帝苑餅店 Fine Foods：好友狂嚐曲（廿九）

依個「好友狂嚐曲」系列一向都喺寫曲奇嘅食評，今次唔知算唔算破例，寫嘅喺蝴蝶酥。嚴格嚟講，佢都應該唔屬於曲奇，只喺由酥皮演變而成嘅一款經典甜點，但家下好多曲奇餅專買店都會兼做蝴蝶酥，慢慢，佢都好似變成曲奇嘅近親咁。最近，先後兩次收到一大一細嘅蝴蝶酥，咁啱同樣都喺出自帝苑餅店Fine Foods。

大盒嘅喺雜綿口味禮盒裝，盒面喺白底加餅店嘅實景相片，清雅脫俗，內裡包括原味及芝麻味蝴蝶酥，各款口味淨重125g，約有13塊左右。無論邊款口味，外觀都烘得色澤金黃平均，而造型形態嬌美均一。

原味蝴蝶酥

絕對喺上佳之作，將蝴蝶酥放入口，一咬咔嚓應聲裂開，鬆化而富牛油及焦糖香，極具層次感，真喺餅廚嘅技術及心機結晶。

芝麻味蝴蝶酥

唔知何解，芝麻味蝴蝶酥嘅層次比原味蝴蝶酥更分明，入口感覺更鬆化，而蝴蝶酥中心沾滿黑白芝麻，更添芝麻甘香，食到叫人酥香停不了。

題外話，包裝盒嘅右上角，印住「每盒賣出的蝴蝶酥，帝苑酒店將會捐出港幣3元予生命熱線」，如果擴展到酒店內任何食肆都有咁嘅做法，相信幫助更大啊！

而小包裝嘅蝴蝶酥只有原味一款，而且喺迷你版，的的骰骰，粉紅色紙盒內仲以透明膠袋包着，每包淨重50g，所以，真喺可以一次過當下午茶清晒佢。

迷你版嘅蝴蝶酥雖然唔及大塊個層次咁明確，不過，同樣入口鬆化，每塊都滿載牛油及焦糖香，而蝴蝶酥表面嘅沙糖粒所引發嘅焦糖香，其甜度啱啱好，一口一塊，一塊又接一塊。

蝴蝶酥嘅零售價本身已經唔平，仲要喺帝苑出品，就算保守少少唔好話喺全城最好，亦肯定稱得上名列前茅，食友如此重手厚禮，實在萬分感動。

個人評分

味道：9/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
帝苑餅店 Fine Foods
尖沙咀麼地道69號帝苑酒店大堂
2733 2045