山區裡的走走趯趯: BBQ Military：請軍入甕

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2015年2月1日星期日

BBQ Military：請軍入甕

早前分享咗8/F「至尊重慶雞煲」嘅食記，依次就分享埋晌上面18/F「BBQ Military」嘅韓燒飲食體驗。一出電梯，已經感受到「軍事重地」嘅氣氛，不過，一啲都唔凝重，絕無打杖嘅感覺，反而有份喜樂同開心，因為，幾幅壁畫，細心睇，有點幽默抵死。

除咗門口有唔少軍事裝備外，如軍帽、頭盔、沙包、鐵剷、軍用電話機……等等，內裡就有更多「展品」，鐵絲網、望遠鏡、眼罩、假槍、避彈衣……真喺有排細數，最抵死喺枱上嘅「茶壺」喺士兵用嘅款式，好似返咗去細個玩童軍嘅年代。雖然小弟唔喺咩軍事迷，但睇見一樣覺得過癮，再者，所有侍應都著上迷彩軍服，唔單止型，仲好配合個場。

餐廳佔18/F全層，所以，個場好大，又闊又深，起碼可以坐到二、三百幾人。餐廳單邊全喺落地玻璃，因為居高臨下，而周邊大多數都喺矮細舊唐樓，所以，景觀幾開揚，入夜後，對住晒荃灣啲舊樓天台景，另一番風情。裝修簡單，水泥地現天花大光燈，燒烤枱及座位如一般韓燒格局，圓櫈揭開面蓋可以放袋、放雜物，慳位方便。而抽煙系統採用上吸式，抽風口又可以拉高拉低，效果挺好，食到尾離開，都唔會一身油煙味，絕無尷尬。

食中菜成日被為人詬病就喺又茶芥、又小食，一圍人分分鐘百幾蚊，可謂「未見官先打八十」；有朋友就特別鍾情韓國菜，因為，前菜既好食，花款多，又有特色，有啲鋪頭仲可以免費添加。就好似BBQ Military咁，都未點菜咋，已經先嚟一人一份「前菜」，有醬油凍豆腐、洋蔥生菜絲、冬菇、韓式泡菜及蘿蔔絲。凍豆腐超嫩滑、冬菇很有菇香、泡菜辛辣惹味。每人有咁大份，竟然仲可以免費任添，本來我哋想話要多少少泡菜同冬菇就夠，點知毫不手緊嚟咗3大兜，真喺誠意十足。

食韓燒，燒嘅大部份都喺肉，所以，更會附送一兜生菜，用嚟夾埋啲肉一齊食，減低油膩之餘，亦令個味道清爽啲。生菜亦喺任添，外面有啲一喺要俾錢，一喺就只有免費加添一次，晌依度就感到店家疏爽。另外，亦供應一小碟麵豉醬及青辣椒為佐料，加咗可以令肉味更突出。而小弟就更鍾意晌生菜之上，又肉又生菜絲、蘿蔔絲，味道更豐富。

順帶先介紹吓有咩飲，韓國真露、日本清酒、啤酒……選擇多多，不過，酒類唔喺太啱我哋，汽水又略嫌普通，所以，大家都一致揀咗啲韓國果汁，共有3款味道：桃、提子及梨（$20罐），除咗味道清怡，感覺天然，原來仲有少少果肉，值得一試！就算唔點嘢飲，軍用水壺內嘅小麥茶，同樣冰涼解渴。

以「軍事」作為餐廳環境主題，已算喺成功吸晴，不過，一間店成功與否，還看食物質素。雖然，上文講過燒嘅大部份都喺肉類，但花款真多，淨喺豬肉，梅頭、五花腩、排骨、豬頸肉、烤豬腸、烤豬皮、豬柳……等等多款，仲有牛肉類、特選類（濟洲黑毛豬、鮑魚）、雞/鴨類、海鮮類，所以，單單可供燒烤嘅選擇就近50款，貨源嚟自世界各地。

此外，唔想成晚淨喺得個「燒」字，仲有湯類、煎餅、餃子、湯飯及飯麵等墊肚之選。雖然，好多都未有機會試，但餐牌內所有菜式，都圖文並茂，睇見啲相都已經好吸引。

烤豬皮 $78 / 150g

依個喺朋友一心一意想試嘅菜式，想一嚐烤豬皮喺點樣，我哋樂意奉陪。一客有3片，平平滑滑嘅豬皮，無半點肥膏，經燒烤成金黃半透明狀，入口煙韌有咬口，沾點黃豆粉，口感無咁油膩，當為送酒啤嘅小食會喺唔錯嘅配搭。據說能有效補充骨膠原，真假與否，都不妨一試。

濟洲島黑毛豬面青肉 $138 / 150g

兩年幾前同屋企人去過一趟濟洲，知道當地嘅黑毛豬好出名，不過，因為大家當時疑晌慶州食錯嘢，抱恙咗幾日，所以，跟黑毛豬緣慳一面，故此今晚就點一客平平哋嘅黑毛豬面青肉試試。豬面青肉色澤鮮紅，被裁成小件，容易燒烤，絲絲油脂平均散落肉面，燒好之後，侍應又幫我哋剪成為一口一件，細心妥貼，肉質好嫩滑，很有豬肉味，小弟就喜歡蘸少少蒜油，令肉味更香濃。

烤牛排骨（調味） $198 / 350g

牛排骨已講明已調味，所以，色澤帶啡。每條牛排骨薄切後再捲好，肉面鎅好花，賣相變得份外吸引，而一客有兩件，每件攤番長其實都好大件。牛排骨唔使燒得太熟，加上本身帶點油脂，所以，好快有得食，兼且入口軟腍富肉味，又夠肉汁，配合生菜、少少麵豉醬、洋蔥絲……等等，味道實在一流。

每碟肉類都添加少少雞脾菇作為配菜，燒香後，軟腍爽口，幾好食架！順帶一提，侍應都樂意幫客人燒烤所有食物，當然，如你喜歡自己動手燒，絕不成問題，但遇有一啲特別部位，大可請教佢哋。此外，佢哋唔似舊式啲龜背烤板，要落油嚟減低黐板，所以，基本上燒一轉嘢就會幫你換板，換板次數相當之密，真喺依啲服務功夫絕無偷懶，抵貼士都俾多少少。

烤什錦海鮮 $358

見隔離枱嘅海鮮幾新鮮吸引，又好似樣樣想試，所以，索性揀個「烤什錦海鮮」，有齊大明蝦、鮮帶子、生蠔、鮑魚、魷魚、蟶子、大花甲，陣容鼎盛。當我哋唔知從何入手點燒好，侍應即刻幫手為我哋解決煩惱。佢將個烤板放好後，我同佢講喺咪倒轉咗，原來倒轉喺有原因，目的喺防止海鮮燒烤時滲出嘅水份漏出嚟，真喺受教了。

烤海鮮喺要將塊烤板倒轉用

不單幫忙擺好燒烤陣勢，仲幫我哋全程搞掂，唔使我哋雞手鴨腳，認真窩心，燒好嘅食物，會先放晌烤板邊熱住，等你慢慢食，然則再將其他食材調位繼續燒。所有食材都喺新鮮貨色，所以，鮮甜味十足，當中嘅大蝦、帶子、蟶子爽口彈牙，鮑魚有咬口，魷魚軟綿，唔會入口成舊擦紙膠咁，而生蠔蠔味足，又夾著少少海水嘅鹹鮮。最緊要有侍應幫手，先至令啲食材燒得啱啱好，仲有留意到，佢哋不時都調校個火力，如果自己燒番，好玩就好玩，但味道上可以要打個折扣囉。

煎餃 $48

淨喺燒肉、燒海鮮，要食到飽消費會有點高，所以，尾段加啲墊肚嘢，既可食得經濟啲，又可以試到師傅喺其他菜式上嘅手勢。先嚟一客煎餃，共有6隻，煎得金香，唔太油，餃皮薄而脆，肉餡跟菜嘅比例平均，唔錯。

煎海鮮蔥餅 $78

煎餅晌濟洲幾經常食到，店家有兩款口味：煎海鮮蔥餅及煎泡菜餅，因為前菜都食咗唔少泡菜，所以，我哋揀前者。韓式煎餅質感比較粉，有啲似「糕」嘅感覺，煎餅裡有好多海鮮料，如蝦仁、魷魚，其實，煎得幾香口，味道不俗。

雖然又煎餃，又煎餅，但一講到甜品，女士果真有第二個胃。餐牌內本身有一款甜品「半乾柿」，好似幾有特色，又未食過，可惜貼住「Sold Out」二字，幸而仲有一個甜品餐牌，寫明由韓國直送嘅凍餅，一共有5款味道：甜蕃薯果仁蛋糕、朱古力碎蛋糕、紅莓芝士蛋糕、特濃朱古力果仁蛋糕及熱情果慕絲蛋糕，款款特價做緊$32。