金龍泉餐廳 Golden Spring restaurant：我的美孚下午茶餐～偶爾無沉船

大概兩年前，開始工作時間由5日半改為5日之後，好多時星期六瞓晏啲，晏食早餐，就自不然午餐時段都未肚餓，等下午茶時段先落去食慳番啲，所以就寫咗一系列「我的美孚下午茶餐」。不過，近依一年都有所轉變，星期六都照正常早起番身，三餐都跟番正常時間，下午茶都少咗去食，只喺偶爾一次半次，今趟晌金龍泉食下午茶就喺其中一個「偶爾」。

一如一般茶記，金龍泉都有好多款下午茶餐選擇，輕盈啲嘅、湯麵類嘅、燒味類嘅、特色啲嘅……，而我哋兩公婆就揀咗個「飛碟三文治餐」同「紅豆冰套餐」，叫做食得豐富少少。

飛碟三文治餐

分兩個價錢，視乎飛碟揀咩料，如火腿 / 餐肉 / 芝士 / 果占醬 / 鹹牛肉就賣$23，而揀吞拿魚 / 鮮牛肉就收$25，配沙律或薯條，如想雙拼加$4，包茶啡，照例凍飲、檸樂、檸蜜、特飲就要補錢。我哋要咗鮮牛肉，又睇睇有幾新鮮。兩件飛碟三文治，漲卜卜，熱烘烘，外皮有點脆，我自己屋企都有飛碟三文治機，喜歡外層搽啲牛油先烘，出效嘅效果會份外金黃香口，但明顯佢哋就無特別咁做。然而，內裡填滿鮮牛肉，色澤仲喺帶少少粉嫩，咬落好軟滑，肉味不俗，有少少沙嗲香，認真不賴。不過，啲沙律就喺茶記嘅傳統貨色，甘筍、薯仔加啲生菜絲，比起生果沙律會有出水問題極為保險。配埋芳香嘅奶茶，奶滑茶香，幾時都喺晌茶記飲奶茶最好。

紅豆冰套餐

一共有4個選擇：法蘭西多士$25、雞扒撈麵$29、珍寶腸及雞翼（配沙律或薯條）$27、熱狗（配沙律或薯條）$26。睇相就知我哋要咗雞扒撈麵，麵條喺公仔麵，不過唔喺丁字牌，但質地煮得還可以，至少無過腍，但雞扒可真唔細，煎得蠻香，淋上洋蔥汁，都算惹味吖。至於杯紅豆冰，有1/3杯紅豆，唔會成杯冰咁搵笨，紅豆夠腍又夠清甜，抵飲。

未晌美孚住嘅時候，都曾經晌度食過晚飯，但感覺麻麻。難得今次所食嘅兩個下午茶餐又做得唔錯，雖然，兩個餐各有不足之處，如飛碟三文治嘅沙律較為普通，而雞扒撈麵若換上丁字牌，相信味道更佳，當然對茶記唔可以太多要求，始終要睇成本。單以今次嘅質素及價錢，都值得比個笑佢。

個人評分
味道：7/10
環境：6/10
服務：6/10
抵食：8/10
平均每人消費：HK$27

餐廳資料：
金龍泉餐廳 Golden Spring restaurant
美孚美孚新村萬事達廣場N51舖
2786 0136