新樂海鮮酒家 Sun Lok Seafood Restaurant：清淡晚飯．家常小炒

近年，大嶼山去得最多都應該喺機場，而另一邊嘅梅窩，估計都應該有10多年無嚟，就算今次再嚟梅窩，已經唔喺好似以前咁搭船，而喺港鐵到東涌，再轉巴士入梅窩喇。至於今次入嚟目的，喺與另一對夫婦朋友入梅窩嘅衛理園靜修，無晌營地訂飯，所以，晚餐走返出梅窩食，反正10-15分鐘腳程，都好方便。朋友食過「新樂」，話味道家常，所以，晚餐就決定於此。

「新樂」喺村屋鋪，所以，地方唔大，紙皮石地板，摺椅膠櫈，防火膠板木枱，一派70、80年代屋村裡啲茶居風格，少少懷舊味，但求乾淨企理就得喇。而幫襯都喺村內街坊熟客多，對比銀礦灣路大街一帶，或巴士總站嘅冬菇亭，「新樂」顯然十分幽靜。

牆上貼有唔少推介外，而菜牌就做得頗簡單，前後幾版揭一揭就揭晒，或許有啲菜式無晌菜牌上，但一般大路粵式小炒都可以做到俾你，好似有款涼瓜肉鬆煎蛋，所以，我哋想點嘅涼瓜炒蛋就唔難做出嚟。

紅燒豆腐 $65

豆腐裁得幾大件，都算幾香幾滑，配菜有冬菇、草菇，淋上蠔油茨，真喺只可以話佢好家常。

涼瓜炒蛋 $65

差唔多可以講喺涼瓜多過蛋，涼瓜味道甘苦，但唔澀，而炒蛋火喉幾好，嫩嫩滑滑，仲帶有少少蛋汁。雖然喺一道極簡單嘅炒蛋菜式，但絕對無做得「求其」。

魚湯什菜煲 $65

依個什菜煲就麻麻哋，所謂魚湯，入口無乜味；什菜包括：菜心、雲耳、銀芽，好清淡嘅菜式，亦可以話喺好健康嘅菜式。

4個人，點咗3個餸，再叫4碗白飯（$10碗），喺咪食得好家常呢！茗茶$5位（但個餐牌標$4），唔收加一，平均消費每人都喺六十多啲。

最後，都順帶想分享一下衛理園依個基督教營地，背山面海，清幽恬靜，最估唔到連啲房都裝修過晒，新淨舒適。

背山面海

清幽恬靜

 營舍之一

偶爾脫離一陣煩囂，都唔一定要離港去到老遠，衛理園確喺個靜修好地方。

個人評分
味道：6/10
環境：6/10
服務：6/10
抵食：6/10
平均每人消費：HK$63

餐廳資料：
新樂海鮮酒家 Sun Lok Seafood Restaurant
大嶼山梅窩涌口街28號A
2984 1363