台中逢甲夜市刈包小檔
不過，最近再遇上，喺晌灣仔大王東街嘅「Bao Wow」。店主對此包情有獨鍾，一於重新包裝，引入香港，獨賣刈包，可謂一包走天涯，希望做得夠專注；味道上又帶來好多創意，喺希望令人覺得刈包唔喺老土嘅代名詞！
位處橫巷小街嘅Bao Wow，雖然鋪面細細，但一入夜門口大大個霓虹光招牌，搶眼到爆，都幾難認佢唔到。鋪內格局窄長，高腳枱配紅白高腳椅，白磁磚襯水泥牆，粗獷型格，帶點美式快餐風格。
食物又有咩選擇呢？餐牌上以6款刈包為主打，都喺極濃亞洲風味，包括：傳統刈包、泡菜牛肉、棒棒雞、芝麻酸薑豬扒、泰式魚柳及照燒豆腐，款式自創，每款定價$32（1個）/ $58（2個）；又可以揀套餐，兩個包配一客飲品，售價為$68，再豐富啲，以折扣價換取薯條、芋頭條……等小食。如果夠人多，又多心，不妨考慮點客刈包拼盤，有齊6款，每個包跟散叫一樣大細，只喺賣$168（只不過除番開，每個$28，又唔喺平好多咋喎）！
除咗刈包之外，仲有多款小食供應，如田園沙律、薯條、忌廉蘑菇湯、芋頭條、洋蔥圈……等等；此外，甜品、飲品一應俱全，較特別喺手工啤酒，坊間少有供應。
芋頭條 $22
喺店裡幾招牌嘅小食之一，芋頭條外層甘脆鬆化，內裡仍帶有芋頭嘅粉糯質感，入口唔油膩，伴甜辣椒蛋黃醬，微辣少酸，更加提味去膩，好得意嘅醬汁。
芝士泡菜肉醬薯條 $48
一般炸薯條（配紫菜芝麻粉）賣$16一客，不過，想推介喺依個「芝士泡菜肉醬薯條」，單睇個組合：芝士、泡菜、肉醬、薯條，惹味唔在講，辛香刺激，一條接一條，可以食唔停手，好味。
試完小食，喺時候回味刈包滋味，嚟個刈包拼盤，雖然共有6款，不過小弟都只喺品嚐咗其中3款，但已好夠皮，因為，仲有試埋4月新包，一口氣食4個包包，等同食咗兩餐飯，晌山區走趯幾操勞都好，一下子啲力氣都返晒嚟啦。
小包厚薄適中，鬆軟唔黏牙，估唔到原來喺自家店內製作，唔用外來貨，又搓又發酵，現場即蒸，果真新鮮軟熟。除小包自家製之外，另一賣點，就喺刈包即叫即做，有單即從蒸籠取包，夾好配料，再下醬汁，多份新鮮熱辣嘅感覺。
傳統刈包
6款刈包中最暢銷嘅款式，無他嘅，就喺好食。包中嘅豬腩肉味道亦都不惶多讓，甘香多汁，鬆化入味，細問之下，喺以皮薄肥瘦均勻嘅荷蘭豬腩肉，搵十多種香料熬製嘅鹵水汁，炆燉多個小時而成，怪不得濃香軟腍；再加入酸菜粒、芫茜碎、花生碎、紅糖粉，難得做到甜酸不膩，集鹹甜酸一身。
泡菜牛肉刈包
餡料包括韓式泡菜、牛肉片、大荳芽，配自製韓燒汁，牛肉軟腍多汁，泡菜唔太辣，但跟大荳芽同樣爽脆，口感不俗。
棒棒雞刈包
屬四川式口味，以雞絲、青瓜、麻辣花生粒及自製芝麻醬組成，雖然雞肉無預期中咁嫩滑，水準仍有少少唔穩定，需改善一下，但味道突出，尤其麻香，喺小弟喜歡嘅點到即止，唔會太搶，整體口感有層次。
椰汁咖喱雞刈包 $38個
其實試咗幾款刈包，對佢哋嘅出品，都滿意十足，有質素，有創意。所以，4月新推甚有南洋風味嘅椰汁咖喱雞刈包，幾期待個味道喺點。依個雞肉比起棒棒雞嘅雞絲嫩滑啲，椰汁及咖喱香味平衡，辣度溫和，再加埋炸洋蔥圈，豐富咗個咬口感，真喺唔錯。5月又有新包出，想知喺咩嗎？
食包醬汁好重要，每款刈包本身已配上一款獨特醬料，但人人總有自己喜好，所以，在店中架設咗一個醬汁架，3款醬汁分別喺茄汁、甜辣椒蛋黃醬、是拉差香甜辣椒醬，多少隨意。
甜品一環，最欣賞喺店主續用刈包嚟創作，唔會無啦啦買咩芝士蛋糕、慕絲餅之類，不過，創新點都要啲時間，暫時只有兩款甜品供應。
炸包條 $28質感及食法，都好似西班牙人嘅早餐「炸麵粉條」（Churros），晌中環嘅Tango Argentinian Steakhouse第一次接觸。原註喺伴朱古力醬，但Bao Wow就改伴阿華田煉奶醬，確喺搞鬼，但效果又出奇哋唔錯。炸包條入口甘香，如能灑點肉桂粉可能仲正，不過，最大缺點喺好油，因為就咁用刈包炸，而刈包本身勁索油，實有需要改進個做法，唔用炸，又可唔可以用焗呢？
雪糕炸包文治 $38
唔講都幻想到喺樣乜嘢，炸香嘅刈包配上兩球雲呢嗱雪糕，一冷一熱，口感過癮，不過，炸過嘅刈包較油，雪糕又溶得快，結果，相機先食，就輪到雙手食先，搞到一手都喺，有啲手忙腳亂。
蜂蜜冬瓜茶 $15
汽水晌收銀旁一字排開，有可口可樂、玉泉忌廉、芬達橙汁、雪碧外，較特別喺蜂蜜冬瓜茶及蘋果西打。小弟揀嚟前者，因為小食及甜品都喺炸嘢多，冬瓜茶就最能清熱解毒、生津止渴。
雖然一派美式快餐風格，自己招呼自己，唔會有太多服務可言，不過，加設自助醬汁架，以及晌入門左邊吧枱上裝有多組手機叉電插頭，貼心之餘，亦令服務增值加分。而且，店主虛心聽取客人嘅意見，又加值得加分嘅地方。
個人評分
味道：8/10
環境：7/10
服務：8/10
抵食：6/10
平均每人消費：HK$0（試食邀請）
味道：8/10
環境：7/10
服務：8/10
抵食：6/10
平均每人消費：HK$0（試食邀請）
餐廳資料：
Bao Wow
灣仔大王東街28號2號舖
2528 9505
Bao Wow
灣仔大王東街28號2號舖
2528 9505
沒有留言:
發佈留言