聖安娜餅屋 Saint Honore Cake Shop：「開飯搶鮮試！水果月餅大比拼」（三）之Super Lemon冰皮月餅

一晚之內，一次過試到來自8家商戶嘅月餅，有傳統餅皮，又有冰皮，款款味道不同，各有特色，都喺多謝「開飯」嘅邀請，揀咗小弟出席「開飯搶鮮試！水果月餅大比拼」嘅試食活動，地點就晌西灣河嘅Teavers，好貼心嘅安排，因為靚茶配月餅，實在賞心樂事。

靚茶+月餅=賞心樂事

8款水果月餅裡邊，質素、口味有長有短，就只抽出當中無論晌味道，抑或創意，都獲小弟俾得較高分嘅嚟同大家弟享，其中就有聖安娜一份兒。聖安娜晌電視、報紙、雜誌嘅廣告，宣傳攻勢強勁，日日都見到「咖啡王子」。其實每年嘅月餅市場，大家都絞盡腦汁去搶市場，就以聖安娜為例啦，除有經典口味（開心果紅荳、芝麻松子、宇治綠茶紅荳……）之外，仲有至潮配搭口味（玉米馬蹄爽、比利時朱古力Truffle、焦糖咖啡心太軟……）、水果乳酪軟心口味（柑桔乳酪軟心、紅桑子乳酪軟心、香蕉乳酪軟心……）、至Q一口冰皮月餅，真喺花多眼亂，令人樣樣都想試呀！

Super Lemon冰皮月餅
這夜，被安排所試喺唯一無中文譯名嘅Super Lemon冰皮月餅，買「至潮配搭冰皮月餅」禮盒（原價$205 / 優惠價$135）已包含依款口味，盒內其餘嘅仲有玉米馬蹄爽、比利時朱古力Truffle、焦糖咖啡心太軟、曲奇妙趣、石板街、楊枝金露、薄荷朱古力一共8款味道，當然淨想試佢就買單件裝划算啲啦，都喺$26.5。撇除冰皮稍為腍之外，個「超級檸檬」個檸檬味好出，因為唔單只中心果肉餡料似似哋檸檬軟糕，成件都帶有檸香，口感頗清新酸爽，好有水果月餅嘅特色。

小弟都喺第一次參加依類「盲評」嘅試食，晌無任何介紹，唔知品牌，唔知味道嘅情況下去試，又真喺幾好玩。雖知道小弟都只不過喺「神棍」食家，有啲味道事後揭盅都真喺食唔出，好似美心嘅粉紅番石榴杏脯冰皮，番石榴一試就食到，不過跟住開飯員工多番提示話有兩重水果，啊！原來喺杏脯，但我哋無人食得出喎！

小弟評分紙嘅真跡，啲字喺咪幾樣衰呢？

個人評分
味道：8/10
環境：7/10
服務：7/10
抵食：7/10
平均每人消費：HK$0（試食活動）

餐廳資料：

聖安娜餅屋 Saint Honore Cake Shop

美孚美孚新村吉利徑5C1號地下37號舖
2746 0251