Kim's Spoon：粗蔘大意

不時都有參加吓U Magazine嘅網上抽獎，但一向都甚少有中獎緣，卒之機會來臨，雖然只喺小小一份韓式海鮮蔘雞湯，唔喺話好值錢，只值一百幾十，不過，總算叫做中吓獎，有運行吓。故此，是晚就「專燈」過嚟荃灣新開無耐嘅Kim’s Spoon「領獎」。

餐廳位於商場二樓電梯口，一上就見到。初時齋睇門面，以為間餐廳唔喺好大，原來餐廳呈L形，入到埋邊仲有好大個用餐區。水泥地，水泥牆身，杏色襯黃，撞得幾型格，又簡約。

雖然今晚擺到明喺嚟食個海鮮蔘雞湯，不過，都翻翻餐牌，當攞個參考，因為始終荃灣區都多機會嚟，記錄吓依度有咩選擇，會唔會有咩好食。款式屬於大包圍，樣樣有啲，好似韓式年糕、部隊鍋、炸雞、韓式豆腐湯……等等，又有揉合新派鐵板及傳統韓國食材嘅料理，而且勝在定價唔貴喎，擺明搶佔年輕人生意。

餐枱上有清水（自斟）及泡菜（任取），當然，食幾多先至好夾幾多，千祈咪嘥嘢。

講番個海鮮蔘雞湯，喺店內嘅新張精選，原價$188，依家只喺賣$98，雖然唔知幾時先變番正價，但話唔埋都喺幾宣傳手法，變成長期特價嚟吸引人。

海鮮蔘雞湯 $98

甫上枱嘅海鮮蔘雞湯非常滾熱辣，除咗清楚可見原隻肥雞外，仲有大大件八爪魚，撈兩撈仲有青口同墨魚仔，所以，個蔘雞湯絕對無做得粗心大意嘅感覺，相反喺真材實料之作，認真唔講得笑。

賣相就先聲套人喇，味道亦都唔差，湯內有成隻手指咁粗嘅人蔘，但湯底蔘味唔算好重，但飲落有種甘苦味，飲完個人「暖笠笠」，據講人蔘雞湯含豐富營養、高熱量，可助身軀消除疲累；湯內嘅八爪魚好大隻，軟軟腍腍，枱上已預備好大鉸剪，方便剪細啲八爪魚鬚，一口一粒慢慢食，而雞肉都煮到好鬆化、軟綿綿，一夾就撕得開，雞肉帶點蔘味，算唔錯。

原本驚一個人食一份海鮮蔘雞湯會唔夠飽，已打算點多一客餃子，點知食到近尾發覺雞內有唔少飯粒，清晒啲米飯飽肚到呢……撐住個肚走呀。不過，啲飯粒煮出嚟個人覺得口感一般，又唔似湯飯，又唔粥，黏黏潺潺，有點膠質感，但感覺硬喺唔多似糯米喎。

最後，一肚蔘湯，連嘢飲都無嗌，離開時帶著一身熱血身軀。小弟做事有時幾迤，間中都會粗心大意，不過，講到食，寫食評，仲有啲心架！

個人評分
味道：7/10
環境：7/10
服務：7/10
抵食：7/10
平均每人消費：HK$0（抽獎禮品）

餐廳資料：
Kim's Spoon
荃灣西樓角路64-98號號南豐中心新之城2樓32C舖
2384 5222