山區裡的走走趯趯: MangoChaCha：Come芒．細說情懷

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2014年4月21日星期一

MangoChaCha：Come芒．細說情懷

芒果種類上百種，你又認識幾多？印度阿方索芒、菲律賓呂宋芒、豬腰芒、泰國水仙芒、象牙芒、枇杷芒、印尼鷹嘴芒……等等，台灣嘅「愛文芒」你又聽過未？今日好開心嚟到晌台灣發跡，分店遍及吉隆坡、首爾、東京、深圳等地嘅MangoChaCha芒果主題甜品店，一口氣試咗多款以愛文芒入饌嘅冷熱甜品。

店名：MangoChaCha，其實喺由農家出身嘅店主Mango同太太ChaCha合力創辦嘅，憑著高質素嘅愛文芒及其他優質食材，加埋不斷嘅創意同心思，由台北路邊攤做到依家台灣本土及海外都有多家分店，證明成功非僥倖。

據介紹，依種外皮橙紅嘅愛文芒本身唔喺台灣品種，乃上世紀中由從北美引入嘅一種紅芒「蘋果芒」，再加以培植成為今日嘅愛文芒。MangoChaCha唔同一般甜品店就咁買入水果，全店所用嘅愛文芒都喺店主自己農場嘅出品，質素有保證，而且，每年5、6月為當造莆，為保質素，將熟成芒果起肉，然而再以快速冷凍技術冷藏，咁就可以一年四季都有穩定貨源供應。至於愛文芒，其特性喺肉質細膩、纖維特幼，果肉無渣，味道清甜，甜度達到12，算得上味道清甜。下次再有機會到台南玉井、高雄枋山、屏東獅子依幾個愛文芒種植基地，點都要買少少作為手信，送俾啲識食嘅老死先。

一室橙溝白，充滿陽光活力，而座位設計，有吧位、馬蹄形廂座、梳化椅、活動式枱櫈，可用簡潔型格嚟形容。

食品選擇又如何？招牌芒果冰品，包括芒果雪花冰、黑糖剉冰及雪花冰拼剉冰，以依幾個基礎，配搭出唔同份量嘅組合，人多人少也適合。

金牌情人 $58

喺以招牌芒果雪花冰加芒果肉及法式手工芒果雪糕組成，如果無雪糕，就喺最基本嘅「金牌」（$48），如份量加倍就成為「金牌情人豪華版」（$108），足3-4人享用呀！

據店員介紹，佢哋嘅芒果雪花冰喺以芒果肉、冰及牛奶做成，所以食時無需要再加糖漿，確實啲雪花冰滲出清幽芒果香，而且入口好綿柔。而冰上球法式手工芒果雪糕超好食，製作時入加鮮忌廉，口感更柔滑豐厚，富奶香，令小弟又再想起Spade by Lassana啲法式雪糕；反而，芒果肉無想像咁甜，不過，店主推介食法，就喺糝少少岩鹽，唔單止可以中和果酸，仲有效提高個甜度，芒果入口，先有少少鹹，再吊起個甜味，再者，果肉的確纖幼無渣；為求質量一致，所有芒果牛奶雪花冰磚、芒果雪糕、芒果肉統統都晌台灣總店運嚟，另外，餐碟都雪過先用，摸上手一陣陣冰涼，細心位盡見。

招牌情人 $58

另一款主打冰品，淋上黑糖漿嘅剉冰，加芒果肉及法式手工芒果雪糕所組成，無雪糕版本就喺「招牌」（$48），加倍份量就變成「招牌情人豪華版」（$108）。剉冰刨得幼細，又滑如絲，入口即融，配合埋醇香嘅黑糖漿，天然不造作嘅味道，喺夏日透心涼嘅佳品，況且，黑糖甜品一向都啱晒我。

金牌情人令我聯想到一個有內涵嘅情人，就如雪花冰，不用再添加都可以散發一股清幽香氣；而招牌情人，就好似喜歡裝扮，靠少少修飾嘅情人，無咗黑糖嘅襯托，剉冰就可能變得平淡無奇。

既然在香港落戶，又點少得加添一啲香港限定款式，包括跟多士、卷蛋、窩夫、糯米糍、酥皮及梳乎厘嘅組合。而且，名字也改得浪漫詩意，戀愛層層疊、情愛綿綿、甜蜜夾心……，女生們應該最受落喔。

情愛綿綿 $38/2件

其實即喺芒果忌廉卷蛋，外層嘅海綿蛋糕好鬆軟，回彈力強，不過，蛋香味唔算好濃；忌廉打得軟滑輕柔，入口如風，加上愛文芒嘅清甜，兩口子揀此甜品共嚐，綿綿情意，不言而喻。一份感情，包含好多嘢，要細味欣賞，先可細水長流！

甜蜜夾心（配黑糖醬） $68

「夾心」，因為以窩夫夾住芒果雪糕及鮮忌廉，再配上一小杯黑糖漿。外層微脆，內層軟熟，為配合「夾心」，窩夫要攤涼一點，所以，口感始終唔及新鮮熱辣既出時候嘅效果。雖無一種好冰火嘅感覺，然而，配合雪糕及忌廉，大啖大啖咬，又喺另一種滋味，猶如食緊雪糕蛋糕咁。想更甜蜜，醇香嘅黑糖漿，又豈可錯過。盡管有時候感情攤凍咗啲，但一啲小小嘅元素，又可引發更多甜蜜！

冷熱激情 $58

酥皮配芒果，西式嘅拿破崙早有先例，不過就一向喺凍食。依道「冷熱激情」，以自家製新鮮焗好嘅酥皮卷，再塞入冰涼芒果肉，一客兩條，希望讓客人感受冰火嘅感覺，再伴上一球法式手工芒果雪糕。酥皮卷焗得好平均，第一口咬落好鬆脆，但做得有少少厚，加上喺卷狀，所以，口感再出嚟會有啲煙韌，跟拿破崙喺兩樣嘢嚟。雖然做到冰火感，但如果酥皮卷再改良一下，效果一家更理想。激情喺需要配合，配合不好，會激情難再呀！

Love is Air $58

好虛嘅一個名字，但感覺又好浪漫咁。芒果梳乎厘以打起嘅蛋白，加上芒果汁做成，用料簡單，但做法非常考功夫嘅一道法式甜品。梳乎厘做得挺身而輕柔，入口像陣空氣，但又散發幽幽芒果清香，輕易就食晒成個。最有心思喺杯底撒上少少沙糖粒，食到尾下底有少少焦脆位。空氣喺乜？睇唔到、捉唔住，但無咗佢你又唔得，情唔單講愛情，仲有親情、友情……，切勿忽略已有之情，不要孤單而活喔！