東海堂 Arome Bakery Room：「開飯搶鮮試！水果月餅大比拼」（二）之日本白桃冰皮月餅

前文講到有幸被邀參與咗「開飯」嘅「開飯搶鮮試！水果月餅大比拼」試食活動，一共試咗8款以水果為餡嘅月餅，其中3款覺得幾唔錯就特別抽出嚟寫寫，第一篇喺8度海逸酒店嘅鮮鳳梨月餅，跟住想分享嘅就喺東海堂嘅出品。活動地點：西灣河嘅Teavers，雖然睇唔到月光，但一邊呷茶，一邊試月餅，又同其他食友交流吓，都幾開心。

Teavers內在環境

今年東海堂繼續嚴選頂級日本原材料製作，直送純正日本滋味。傳統餅皮分別有十勝紅豆、鹿兒島紫薯及白蓮蓉，而冰皮唔單只花款好多好，例如：抹茶芝士、北海道牛乳朱古力、日本芝士柚子、芒果栗子……等等共9款，仲要玩到以北海道3.6牛乳嚟製作冰皮，稱之為「日本．北海道冰皮月餅」系列。

至於另一個冰皮月餅系列，叫做「冰幻．雪兔冰皮月餅」，有趣緻超可愛嘅立體兔仔造型，非常「咔娃兒」；味道方面有4款，繼續熱賣嘅日本柚子，新推出嘅日本白桃，以及芒果栗子、抹茶芝士。其實「兔仔」冰皮仲有散賣裝，多咗另外兩款口味：沖繩黑糖及鹿兒島紫薯，兩者都喺新口味。是晚試到嘅喺日本白桃味，由於「開飯」仝人唔想我哋知啲月餅喺出自何家產品，所以試食之時全部月部都喺反轉晒，可惜，一個立體兔型就令到大家都知晒！

立體兔仔造型，一望就知東海堂出品！

日本白桃冰皮月餅
無論你買「冰幻．雪兔冰皮月餅」盒裝（原價$250 / 特價$155），抑或「冰皮二人前」散裝（$50孖件裝），都有日本白桃口味。以冰兔造型，其實視覺上已暗暗加分；而東海堂所做嘅冰皮絕對上乘，既薄身，又軟糯煙韌，而內裡嘅綠豆蓉清甜不膩；至於主角白桃餡，事後得知喺以日本藏王高原嘅白桃製作，雖然無見過其真身，只喺晌官方嘅簡介上睇過其介紹及圖片：「果實色澤粉紅，桃肉柔軟，啖啖甜美豐盈，鮮美果香。」但單以今晚所試到嘅，白桃果味頗為突出，而且感覺清新，跟綠豆蓉亦都好夾，故此，成為是晚最得小弟歡心嘅月餅。

個人評分
味道：8/10
環境：7/10
服務：7/10
抵食：7/10
平均每人消費：HK$0（試食活動）

餐廳資料：

東海堂 Arome Bakery Room

鰂魚涌糖廠街1號英皇大廈地下G店

2805 5296