英王麵包店 A-1 Bakery：何解叫拿破崙？

早前同幾個舊同事食飯，其實小弟曾幾何時都當過會計，不過脫離依個行業十多年，而依幾個當年所識嘅舊同事雖然大家一早各散東西，但閒時就約番一齊食飯兼講舊老細啲是非。今次飯局竟然收到其中一位舊同事所贈嘅蛋卷喎，佢話嚟之前有啲肚餓，就索性多買幾個送俾大家。

拿破崙蛋卷

原本都無打算為兩件蛋卷寫食評，因為質感、味道都無乜咩特別，跟街坊餅店食到嘅都差唔多，卷心嘅忌廉極少，怕肥嘅人就啱晒。最引起小弟留意喺佢個名字「拿破崙蛋卷」，真喺睇與食都難跟拿破崙扯上關係，明顯就喺一件原味嘅蛋卷。如果加多啲忌廉，又加埋合桃，或許都仲可以當佢喺啲舊式嘅拿破崙蛋糕。

朱古力蛋卷

無論拿破崙蛋卷，抑或朱古力蛋卷，做法都屬於舊式，製法平實，無乜花巧嘢，主要就只不過喺食層海綿蛋糕。因為喺友人所贈，唔知單價幾多，難以評價抵唔抵，其實單以蛋糕嘅鬆軟度計，著實不錯，加杯咖啡，當個下午茶，晌公司裡忙裡偷閒，都唔錯吖。

題外話，有時跟朋友提及「蛋卷」，佢哋第一個印象會想起又長又脆嗰啲雞蛋卷，所以為講清兩者，會用「卷蛋」或「瑞士卷」，不過好吊詭喺「瑞士卷」嚟自歐洲，不過絕對同瑞士無關，就好似瑞士雞翼咁！ 

個人評分
味道：7/10
環境：7/10
服務：7/10
抵食：8/10
平均每人消費：HK$0（試食邀請）

餐廳資料：
英王麵包店 A-1 Bakery
尖沙咀港鐵西鐵線尖東站4號舖
2367 8872