Simplylife The East The West：簡單人生東西尋

曾經幫襯過又一城嘅Simplylife Bakery Café，對其味道有頗好嘅印象，所以，今次老死Ivan兄搵我食飯，就大家方便定晌奧海城，問我揀Simplylife The East The West定Berliner German時，沒多考慮，就揀咗前者。其實兩間餐廳我都未試過，兩間都甚有興趣，只喺覺得去Berliner German得我哋兩個麻甩佬，點都唔及一大棚人去咁夠氣氛嘅。

又一城嗰間Simplylife經常大排長龍，我上次都戇居居排咗成個鐘，不過，奧海城依間Simplylife就好好多，雖然老友已經訂咗枱，不過去到所見，唔使排都就有位。之但喺，坐吓坐吓都一樣「全院滿座」。門口放有可零售嘅麵包櫃，再入啲側旁就喺甜品餅櫃，跟住一列半開放式廚房，睇到晒啲廚師埋頭苦幹。而環境裝修以簡約為主，木枱木椅，都無咩太多餘裝飾，燈光柔和，部份位置會比較暗，對小弟部DC仔影相極有啲難度。

餐牌分為The East同The West，顧名思義，大概你都估到佢一個賣東方菜式，另一個賣西方菜式。因為老友本身已食過佢依度嘅西菜，有啲心水推介，所以，就決定揀晒西方菜式。餐牌內，以套餐形式為主，包自家製凍茶或汽水，是日餐渺或沙律，價錢就按所揀嘅主菜計，主菜款式一共十多款，包括沙律類、肉類、糙米飯或意粉類、薄餅類。

麵包盤

4件餐包以小木盤盛載，有兩片黑麥同兩片法包，依啲歐陸包，一向以皮硬見稱，唔喺人人都接受到。不過，味道重麥香，質感帶煙韌，包心氣孔大，非常鬆軟，所以，亦有唔少人鍾意，包括我哋。如果俾多少少牛油就更加好嘞！

紅菜頭沙律

一個餐揀沙律，一個餐要餐湯，務求樣樣試到。一小碗沙律，簡簡單單紅菜頭配沙律菜，內裡紅菜頭有唔少，大概加咗少許油醋，酸酸甜甜極之醒胃，況且沙律菜又夠晒爽脆清新。

南瓜忌廉湯

湯嘅份量有點少，只得半碗，還好喺味道不錯。南瓜味算突出，溫熱嘅湯入口幾順滑。

燒美國肉眼扒（10安士）, 提子醋燒雜菜, 迷迭香牛油汁 $188

足秤嘅肉眼扒橫趟晌碟上，下面墊有翠玉瓜、薯仔同洋蔥，扒面再放有一小舊香草牛油。印有炭燒坑紋，睇外觀件扒燒得幾靚，肉質還算腍，不過其實有微微過熟，因為我哋要嘅喺五分熟，然而，沾咗香草牛油，肉嘅味道的確唔錯。提子醋燒雜菜，翠玉瓜同薯仔多份葡萄醋香，又帶微酸，襯肉眼確喺好配搭！

烤海鮮有機糙米飯 $128

老死話之前試過佢啲有機糙米飯挺好，建議再試。海鮮料有蝦、青口、魷魚、蜆，由於蝦及青口各得一隻，兩個人共享就比較麻煩啲。綜合大家嘅結果，海鮮質素唔算得上乘，以蝦及魷魚較有鮮味，前者食落爽甜，而後者入口軟腍。糙米飯口感有少少似意大利飯，口感濕潤有咬口，又加咗少少菇菌同煮，不過份量偏少啊！

香橙茉莉花凍茶

上次晌又一城店試過嘅喺蘋果烏龍凍茶，感覺不俗，今之依杯茉莉花凍茶，冰冰涼，有茉莉茶香，又帶有橙甜味，真喺幾有趣。

Chocolate Orange Jaffe Tart $32

想食甜品，就要散叫，可以親自出去餅櫃望望，睇睇邊款最想食，叫侍應直送到餐枱上就可以嘞。餅櫃內所擺放全部都喺撻嚟，我哋叫咗一款「Chocolate Orange Jaffe Tart」，造型夠立體。曲奇餅撻底，做得幾鬆脆；跟住一層朱古力軟漿，柔軟濃郁；而中間夾有一層香橙果蓉，酸香爽甜，令到下層嘅朱古力軟漿，抑或表層嘅朱古力忌廉，食起嚟更加唔會覺得太甜膩，此外，撻面刨咗少少橙青，唔好睇少佢，點綴以外，都能帶出點點鮮橙香氣。

睇得出無論兩款主菜、甜品，抑或沙律、凍茶，用料同配搭都花過心思，下次再嚟，就要試一試佢哋嘅「東方菜式」。

個人評分
味道：8/10
環境：8/10
服務：8/10
抵食：8/10
平均每人消費：HK$190

餐廳資料：
Simplylife The East The West
大角咀海泓道1號奧海城3期G19-21號舖
2750 1875