晌年幾前幫襯過一次旺角店，印象唔錯，因為雞煲做得不俗，任食火鍋料又多選擇，又有新鮮即包餃子，公仔麵用上韓國貨，飲品更有Jolly Sandy、韓國嘢飲，都喺$138一位，非常抵食。今回舅仔建議食依間，小弟就梗無問題啦。嘩，7:00pm未夠上到嚟，已經坐滿大半個場，無他嘅，7:30pm前埋單就更平，相信為咗慳多幾十，大把人唔介意食早啲。
對比起上次去嘅旺角店，依度有好多冷盤、小食、沙律，如茶葉蛋、蠔油炆冬菇、鎮江豬軟骨、蘿蔔豬大腸、冬蔭功鳳爪、司華力腸、照燒茄子、魚肉燒賣、魚片頭拌大豆芽、台式章魚丸、泰式墨魚丸、蒙古烤肉、牛油蕃薯仔、牛油粟米、日式冷麵、照燒七里香（雞肉）、日式凍豆腐、拍黃瓜、青芥末雜果沙律、酸椒土豆絲、糖醋蘿蔔、泡椒花生……等等，集各家大成，樣樣有啲，搞到有啲似放題咁。唔講得笑，淨食依啲都可以飽晒。
趁個雞煲未到，屋企人就隨意拎咗啲返嚟，雖然無試晒，但所試到嘅幾款，又唔差喎。好似啲台式章魚丸、泰式墨魚丸，點都好過佳寶貨色好多，而牛油蕃薯仔，幾粉香甜蜜，日式凍豆腐似喺百福出品，但百福產品一向唔差，個醬油亦校得稀杰啱啱好；不過，個雜果沙律加咗青芥末，感覺有啲怪啫。
雖然雞煲到咗，但都仲要滾一滾，趁依家介紹吓有咩嘢飲。雖然有夏枯草、酸梅湯，但點都唔及三個大雪櫃內嘅汽水、啤酒吸引。出面啲火鍋嘅任飲，選擇本身已經唔多，有時叫佢嚟5罐就俾4罐，追完又追，晌依度就無心煩，成櫃獅威啤酒、百事、百事青檸、七喜、美蓮達橙味、提子味、青蘋果味、Jolly Sandy奇異金果味、荔枝味、檸檬味、康師傅冰綠茶、冰糖雪梨水、道地黑糖薑茶、冬瓜茶、烏龍茶、韓國樂天錫蘭檸茶、芒果汁、碳酸飲品。咁嘅陣容，誠意十足啦，所以，小弟都唔執輸，前後都飲咗4罐唔同嘢飲，夠晒盡慶。
雞煲方面，顧及唔同人嘅需要，以及港人貪新鮮嘅性格，一共有4款雞煲選擇：重慶雞煲、水煮雞煲、胡椒豬肚雞煲及米酒雞煲。枱面餐墊紙有寫住食雞3步曲：1. 先食雞；2. 放花膠、水魷魚、牛栢葉；3. 加湯打邊爐。我哋揀嘅喺重慶雞煲，不過，今次無照跟，總之大家食得隨心就可以嘞。順帶講講收費，睇睇影低店內嘅海報，收費一目了然，唔使小弟抄多次。
據知煮重慶雞煲用上花椒、辣椒、大蒜、肉桂、丁香、豆寇、老薑及洋葱等十多種由香料，又再以大廚自己嘅秘製醬汁做到獨特風味，依度嘅重慶雞煲做得有板有眼，個煲一上枱，麻辣飄香，味道紛陳，唔喺一味死辣，惹味得嚟又富層次。順帶一提，店內無乜醬料，都喺啲花椒、辣椒俾你加麻、加辣，由於雞煲夠濃味，啲醬料根本都無乜需要派上場！
底汁好都只可以講喺成功一半，話明雞煲，雞嘅質素都好重要，雞件肉汁豐盈且質感嫩滑，睇睇皮下脂肪又少，一煲有足一隻雞嘅份量，食極都有咁款。
清晒個雞煲，喺時候加配料打邊爐，兩張落單紙，一共70多款配料，有肥牛、黑豚腩片、牛骨髓、乜丸物丸、花膠、鯇魚片、蔬菜、公仔麵……，唔喺咩精貴刁鑽嘢，但絕不比一般任食火鍋店嘅配料少。落單紙時刻提醒大家：「珍惜食物，切勿浪費！」，所以，我哋都分開多次落單，因為啲小食及雞煲都食得我哋六、七分飽。
小弟就唔逐樣逐樣評啦，因為成晚唔覺唔覺又真喺食咗好多嘢，綜合而言，啲配料質素不俗，而漏單問題，都有少少啦。
另一誠意表現，就喺餃子唔用來貨，貨真價實，幾個阿姐現場新鮮即包，3款餃子包括有時菜豬肉餃、洋蒽牛肉餃及孜然羊肉餃，當然要一次過試勻3款。幾款餃子都好有特色，粒粒包得飽滿無欺場，不過，3款餃子都有過鹹情況，質素要控制吓，否則嘥晒阿姐包餃嘅一番心機。
順便講講加湯嘅事情，基本上，加湯叫店員幫手可以喇，不過，去到8:00pm啲高峰時段，見阿姐咁忙，好多人都自己郁手加湯。加湯可選擇加上湯，又或淨加水，其實，原先食完個雞煲都仲剩好多汁，之後一路落料打邊爐，所以，個人覺得全程加水已足夠，加上湯反而太濃添。
尾聲，就喺甜品時間，甜品唔喺任食，每人只可以拎一客。因為店方慶祝荃灣店開業一周年，晌FB打卡或讚好，全枱客人多一客甜品，依個著數無理由唔要。
記得上次晌旺角店，只有雀巢雪糕，不過，今次晌荃灣店，選擇勁多，雜果涼粉、士多啤梨奶凍、日式芝士餅、法式焦糖燉蛋、吉士奶布甸、椰汁奶凍、雀巢雪糕（雲呢嗱、朱古力、芒果、紅豆、芝麻），以及即製鮮果忌廉班戟，真喺估唔到雞煲店都咁睇重甜品一環，而且，似模似樣一啲都唔迤做。
正如上次所講，咁嘅價錢，咁多嘢食，又咁多嘢飲，質素一啲都唔差，服務又OK，心諗：你仲想點！不過，抽風似乎都喺佢哋個死穴，食完，衫褲鞋襪、背囊、孭袋，一陣強烈嘢食味。都預咗喺咁，所以，著得夠「呢啡」（註：正字「褦襶」，好鬼死深）。
個人評分
味道：8/10
環境：7/10
服務：7/10
抵食：8/10
平均每人消費：HK$174
環境：7/10
服務：7/10
抵食：8/10
平均每人消費：HK$174
餐廳資料：
至尊重慶雞煲 Supreme Restaurant
荃灣眾安街55號大鴻輝(荃灣)中心8樓全層
2614 6818
至尊重慶雞煲 Supreme Restaurant
荃灣眾安街55號大鴻輝(荃灣)中心8樓全層
2614 6818
沒有留言:
發佈留言