美心西餅 Maxim's Cake Shop：泥足深陷

同事見雜誌賣廣告，美心西餅$12以上甜品買3送1，加上推出咗個限量版復活節Tiramisu盆栽，覺得好得意，二話不說，食完晏就即刻行動。

食晏時段晌中環港鐵美心買包買甜品嘅人唔多，所以跟同事落去一齊買，好快手搞掂。原來，仲出咗小熊維尼雜果黑森林蛋糕及另一款應節嘅Q蛋朱古力杯！

復活節Tiramisu盆栽 $22

其實小盆栽甜品都唔喺咩新鮮事，以往都見唔少甜品店有推出，不過，大部份都以意大利芝士餅為主體甜品，依個美心所出嘅亦無例外。

過往常見，都喺晌上面插樖薄荷葉或露絲瑪莉扮小盆栽，但為咗應節，就改用草菇及復活蛋。紅色白斑點嘅草菇，幻彩色嘅復活蛋，兩樣都喺實心全白朱古力做，味道只有一個字：甜，口感亦只有一個字：硬，正正好睇唔好食。

面層代替唂咕粉灑滿扮泥嘅Oreo餅碎，味道如何不用多講，而且，唔喺薄薄一層，為咗做得傳神，啲「泥」落得份量十足。而下層嘅意大利芝士餅亦都做得深陷，絕無欺場，質素喺美心啲蛋糕嘅一貫水準，清蛋糕浸透咖啡酒，濕潤又夠咖啡香，而芝士餡心芝味淡雅而柔綿軟滑，好味。

所用嘅盛器喺如假包換嘅真花盆，用得唔好嘥，所以，同事洗番嚟俾個女做親子種植家課用！折實都喺$16.5一個，美心平常嘅意大利芝士餅都喺差唔多價錢，難得多份可愛同得意，小朋友一定鍾意。

個人評分
味道：6/10
環境：6/10
服務：7/10
抵食：8/10
平均每人消費：HK$16.5

餐廳資料：
美心西餅 Maxim's Cake Shop
中環港鐵中環站CEN E3號舖
2845 5059