其實銅鑼灣香港珀麗酒店嘅星域都幫襯過，睇番食評，原來已經喺2010年中嘅事，當日所食嘅精選晚餐，真喺有水準，唔知依間星域又如何？不過，環境方面就絕對好過港島嘅星域。位處酒店30/F嘅星域酒廊，一步出電梯就喺酒廊範圍，樓底頗高，佈局則跟一般酒廊無異，但燈光就比較光猛啲；主色以黑白配襯，大部份都喺高腳枱櫈，而全黑波浪紋天花令環境破格一啲，唔會太沉閒。店內亦設有大電視，可欣賞足球直播。
然而，酒廊最大賣點，莫過於室外嘅露天用餐區。由於大角咀都喺處於逐步再發展階段，高樓大廈並未喺好多，所以，正如老友所言：開揚通爽、景觀壯闊。而且，一邊對外「牆身」喺半身落地玻璃，更讓人有種居高臨下嘅感覺。
雖然周遭主要都喺住宅，以及一些矮小嘅舊樓，唔及中環好似曼哈頓商廈林立夜景咁養眼，但新舊對立，有份見證轉變嘅惰懷，喺另一番情趣。唯一唔好喺全部露天位置都喺可吸煙區域，對一啲非吸煙人士會有啲不便。
爆谷 $10
食得多花生、果仁，來一客爆谷亦唔錯，難得咬落脆卜卜。當然，小食仍然有薯片或花生可揀！
餐牌以真皮硬面製作，印有店舖名字，有種格調感。既然喺酒廊，酒類飲品必不可少，有唔同國家出產嘅白酒、紅酒，其他烈酒、啤酒都一應俱全，為顧及唔能夠飲酒人士，汽水、果汁、咖啡茶亦有供應。
此外，喜歡飲得特別嘅客人，雞尾酒應該喺你嘅心水，想試又唔飲得酒點算，放心，無酒精雞尾酒Mocktail一樣有得揀！店員話，假若餐牌無列出想飲嘅嘢，都可以提出，要是做得到，酒保都會盡量滿足客人。
Apple Mojito $52（Happy Hour）/ $78（Regular）
主要以蘋果糖漿、鮮青檸汁及梳打水溝成，再加塊新鮮薄荷葉做裝飾，外觀非常清爽。朋友話入口極之涼快，飲落感覺爽朗，可謂悶氣全消。不過，歡樂時光只喺5:00-7:00pm，對我依啲寫字樓打工族，實在太短。
Virgin Night $48（Happy Hour）/ $72（Regular）
外型較似一杯精雞尾，不過，就絕無酒精，只喺包含新鮮士多啤梨、番石榴汁及石榴糖漿，朋友形容，入口清甜帶少少微酸。
Chocolate Kiss $58（Happy Hour）/ $75（Regular）
我哋幾杯當中，唯一一杯含酒精飲品。其實，星域嘅精雞尾都分兩大類，一種喺常見嘅，如Long Island、Pina Colada，另一種喺所謂Skyzone Special Cocktails，依杯Chocolate Kiss就喺其一。百利咖啡甜酒加可可甜酒，酒精度唔算高，撞入鮮奶，唧上忌廉裝飾，朋友覺得幾有趣嘅味道。
Golden Delight $48（Happy Hour）/ $72（Regular）
有芒果汁及菠蘿汁兩款心水果汁，成為小弟不二之選，Golden Delight喺以芒果汁、橙汁、菠蘿汁溝成，鮮甜濃郁，以芒果味較突出。
翻翻餐牌睇睇有咩選擇，其實始終喺酒廊，食物選擇唔算多，有好幾款美食配酒嘅「套餐」組合，睇落定價唔貴。如果想食得飽肚啲，有個二人用嘅燒烤拼盤；純粹送吓酒，食吓小食，一系列燒烤小食都喺唔錯嘅選擇。不過，最有趣喺，竟然有甜品提供，仲要唔喺一、兩款，認真意料之外，啱啱我哋幾個都喺嗜甜之人，點可以唔強攻一下。
炸魚薯條（Fish and Chips）+兩杯大生啤 $198
對飲得啤酒嘅人嚟講，真喺好抵，兩杯大生啤（500ml）單售正價都要成$70-$85，個炸魚薯條差唔多半送半賣，如果唔好啤酒都OK，可以轉汽水或果汁，果汁正價都要成五十幾蚊杯架。話佢抵，都唔喺單講因為配兩杯大生啤，仲有就喺份炸魚薯條一啲都無交行貨，3大件炸魚甚有睇頭，脆漿做得夠薄，入口甘香鬆脆，魚柳食落唔似平價貨，嫩滑鮮美，入口有質感，蘸點個自家製嘅他他汁，變得再輕怡啲；墊底嘅直身薯條，新鮮炸起，熱辣香口，沾茄醬或他他汁都好食；最得意喺用一個疑似印度薄餅包Naan bread嚟載住啲炸魚薯條，個薄餅包少少脆，食落似餅乾多啲。
西班牙小食（Tapas）+ 西班牙葡萄紅酒或白酒 $148
同樣，唔要紅白酒，亦可改汽水或果汁。一客共有3樣小食：西班牙辣肉腸、蒜片虎蝦、風乾火腿卷露筍，除咗蝦得3件，其餘兩樣都有4件。西班牙辣肉腸霎眼望埋去，有少少似中式嘅紅腸，不過，較為油潤，而且，味道鹹辣；而虎蝦有別一向所見嘅大大隻，依家眼前嘅虎蝦就細一個碼，但肉質幾爽彈，好香蒜味；風乾火腿卷露筍，火腿雖唔知幾多個月熟成，但入口油香，露筍又爽脆，兩者甚匹配。伴碟仲有少少青橄欖同黑橄欖，淨食當然頗鹹啦，一粒一啖酒，相信會幾過癮。
燒烤拼盤（Mixed Grill Set）$388
燒烤拼盤以圓形鐵板燒形式呈送，下面仲加添火酒膏熱住嚟食。拼盤份量十足，但因為拼盤為二人份，所以多以兩件為單位，有珍寶帶子2隻、燒大蝦2隻、燒豬脾2枝、牛柳2件、台灣腸2條、雞翼4隻及烤薯角同少少配菜。整體嚟講用料不賴，帶子大隻鮮甜，燒大蝦爽口有蝦味，燒豬脾鹹香惹味，牛柳軟腍富肉汁，台灣腸皮脆肉質挺身，雞翼亦燒得甘香焦脆，薯角也粉腍薯味濃。
其實，個拼盤仲跟個三色醬：法式芥辣、英式芥辣、泰式酸辣醬，無特別點襯法，可按個人喜好想點就點，唔使拘束。
最後，輪到甜品登場，實在無諗過晌酒廊會狂掃咁多甜品。其實，餐牌所示一共有6款甜品供應，但我哋雖然只得4個人，但已叫咗其中3款，都咪話唔犀利，因為，其中一款火焰雪山更喺二人份量嘅甜品嚟。
榛子心太軟配香草雪糕 $88
心太軟外型做得麻麻哋，雖然個蛋糕有榛子香，又有濃濃朱古力味，可惜流心效果一般，對整髒味道無話太大影響，但欠缺視覺效果就總喺若有所失；碟底仲加咗好多雲呢嗱汁，見有雲呢嗱籽，就知用料有心，個汁幾有雲呢嗱香，至於個香草雪糕（即喺雲呢嗱），好唔好食都只不過喺其次。
法式芒果班戟 $88
一客兩件芒果班戟，加埋士多啤梨、芒果、紅桑子作為裝飾，一紅一黃，賣相的確幾靚幾搶眼。個班戟做得好薄，邊位仲有少少焦脆，一切開已見到厚厚芒果肉，些少吉士，香滑滋味。
火焰雪山配新鮮水果 $128
今晚嘅重點甜品，就喺依道懷舊「火焰雪山」，大大隻長碟感覺已夠晒大陣仗，再由店長倒酒點火，一時間火光熊熊，尤其晌咁幽暗環境，效果更突出，自然反應就喺即時影唔停。外層嘅蛋白本身已輕烤過，再經過火燒洗禮，既脆而帶點焦香味，咬萵又有種煙韌口感；中間嘅雪糕喺朱古力同士多啤梨味，又夾咗兩層蛋糕，冰凍挺實，好好味唔算得，但感覺喺食一種情懷。
溫馨提示，店方設最低消費，每位$88 + 10%，但環境開揚，感覺舒適，而定價相宜（若果我哋唔喺因為好想試佢啲雞尾酒，以及點咗咁多甜品，平均消費應該唔晒咁高），同幾個朋友坐低，飲吓嘢，傾吓偈，又確實幾爽幾唔錯喎！在此，祝願老友轉咗新工，晌新環境可大展拳腳，一展所長！
個人評分
味道：8/10
環境：9/10
服務：8/10
抵食：7/10
平均每人消費：HK$370
味道：8/10
環境：9/10
服務：8/10
抵食：7/10
平均每人消費：HK$370
餐廳資料：
星域酒廊 Skyzone Deck & Lounge
大角咀大角咀道86號九龍珀麗酒店30樓
3919 8338
星域酒廊 Skyzone Deck & Lounge
大角咀大角咀道86號九龍珀麗酒店30樓
3919 8338
沒有留言:
發佈留言