泰閣 Koon Thai Cuisine：到會泰滋味

早前跟導師餞行一大班朋友晌油麻地嘅「泰閣」食番餐，隨手拎咗佢啲到會單張，其實舊年晌灣仔嘅曼谷泰菜食飯時，已知佢哋有搞到會。正正同教會朋友搞個元旦大食會，唔想嚟嚟去去都喺快餐店嘅到會或食薄餅，加上上次晌「泰閣」嘅經驗，知道佢哋做泰菜嘅質素唔差，所以，一於搞搞新意「泰菜到會」。

套餐一向都喺划算之選，佢哋有3款套餐可供選擇，分別喺10人份嘅「曼谷派對」（$1,638）、12人份嘅「曼谷聯歡套餐」（$2,738）及30人份嘅「曼谷聯歡盛宴」（$3,388），不過，後兩者太多相信食唔晒，而最前者有好幾款辣嘢，驚細路仔唔啱食，結果，選擇散叫，夾埋同叫個「曼谷派對」套餐差唔多價錢。（註：訂購滿$1,500，可享免費送貨，而訂購滿指定金額，又有現金券或美食回贈）

到會菜式分別有冷盤、小食、熱盤、蔬菜、甜品、飲品，夾夾埋埋一共有40多款，我哋則每個類別揀少少。而食物以錫紙盆盛載，加透明膠蓋及保鮮紙封好，放晌大紙箱內，以厚身卡紙板分隔，整齊企理，內附有足夠餐具，真喺打開就食得。另外，值得一讚，指明12:30pm送到，果然好準時。

金柚子蝦球沙律 $248 (2lb)

喺3款冷盤之一，因為晌泰閣已經試過依道菜，知道佢哋做得出色，所以，揀番佢可以俾朋友試試。柚子取自泰國青綠色嘅金柚，拆得大大嚿，食得大大啖，清甜無乜澀味，又爆晒汁，蝦肉鮮甜彈形，再拌以花生碎、魚乾仔、乾蔥、椰子乾片、辣椒碎，酸香醒胃、鹹鹹、辣辣，口感豐富。到會貨色一樣做得保持水準。

沙嗲串燒雙拼 $268 (2lb)

小食類就點多少少，分別有沙嗲串燒雙拼、冬蔭燒雞及泰式豬脾、先介紹吓沙嗲串燒雙拼，我記得晌曼谷泰菜食過佢哋嘅串燒，喺有雞牛豬，不過，到會就只得豬肉同雞肉（可單選豬肉或雞肉）。串燒燒得有點炭火香，而豬肉比較大串啲，豬肉或雞肉本身都應該醃過，食落有點味，當然，蘸得滿滿沙嗲就更惹味啦。

冬蔭燒雞 $278

一份喺一隻新鮮雞嘅份量，我估都有成三斤以上大隻。雖話燒雞，但雞樣唔算好脆，但表面燒得金黃，唧下青檸汁，再點一點泰式酸辣醬，食落幾有泰國風味，一陣陣冬蔭功嘅酸辣香，質素不俗。

泰式豬脾（原隻） $168兩隻起

雖被標為人氣熱買，但想像跟嚟到卻又有好大落差，原來喺好多醬汁嘅炆豬脾，以為喺乾身嘅菜式一類。基本上，豬脾炆得好腍，帶有不少皮下脂肪，入口腍腍滑滑，充滿「骨膠原」，不過，就始終覺得有點肥，此外，另一個問題喺有過鹹嘅現象，喺絕對需要改善嘅地方。

泰式炒金邊粉 $178 (2lb)

熱盤，其實都喺啲飯品、河粉及金邊粉之類。一盆金邊粉裝得滿滿，肯定足兩磅。個金邊粉炒得幾好食，味道酸酸甜甜，少少濕潤，除咗有好多爽口嘅中蝦之外，仲鋪咗好多花生碎，金邊粉內又混有銀芽，真喺口感、香味兼備。

泰式炒雜菇 $148 (2lb)

蔬菜類，就嚟一客「泰式炒雜菇」，果然有好多菇菌：冬菇、草菇、雞脾菇、秀珍菇……等等，而咖喱汁亦盛得滿滿，充滿香料味，又略帶椰奶香，整體辣度溫和，配法包或白飯都同樣出色，亦唔會嘥咗啲汁。

泰式糕點拼盤 $218 (24件)

香芒椰汁糯米飯喺甜品中嘅人氣熱買，不過，好想大家試到多啲款式，所以，訂咗一客泰式糕點拼盤。拼盤內有椰汁大菜糕、椰汁千層糕、椰汁西米糕、椰絲芝麻糯米糍，每樣各有6件，並附有兩小兜沙糖芝麻，喺跟食椰絲芝麻糯米糍時用嘅。大菜糕味較清而淡，個人覺得普通，然而，千層糕及西米糕做得有水準，前者既有淡淡椰香，又有班蘭甜味，清甜好味，而後者椰汁糕內既有西米，又有栗米粒，口感豐富；椰絲芝麻糯米糍喺大部份朋友異口同聲話喺第一次食，覺得幾得意，軟軟糯糯，混合椰絲、芝麻、沙糖同食，頗有特色。

SPY Wine Cooler $20

飲品有汽水、有紅酒，不過前者自己超市買一定抵啲啦，而後者我哋則唔多人有興趣，反而，原裝泰國入口嘅Sky Wine Cooler有啲新鮮感，味道分為Classic、Black & Red，而且，仲做緊買一送一優惠添，所以，叫咗幾支Classic同Red一齊試。其實，佢喺一啲有汽紅酒飲品，酒精度唔高，卻喺好易入口。

到會菜式份量預得啱啱好，食晒無得剩，除咗個泰式豬脾失色啲之外，其他菜式都唔錯，搞派對，又可以多一個選擇，到會新「泰」度。

http://gourmethai.com.hk/

個人評分

味道：7/10
環境：-/10
服務：-/10
抵食：-/10
平均每人消費：HK$125

餐廳資料：
泰閣 Koon Thai Cuisine（Gourmet Thai Express）
尖沙咀廣東道33號中港城2座平台3號舖
2878 7666