奇華餅家 Kee Wah Bakery：後會有奇

真喺好多謝食友嘅關照，不時醒小弟各樣零食，曲奇及朱古力送贈已有「好友狂嚐曲」及「共朱同好」兩個系列嘅食評，不過，有啲小心意就真喺難以分類搞一個系列，就好似今次分別先後從兩位食友所收到同樣出自奇華餅家嘅產品，故此，就一篇過寫晒佢。

圖片從官網截圖而來

韓國蜂蜜柚子卷
卷蛋望落應該喺用蛋白蛋糕做，所以，外觀比較白，亦無咁香蛋味，但就相對健康啲。而且，卷蛋心嘅忌廉特少，薄薄一層，真喺好啱追求健康嘅朋友，至於柚子味非常出眾，兼且有少少柚子肉粒，配上蜂蜜嘅清甜蜜香，個卷蛋真喺幾得！多謝食友嘅心意，等我晌屋企有個唔錯嘅下午茶。

另一位食友份心意就唔細嘞，喺奇華嘅復活節禮盒，小鐵盒包裝，盒面圖案有趣，色彩繽紛又好卡通，小朋友見到應該好鍾意。

雖然美其名為「復活節禮盒」，但裡面都喺奇華本身一路有出開嘅產品拼湊而成，當中包括：老薑餅（2小包）、朱古力蛋卷（1包）、手製杏仁小紅莓鳥結糖（3粒）同埋手製南瓜籽脆糖（3粒），所以，就算過晒復活節，大家一樣可以買到嚟試。

老薑餅

每包有4粒老薑餅，外表啡啡黑黑，一打開個包裝，「聞」落已經好重薑味，食落薑味慢慢滲出，點到即止，唔太辣，能否驅寒，相信應該唔太得，不過，口感鬆脆，當小零食，醒醒神都應該唔錯。

朱古力蛋卷

一包裡面有6條，咬落好酥脆，朱古力濃郁，有水準啊！三幾啖，就KO晒成包朱古力蛋卷。

手製杏仁小紅莓鳥結糖

依款鳥結糖標明「手製」，且睇睇質素如何？前後試足3粒，味道偏甜，雖則杏仁香味突出，不過，整粒鳥結糖入口質感唔煙韌，有腍腍哋嘅感覺，個人覺得唔多OK。

手製南瓜籽脆糖

跟鳥結糖嘅質素啱啱相反，整粒都喺滿滿南瓜籽仁，食落酥脆得要命，又帶有麥芽糖香，但喺又唔甜喎，超正，甚得小弟歡心。

蛋白卷蛋、南瓜籽脆糖都喺今次嘅心水推介，值得跟佢哋「後會有期」！

個人評分
味道：8/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
奇華餅家 Kee Wah Bakery
荔枝角青山道666號
2743 7727