左右已非常足夠。牛舌質感有份煙韌嘅感覺，食落頗有咬口，細嚼而散發牛舌獨有嘅味道，小弟喜歡沾少少醬油，感覺啱啱好！

日本產豚肉眼 $98

雖然日本嘅和牛名聞天下，不過，佢哋嘅豚肉亦非一般貨色。一客豚肉眼只有4大片，雖然黐住一大截脂肪，但烤燒後，又無想像中咁油膩；而且，肉質不粗不嚡，亦帶點爽口感，又無豬燥味，實屬不俗。

胸外腹 $98

胸外腹據介紹喺晌橫隔膜附近嘅位置，肉質較腍身，又帶有少少雪花，所以，燒後嘅胸外腹入口好腍滑，肉汁豐盈，夾有唔少油香；再者，因為胸外腹經醃過，特別惹味。

蘋果汁、西柚汁 $35

雖然，食烤肉，跟杯冰凍啤酒就最好，不過，我哋都喺揀飲果汁，酸酸甜甜可以中和吓啲油膩感。無論蘋果汁，抑或西柚汁，飲落有少少果蓉嘅質感，味道感覺又天然，唔會好假咁，實在算得上喺燒「脂」之選。

今晚滿口「脂」味，除咗搵杯果汁外，相信都要踢番幾場波燒吓「脂」！ 

個人評分

味道：7/10
環境：9/10
服務：7/10
抵食：6/10
平均每人消費：HK$400

餐廳資料：
和牛燒肉．純 Japanese Wagyu Yakiniku Pure
尖沙咀加連威老道96號希爾頓大廈1樓3號舖
2723 3868