蘇浙滙 Jardin De Jade：叨光得食．蘇式凈月

之前多得食友所贈，首嚐君蘭嘅茉莉花茶月餅，接續再嚟就要多得叨老細嘅光，有緣一試剛摘米芝蓮一星嘅新派滬菜名店蘇浙匯所出嘅月餅。事緣因公事跟老細去灣仔蘇浙匯食晏，真喺估唔到，原來老細同蘇浙匯嘅人好熟，所以醒咗啲月餅俾我哋，就喺咁同班同事有幾日免費下午茶食。

久聞蘇浙匯嘅大名，上網睇睇番佢嘅背景，她於1999年晌上海創立，主打淮揚菜，其後晌中國各地、香港、澳門開設分店，目前已有超過廿多間。今年從其單張所見，以「享秋月‧品香酥」為主題，特別推出咗3款月餅禮盒，包括：金月滿堂（廣式禮盒）$308元 / 盒、玲瓏月（廣式禮盒）$168元 / 盒及酥凈月（蘇式禮盒）$168元/盒，睇落似乎喺糅合傳統，並加入獨特餡料所炮製嘅月餠。

店方月餅單張，有簡單介紹。

酥凈月（蘇式禮盒）

一盒「酥凈月」共有8個較小巧嘅上海蘇式月餅，每一個都喺淨重80g，全部獨立包裝，除膠袋面印有月餅名稱外，餅面亦以紅印印上各款味道，包括：桂花桃仁月餅、雙麻印月月餅、金腿伍仁月餅、黑麻椒鹽月餅、金鈎伴月月餅、奶油葡萄月餅、八珍苔條月餅及玫瑰百果月餅，味道都頗創新。

 盒底成份說明

 桂花桃仁月餅

一刀切開，餅皮十分鬆脆，而且，果然少甜、少油呀。餅餡甚大堆頭，有糖冬瓜、桃仁、瓜子仁、花生、杏仁、金桔餅、青梅、原味瓜蓉、桂花，材料實在好豐富，但質感比較乾同實，而且桂花香味欠奉。

雙麻印月月餅

何解叫「雙麻」？因為有黑、白芝麻，仲加埋原味瓜蓉、瓜子仁、花生、杏仁、青梅、糖玫瑰、糖冬瓜、金桔餅、桂花，食落幾似個桂花桃仁月，只喺多朕芝麻香。

 金鈎伴月月餅

稱之為「金鈎」原因喺加咗小蝦米，另外仲有糖冬瓜、花生、金桔餅、瓜仁、原味瓜蓉、桃仁、乾蔥、燒酒，感覺似依鹹點多過月餅。此外，其後晌罐底嘅成份表，偶然發現依款月餅加咗味精，心諗有無咁嘅需要呢。

 奶油葡萄月餅

咁多款「蘇式月」，最得小弟歡心就喺依款奶油葡萄月餅，因為內裡有好多提子乾，口感濕潤，平衡番較乾身嘅餅皮。除提子乾外，仲有煉奶、金桔、糖冬瓜、原味瓜蓉、花生、瓜仁、桃仁、芝士粉多款材料。雖然加咗煉奶，但嗰覺甜，反而佢話落咗芝士粉，食落又唔多覺添。

 八珍苔條月餅

喺另一款幾啱口味嘅「蘇式月」，成份有糖冬瓜、花生、金桔餅、瓜仁、原味瓜蓉、桃仁、苔條粉，紫菜味非常突出，多款果仁，口感夠晒咬口呀！

 玫瑰百果月餅

正所謂期望大，就失望大，以桃仁、松子仁、瓜子仁、青梅、花生、糖冬瓜、金桔、糖玫瑰嚟做嘅玫瑰百果月餅，真喺唔點食得出玫瑰味，都喺一大堆果仁餡，跟期望有好大落差。

小弟只喺年年應吓節食吓月餅，絕無研究，雖知月餅世界，五花八門，何謂「蘇式月餅」，都喺道聽途說。只知蘇式月餅重油、含糖量較少，更會用上鮮肉作餡，又喜歡加入唔同嘅果仁、籽粒，味道、口感煞是有趣。希望年年都有啲咁嘅叨光機會，等小弟可以試到唔同地方嘅月餅，叫做開開眼界！

個人評分
味道：7/10
環境：9/10
服務：8/10
抵食：8/10
平均每人消費：HK$0（禮物）

餐廳資料：
蘇浙滙 Jardin De Jade
灣仔港灣道30號新鴻基中心地下G3–4舖
3528 0228