2020年8月9日星期日

薄餅博士 PHD:「超等」薄餅

美孚區有Pizza Hut,亦有PHD,兩家都喺外賣店,無堂食,有訂開呢兩家薄餅都知,兩家同屬一個集團,大致上質素差唔多,不過後者就平啲,有時優惠又多啲。星期日晚,老婆想休息吓唔想煮,小弟行完山亦唔夠時間準備,所以,是晚就過嚟PHD買薄餅。不過,蠢咗,誤信個店員話等20min,結果等咗40min,否則,落咗單再去逛超市買嘢,返轉頭先拎薄餅就變相唔使等太耐。
有咩揀就唔講喇,Pizza Hut又好,PHD又好,相信好多香港人都好熟。本來打算叫個超值二人套餐,但薄餅只限指定款式,老婆唔啱食,唯有散點。不過,其他套餐嘅薄餅就可以任揀款式,唔明咩邏輯。
臨俾錢時,見佢啲有啲「星級追加」,睇落好似平平哋,就點多兩客甜品返去,不過,比預期好鬼細杯。
bowl醬烤雞肉薄餅 $117 (8折) 
外賣自取有樣着數,就喺8折咗,而揀咗惹味嘅「醬烤雞肉薄餅」,睇餐牌紙材料包括雞肉、牛肉、桃、青椒、青瓜,並配以燒烤醬汁。不過,單睇外表,餡料真喺唔算多,加上睇住佢哋咁多單,啲店員做到唔停手,餡料就唔好期望分布平均喇。
質素方面呢?咁叫得PHD嘅,都唔喺貪咩高質素,但求平靚正,過吓薄餅癮,不過,食材分布不均,喺會影響咗個食味,我都專登揀件料多嚟影先睇落咁好咋,其實啲青瓜同罐頭桃都喺平價嘢,不妨落多啲啦。
bowl沖繩黑糖豆乳布甸 $10 
本身黑糖分開裝起喺無問題,但估唔到喺黑糖粒,唔喺黑糖漿,唔似食豆腐花咁,熱嘅豆腐花好易將啲黃糖溶咗去,但呢家啲黑糖根本就一粒粒晌布甸上面,唔會溶,故此,食落口喺沙沙嘅感覺,唔OK喎,嘥晒啲香滑豆乳味濃嘅布甸啫。
bowl紅豆抹茶布甸 $10 
相對個豆乳布甸,呢個紅豆抹茶布甸就正好多,一來紅豆跟抹茶向來都好夾,二來唔會好似啲黑糖有沙沙嘅感覺,再者,紅豆夠腍、夠清甜,布甸嘅抹茶味夠濃郁。可惜喺兩杯甜點都好細杯,兩啖就食晒,感覺有少少到喉唔到肺嘅感覺。
題外話,晌等候期間,客人越嚟越多,但都仲喺同啲客講我20分鐘,我見佢哋啲外送速遞堆到十幾袋都送唔徹,我心諗,後面啲客唔使等一個鐘就怪,眼見有啲客都開始不耐煩,包括小弟!

個人評分
味道:7/10
環境:- /10
服務:5/10
抵食:7/10
平均每人消費:HK$57

餐廳資料:
薄餅博士 PHD
美孚寶輪街9號地下B舖
2111 1234 

沒有留言:

發佈留言