重慶麻辣燙：燙手新貴？

晌美孚區，以米線為主打（其他餐廳、茶記兼賣嘅唔算數）以前就只得「景村雲南米線」，舊年尾晌隔幾個鋪位就多開咗一間「重慶麻辣燙」，有點擺明單挑嘅局面，因為開晌同街又咁近打對台賣番米線，而且，原鋪位唔喺做開食肆，印象中喺啲診所鋪，夾硬打造為食店。開檔初期，都見幾多人幫襯，為免排隊又要逼，所以，等貪新鮮嘅熱潮降吓溫先去幫襯。

過咗晚飯時間，差唔多九點先嚟到，所以，客人唔多，久唔久先有一兩個、兩三個客人。餐廳嘅面積比起「景村」大，所以，予人感覺較為寬敞，而且，環境又光猛整潔，比起晌「景村」喺令人覺得自在啲、好坐啲。

晌鋪面已見到店家不斷強調佢哋喺賣重慶川味，而睇睇張餐牌兼落單紙，格式跟大多數嘅米線鋪大同小異，有類似過橋米線嘅一人餐（$54）、二人餐（$88），仲要送串燒、送嘢飲，又有多款重慶風味小食（涼拌 / 串燒），而自選米線（薯粉、公仔麵）就喺例牌嘅「車仔」形式。

米線 + 沙嗲 + 腩肉 $30

米線包幾款基本配料：腐皮、芽菜及韮菜，所以，小弟就只加腩肉就算，不過，就想+$2要沙嗲湯底。米線幾滑溜，份量亦頗大碗，撥開啲配料，大概有6片腩肉左右，切得非常薄片，肥而不膩，最欣賞啲沙嗲，確喺幾香濃，整體而言，雖無驚喜，但味道不俗。

熱奶茶

配餐加飲品都喺$7，冷熱同價，都喺一般港式選擇，咖啡、奶茶、華田、檸茶、檸水……等等。膽粗粗叫咗杯熱奶茶，真喺唔得，無乜茶味。

米線 + 清湯 + 木耳絲 + 冬菇 $33

老婆揀秘製清湯，再配木耳絲及冬菇，咪睇個湯底一身奶白，但真喺好清，清到無乜味，所以唔知點解咁白，以為豆漿，飲多幾啖都唔覺喺。木耳絲雖然唔多，但好爽脆，冬菇有幾片，件件厚肉，菇香唔差；而配料嘅腐皮、芽菜、韮菜，以腐皮最好食，滑嘟嘟，韮菜就好縮皮，得幾炷仔。

店員嘅招呼幾好，因為我哋都無試其麻辣湯底，對小店嘅評論未必全面，始終店家以「重慶麻辣燙」為名，麻辣必然重點，所以，今次只可以講中規中矩。稍後，美孚萬事達廣場樓上仲會有多一間「譚仔雲南米線」，到時候，唔知喺三強頂立，定喺變為戰國時代，汰弱留強呢？

個人評分
味道：7/10
環境：7/10
服務：7/10
抵食：7/10
平均每人消費：HK$35

餐廳資料：
翠河餐廳 Green River Restaurant
美孚荔灣道8號地舖
2370 0666